Le Puna o le Fiafiaga
Mataupu 75
Le Puna o le Fiafiaga
I LE gasologa o le faiva a Iesu i Kalilaia, na ia faia ai ni vavega, ma o lea ua ia toe faia foi na vavega i Iutaia. Mo se faataitaiga, na ia tuliesea mai se tagata, se temoni na mafua ai ona ia gūgū. Na matuā ofo lava le motu o tagata, peitai na faatū ane foi e le au faitio se teteega e pei ona sa lāgā i Kalilaia. Na latou fai ane: “O Pelesepulo le alii o temoni, ua tulia ai e ia o temoni.” Sa mananao isi e fia vaai i ni faailoga se tele mai i a Iesu e faamaonia ai o ia, ma sa latou taumafai e tofotofo i a te ia i lo latou fesili atu mo se faailoga mai le lagi.
I lona silafia o o latou manatunatuga, na tali atu ai Iesu i ē na faitio ane i a te ia i Iutaia, e pei ona sa ia tali atu i tagata i Kalilaia. Ua ia faapea atu, o malo uma e fevaevaeai, e lē tumau ia. “O lea” na ia fesili atu ai, “afai foi e fevaevaeai Satani i a te ia lava, pe faapefea ona tumau o lona malo?” Na ia faailoa atu le tulaga matautia o ē sa faitioina o ia i lona faapea atu: “Ae afai o le aao o le Atua ou te tulia ai temoni, ua oo mai lava i a te outou le malo o le Atua.”
O i latou na matauina vavega a Iesu, sa tatau ona latou tali atu i le auala lava e tasi lea sa tali atu ai ē na vāai i se vavega na faia e Mose i senituri ua mavae. Na latou alalaga atu e faapea: “O le aao lenei o le Atua!” O le “aao lenei o le Atua” na vaneina Tulafono e Sefulu i papa maa. Ma “o le aao [foi] lenei o le Atua”—o lona agaga paia, po o lona mana galue—sa mafai ai e Iesu ona tulia temoni ma faamaloloina maʻi. O lea, sa oo moni ane ai lava le Malo o le Atua i na tagata faitio, ona sa auai moni i a te i latou Iesu, o lē na tofia e avea ma Tupu mulimuli ane i le Malo.
Ona faapea atu lea o Iesu, o lona malosi na tulia ai temoni, o se faamaoniga lea o le silisili atu o lona mana na i lo o le mana o Satani, e faapei lava ona alu atu o se tagata malosi ma faatoilaloina se tagata ua faaauupegaina lelei e leoleoina lona fale. Sa ia toe faailoa atu foi le faataoto na ia taʻuina atu i Kalilaia e faatatau i se agaga leaga. Na alu ese lea agaga mai se tagata, ma ina ua lē faatumuina e le tagata lena avanoa i ni mea lelei, sa toe foi ane loa le agaga leaga faatasi ma isi agaga e toafitu, ma ua sili atu ai ona leaga o le tulaga o lea tagata na i lo o le mea sa iai i le taimi muamua.
Ina ua faalogo atu i nei aʻoaʻoga, na uunaia ai se fafine mai le motu o tagata e alaga atu: “Amuia le manava na fanau mai ai oe, ma susu na e susu ai.” Talu ai sa faanaunau fafine uma o Iutaia ina ia avea i latou ma tinā o se perofeta, ae maise lava le Mesia, ua manino mai ai le mafuaaga na fai ane ai faapea lea fafine. Atonu sa manatu o ia i le fiafiaga faapitoa o Maria ona o le avea o ia ma tinā o Iesu.
Peitai, sa vave lava ona faasaʻo atu e Iesu le fafine e faatatau i le puna moni o le fiafiaga. Na ia tali atu e faapea: “E leai, e sili ona fiafia o ē faalogo i le afioga a le Atua, ma tausi i ai.” Sa leʻi faailoa atu lava e Iesu faapea e tatau ona tuuina atu se faaaloaloga faapitoa i lona tinā o Maria. Na i lo o lea, na ia faaalia e faapea, e maua le fiafiaga moni i le avea ma auauna faamaoni a le Atua, ae e lē i so o se fesootaiga ma mea faitino po o ni tulaga e ausia.
E pei ona sa ia faia i Kalilaia, sa faaauau ona aoaia e Iesu tagata Iutaia ona o le talosaga atu mo se faailoga mai le lagi. Sa ia taʻu atu i a te i latou e leai se faailoga e avatua na o le faailoga o Iona. Na avea Iona o se faailoga e ala i lona iai i totonu o le manava o le iʻa mo aso e tolu ma i lana talaʻiga ma le lototele lea sa uunaia ai tagata Nineva e salamō. “Ae” na fetalai atu Iesu: “Faauta! o loo i inei lē e sili i a Iona.” Sa faapena foi ona ofo le tupu fafine o Seepa i le atamai o Solomona. “Ae” na toe fetalai atu Iesu: “Faauta! o i inei lava lē sili i a Solomona.”
Sa faamatala atu e Iesu, afai e tutu e se tasi se lamepa, na te lē tuua i lalo o se tanoa po o lalo o se ʻato, ae tuu i luga o le tuugalamepa ina ia mafai ai e tagata ona vaai i le malamalama. Atonu o lena sa ia tau faaataataina atu faapea o le aʻoaʻo atu ma le faia o vavega i luma o nei tagata faauamaaa o lana au faalogologo, ua tusa lea ma le punitia o le malamalama o se lamepa. Sa lē faigofie pe saʻo le vaai a na tagata, ma o lea sa lē mafai ai ona faataunuuina le fuafuaga tonu o ana vavega.
Na seʻi faatoʻā uma lava ona tulia e Iesu se temoni ma mafai ai ona tautala le tagata sa gūgū. Sa tatau la i lena mea ona uunaia ai tagata ia faigofie pe ia saʻo a latou vaai, ina ia viia lena gaoioiga mamana, ma folafola atu ai le tala lelei! Peitai, e lē o le mea lena na faia e nei tagata faitio. O lea na fetalai faaiu atu ai Iesu: “O lenei, i a oe, atonu ua pogisa le malamalama ua i totonu i a te oe. Afai foi ua malamalama lou tino uma, e leai sona pouliuli, e malamalama uma ai, e pei ona faamalamalamaina o oe i le pupula a se lamepa.” Luka 11:14-36; Esoto 8:18, 19; 31:18; Mataio 12:22, 28.
▪ O le ā na faia e tagata ina ua faamaloloina e Iesu le tagata?
▪ O le ā le “aao o le Atua,” ma na faapefea ona oo ane le Malo o le Atua i le au faalogologo a Iesu?
▪ O le ā le puna o le fiafiaga moni?
▪ E mafai faapefea ona faigofie le vaai a se tagata?