Mataupu 12

Le Papatisoga o Iesu

PE TUSA o le ono masina talu ona amata le talaʻiga a Ioane, ae alu ane loa i a te ia Iesu i le Ioritana, ina ua 30 ona tausaga. Mo le ā le mafuaaga? Pe mo se asiasiga faasamasamanoa ea? Pe sa na ona fiafia ea o Iesu i le auala sa agaigai ai i luma le galuega a Ioane? E leai, sa talosaga atu Iesu i a Ioane ina ia papatisoina o ia.

Sa tetee atu Ioane e faapea: “E ao ona e papatiso mai i a te aʻu, a e maliu mai ea oe i a te aʻu?” Na iloa e Ioane o lona tauusoga o Iesu, o le Alo faapitoa lea o le Atua. Auā sa osooso fiafia Ioane i le manava o lona tinā, ina ua asiasi atu i a te i latou Maria, a o to i a Iesu! E lē taumatea foi sa mulimuli ane taʻu atu e lona tinā o Elisapeta i a te ia lenei mea. Ma atonu foi sa ia taʻu atu i a te ia le faasilasilaga a le agelu e uiga i le fanau mai o Iesu, atoa ma le faaali mai o agelu i leoleo mamoe i le po na fanau mai ai Iesu.

Sa iloa lelei la e Ioane Iesu. Ma sa iloa foi e Ioane o lana papatisoga e lē mo Iesu. Ae e mo i latou ua salamō mai a latou agasala, a o Iesu e leai sana agasala. E ui lava ina tetee atu Ioane, ae sa fetalai atu pea Iesu: “Tuu mai nei pea ia; auā e faapea ona tatau ona ta faataunuuina o mea tonu uma.”

Aisea sa tatau ai ona papatisoina Iesu? Auā o le papatisoga o Iesu, e lē o se faatusa lea o le salamō mai agasala, ae o lona ofoina atu o ia lava e faia le finagalo o lona Tamā. Sa avea Iesu o se kamuta, ae o lea ua oo i le taimi e tatau ai ona ia amataina le faiva, na auina mai ai o ia e Ieova le Atua i le lalolagi e fai. Pe e te manatu sa faatalitalia e Ioane se mea ofoofogia e tupu ina ua ia papatisoina Iesu?

Fai mai le lipoti mulimuli ane a Ioane: “O Ia lē na auina mai aʻu e papatiso i le vai, na fetalai mai o ia i a te aʻu, O lē e te iloa le agaga paia ua afio ifo i ai ma nofo i ona luga, o ia lava lea na te papatiso atu i le agaga paia.” O lea la sa faatalitalia ai e Ioane le agaga o le Atua e afio ifo i luga o se tasi o le a ia papatisoina. Atonu, o le mea lena sa leʻi matuā ofo ai o ia, ina ua maliu aʻe Iesu nai le vai, ae vaaia ai e Ioane “le agaga paia o le Atua e peiseaī se lupe ua afio ifo i ona luga.”

Ae e tele isi mea na tutupu a o papatisoina Iesu. ‘Sa faaavanoaina ifo le lagi’ i a te ia. O le ā le uiga o lena mea? E mautinoa, o lona uiga a o papatisoina o ia, sa toe manatua ai e Iesu lona soifuaga muamua a o iai i le lagi. I lea, sa toe manatua atoatoa ai e Iesu lona soifuaga a o avea ma atalii agaga o Ieova le Atua, e aofia ai ma mea uma lava na fetalai ane ai le Atua i a te ia a o iai i le lagi.

E lē gata i lena, i le taimi o lona papatisoga, sa folafola ifo ai e le siufofoga mai le lagi e faapea: “O loʻu Atalii pele lena, o lē ua ou faamaonia.” O ai e ana lena siufofoga? Po o le siufofoga ea o Iesu lava ia? E matua leai lava! O le siufofoga lena o le Atua. E manino lava la, o Iesu o le Alo o le Atua, ae e lē o ia o le Atua, e pei ona fai mai ai nisi tagata.

Ae peitai, o Iesu o le atalii faaletagata o le Atua, e pei foi ona iai le uluai tagata o Atamu. Sa tusia faapea e le soʻo o Luka, ina ua uma ona ia faamatalaina le papatisoga o Iesu: “O Iesu foi, pe tusa ma le tolusefulu ona tausaga ina ua amata lana galuega, sa manatu foi tagata, o ia o le atalii o Iosefa, o le atalii ia o Heli, . . . o le atalii ia o Tavita, . . . o le atalii ia o Aperaamo, . . . o le atalii ia o Noa, . . . o le atalii ia o Atamu, o le atalii ia o le Atua.”

E pei ona sa fai Atamu ma ‘atalii faaletagata o le Atua,’ sa faapena foi Iesu. O Iesu la, o ia o le tagata silisili o ē uma na soifua mai, ma e iloa lea pe a tatou suesueina le soifuaga o Iesu. Ae peitai, i lona papatisoga, na ulu atu ai Iesu i se faiā fou ma le Atua, ma ua fai ai foi ma Atalii faaleagaga o le Atua. O le taimi lena e foliga mai sa toe valaauliaina ai o ia e le Atua i le lagi, e ala i lona uia o se olaga e iu ai i le faataulagaina e faavavau o lona soifuaga faaletagata mo tagata agasala. Mataio 3:13-17; Luka 3:21-38; 1:34-36, 44; 2:10-14; Ioane 1:32-34; Eperu 10:5-9.

▪ Aisea sa lē o se tagata ese ai Iesu i a Ioane?

▪ Aisea na papatiso ai Iesu, ae e leai sana agasala?

▪ Ona o mea na iloa e Ioane e uiga i a Iesu, aisea atonu sa leʻi ofo ai o ia ina ua afio ifo le agaga o le Atua i luga o Iesu?