Mataupu 24

Le Pogai na Afio mai ai Iesu i le Lalolagi

SA TELE naua galuega a Iesu ma ona soʻo e toafā i le aso na latou nonofo ai i Kapanaumi, lea sa faaiuina i le aumaia e tagata Kapanaumi o o latou tagata mamai uma i a te ia, ina ia faamaloloina i lena afiafi. Sa leai se taimi avanoa mo na o i latou.

Ae i le taeao po o le aso na sosoo ai. A o pogisa pea, a ua tulai Iesu ua ulufafo ese na o ia. Ua maliu atu o ia i se nofoaga tuufua ina ia mafai ai ona tatalo atu na o ia i lona Tamā. Ae sa leʻi umi ona i ai na o Iesu, auā ina ua iloa e Peteru ma isi ua alu ese o ia, sa latou ō atu loa e saili i a te ia.

Ina ua latou maua Iesu, ona fai atu lea o Peteru: “O loo saili tagata uma i a te oe.” Sa mananao tagata Kapanaumi ina ia latou nonofo pea ma Iesu. Na latou matuā talisapaia mea na ia faia mo i latou! Ae po o le autū ea o le afio mai o Iesu i le lalolagi ina ia faia na faamalologa faavavega? O le ā sana fetalaiga e uiga i lena mea?

Ua taʻua i se tasi o tala i le Tusi Paia, na tali atu Iesu i ona soʻo e faapea: “Inā tatou ō atu ia i se isi mea, i aai e latalata mai, ina ia ou talaʻi atu foi i ai, auā o le mea lea na ou sau ai.” E ui ina sa tauanau e tagata Iesu ina ia nofo, a ua ia fetalai atu i a te i latou: “E tatau foi ona ou folafola atu le tala lelei o le malo o le Atua i nisi aai, auā o le mea lea na auina mai ai aʻu.”

Ioe, na afio patino mai lava Iesu i le lalolagi ina ia talaʻi le Malo o le Atua, lea o le a faapaiaina ai le suafa o lona Tamā ma foia ai e faavavau mafatiaga uma o tagata. Peitai, ina ia faamaonia na auina mai o ia e le Atua, sa faia ai e Iesu na faamalologa faavavega. O le pogai foi lena na faia ai e Mose ni vavega i senituri ua mavae, ina ia faamaonia ai o ia o se auauna a le Atua.

Ina ua tuua e Iesu Kapanaumi ae maliu atu e talaʻi i isi aai, sa faatasi atu ai foi ona soʻo e toafā i a te ia. O i latou nei e toafā o Peteru ma lona uso o Aneterea, faapea foi Ioane ma lona uso o Iakopo. Atonu o e manatua, i le vaiaso faatoʻā mavae atu, sa valaaulia ai i latou e avea ma uluai aumea faigaluega a Iesu latou te faimalaga faatasi.

Na matuā taulau le talaʻiga faataamilo a Iesu ma ona soʻo e toafā i Kalilaia! O le mea moni, sa salalau atu foi tala e uiga i ana gaoioiga ua oo i Suria atoa. Ona mulimuli ai lea i a Iesu ma ona soʻo o se motu o tagata e toatele mai Kalilaia, Iutaia, atoa ma le isi itu o le Vaitafe o Ioritana. Mareko 1:35-39; Luka 4:42, 43; Mataio 4:23-25; Esoto 4:1-9, 30, 31.

▪ O le ā na tupu i le taeao ina ua mavae le aso sa tele naua ai galuega a Iesu i Kapanaumi?

▪ Aisea na auina mai ai Iesu i le lalolagi, ma o le ā le pogai na faia ai ana vavega?

▪ O ai sa ō ma Iesu i lana talaʻiga faataamilo i Kalilaia, ma o le ā le tali ane a tagata i gaoioiga a Iesu?