Mataupu 85

Le Sailiga o Ē Taase

SA NAUNAU Iesu e saili ma ia maua i latou o le a auauna ma le loto maulalo i le Atua. O lea na ia sailia ai ma talanoa atu i tagata uma e uiga i le Malo, e aofia ai tagata o ē faia agasala inosia. Na faalatalata ane foi na tagata e faalogologo i a te ia.

I le matauina o lena mea, na faitioina ai Iesu e Faresaio ma le ʻau tusiupu, ona o lona auaumea ma tagata o ē sa latou manatu i ai e lē aogā. Na latou muimui ane e faapea: “Ua talia e lenei tagata o ē agasala, ua ʻaai faatasi foi o ia ma i latou.” Pagā so latou faasausili! Sa manatu Faresaio ma le ʻau tusiupu i tagata lautele, e pei o le eleele e soli i o latou vae. O le mea moni, sa latou faaaogaina le faaupuga faa-Eperu o le ‛am ha·’aʹrets, “tagata o le nuu [laueleele],” e faaalia ai lo latou vaai maulalo i na tagata.

I le isi itu, sa faamamaluina, agalelei ma tiga alofa Iesu i tagata uma. O le iuga, o le toatele o na tagata faatauvaa, e aofia ai tagata o ē na lauiloa i le amioleaga, sa latou naunau e faalogologo i a te ia. Ae faapefea le faitioina e le ʻau Faresaio o Iesu ona o le faateleina o ana taumafaiga mo ē sa latou manatu i ai e lē aogā?

Na tali atu Iesu i a latou teteega, e ala i le faaaogaina o se tala faatusa. Sa ia fetalai atu e tusa ai ma le manatu o le ʻau Faresaio lava latou, e pei ua amiotonu ma saogalemu i latou i totonu o le lafu a le Atua, a ua taase ma leiloloa tagata inosia o ‛am ha·’aʹrets. Faafofoga foi a o ia fesili atu:

“O ai ea so outou e ana mamoe e selau, afai e leiloa le tasi, e lē tuua ea e ia le ivasefulu ma le iva i le vao ae alu atu ma saili i lē ua leiloa, seia maua? A maua, ona faafuata lea ma le olioli. A oo atu i lona aiga, ona ia faapotopoto lea o ana uō ma ē tuaoi ma ia, ua fai atu i a te i latou, ia tatou olioli ia; auā ua ou maua laʻu mamoe na leiloa.”

Ua faamatala atu foi e Iesu le faatatauga o lana tala e faapea: “Ou te fai atu i a te outou, e faapea foi ona tele o le olioli i le lagi i le tagata agasala e toatasi ua salamō, ae itiiti i ē amiotonu e toʻa ivasefulu ma le toaiva e lē o manaomia ona salamō.”

Sa manatu le ʻau Faresaio i a i latou lava o ē amiotonu ma o lea sa lē manaomia ai ona latou salamō. Ina ua faitioina e nisi o i latou Iesu i le lua tausaga ua mavae, ona o lona taumafa faatasi ma tagata ao lafoga ma ē agasala, sa ia fetalai atu i a te i latou: “Ou te leʻi sau e valaau i ē ua amiotonu, a o ē ua agasala.” Sa leʻi maua se olioli i le lagi ona o na Faresaio faafiaamiotonu, o ē sa lē taulau ona latou iloa le manaoga ina ia latou salamō. Peitai sa faapena i tagata agasala na salamō moni.

Ina ia tamauina le manatu e faapea, o le a maua le olioli tele pe a toe salamō tagata agasala, na faamatala atu ai e Iesu se isi tala faatusa. Ua ia faapea atu: “O ai ea foi le fafine e ana tupe siliva e sefulu, afai e leiloa i a te ia se tupe e tasi, e lē tutu ea se afi ma tafitafi le fale, ma matuā saili i ai, seia maua? A maua, ona ia faapotopoto ai lea o ana uō ma ona tuaoi, ma fai atu, ‘Ia tatou olioli ia; auā ua ou maua le tupe na leiloa i a te aʻu.’”

Ona taʻu atu lea e Iesu o le faatatauga lava e tasi. Ua ia fetalai atu: “Ou te fai atu i a te outou, e faapea foi le olioli i luma o agelu a le Atua, ona o le tagata agasala e toatasi ua salamō.”

Maeu le ofoofogia o lena manatu alofa o agelu a le Atua pe a toe salamō tagata agasala! Ae maise ona o na tagata faatauvaa ma le inosia o ‛am ha·’aʹrets, sa mulimuli ane tauaogaina e avea ma sui o le Malo faalelagi o le Atua. O le iuga, ua latou maua ai se tulaga e sili ona maualuga i le lagi na i lo o agelu! Ae, na i lo o le iai o se lagona fuā po o sina manatu tetee, sa talisapaia ma le loto maulalo e agelu faapea, o nei tagata agasala sa latou faafetaiaia ma manumalo i tulaga o le olaga, ia e faaauupegaina ai i latou ina ia avea ma tupu ma ositaulaga faalelagi e magafagafa ma tiga alofa. Luka 15: 1-10; Mataio 9:13; 1 Korinito 6:2, 3; Faaaliga 20:6.

▪ Aisea na auaumea ai Iesu ma tagata sa lauiloa i agasala, ma o le ā le faitioga a le ʻau Faresaio i a te ia?

▪ O le ā le manatu o Faresaio i tagata lautele?

▪ O ā tala faatusa na faaaogā e Iesu, ma o le ā e mafai ona tatou aʻoaʻoina mai ai?

▪ Aisea e ofoofogia ai le olioli o agelu?