Le Tagata Mauoa ma Lasalo
Mataupu 88
Le Tagata Mauoa ma Lasalo
SA TALANOA atu Iesu i ona soʻo e uiga i le faaaogaina tatau o ʻoa faitino, ma faamatalaina ai e faapea e lē mafai ona fai i tatou ma pologa i nei mea, a o le taimi lava e tasi o loo avea ai i tatou ma auauna a le Atua. Na faalogologo ane foi i ai le ʻau Faresaio, ma amata ai ona latou faatauemu i a Iesu ona o i latou o ni tagata e mananao tele i tupe. O lea na ia fetalai atu ai i a te i latou: “O outou ua outou mata faafiaamiotonu i luma o tagata, a ua silafia e le Atua o outou loto; auā o le mea e sili ona lelei i tagata e inosia lea i le silafaga a le Atua.”
Ua oo mai le taimi e suia ai le tulaga o tagata mauoa i mea faalelalolagi, o malo faapolotiki, ma pulega ma taaʻiga a lotu. E tatau ona faamaulaloina i latou. A ua ao ona faamaualugaina tagata o loo amanaia o latou manaoga faaleagaga. Na faasino atu e Iesu lena suiga ina ua ia fetalai atu i le ʻau Faresaio e faapea:
“Na faaauau pea le Tulafono ma le ʻau perofeta seia oo mai i le taimi o Ioane [le Papatiso]. Talu mai na ona po ua folafolaina ai le tala lelei o le malo o le Atua, ma ua agaʻi atu i ai ituaiga tagata uma. E moni, e faigofie ona mavae atu le lagi ma le lalolagi ae lē iuvale sina iota e tasi o le Tulafono.”
Sa mitamita le ʻau Faresaio ma tusiupu ona o le faaalialia o lo latou pipii atu i le Tulafono a Mose. Ia manatua foi, ina ua faapupula faavavega e Iesu se tagata i Ierusalema, na latou gugutu ane ai e faapea: “O i matou nei o soʻo o Mose. Ua matou iloa na fetalai mai le Atua i a Mose.” A o lea ua faataunuuina le fuafuaga na tuuina mai ai le Tulafono a Mose, o le taitaiina atu lea o tagata loto maulalo i lē na tofia e le Atua e fai ma Tupu mulimuli ane, o Iesu Keriso. Talu mai la le amataga o le faiva a Ioane, ua finafinau ai ituaiga uma o tagata, ae maise lava i latou o ē loto maulalo ma ē matitiva, ina ia avea ma tagatanuu o le Malo o le Atua.
Ona o lea ua faataunuuina nei le Tulafono faa-Mose, ua lē toe manaomia ai foi la ona tausia. Sa faatagaina i le Tulafono le tatalaina o le faaipoipoga i so o se faavae, ae na fetalai atu Iesu: “O sē e faatea i lana avā ae faaipoipo atu i se isi, ua mulilua ia, ma o lē e faaipoipo atu i le fafine ua faateaina e lana tane, ua mulilua ia.” Maeu le faaʻonoʻono o na faaupuga i le ʻau Faresaio, ae maise ona sa latou faatagaina le tatalaina o faaipoipoga i so o se faavae!
I le faaauauina o faamatalaga a Iesu i le ʻau Faresaio, na ia taʻu atu ai se tala faatusa o loo faamatilatilaina ai ni tagata se toalua o ē na suia mulimuli ane o la tulaga i se uiga mataina. Pe mafai ona e taʻu mai po o ai ua faaataina e na tagata, ma o le ā le uiga o le suia o o la tulaga?
Na faamatala atu e Iesu: “Sa iai se tasi tagata mauoa, e masani ona ofu i le ie lino sinasina ma le violē, sa olioli foi o ia i lea aso ma lea aso i mea matagofie. Ae o le tasi tagata ʻaisi o Lasalo lona igoa, sa masani ona nofo i le faitotoa o le mauoa, ua liloia o ia i papala, ma sa ia faanaunau ina ia ʻai i momoi mea na pauu ifo i le laoai a le tagata mauoa. Ioe, sa ō ane foi ulī ma etoeto i ona papala.”
O inei o loo faaaogā ai e Iesu le tagata mauoa e faaataina ai taʻitaʻi lotu o Iutaia, e aofia ai e lē na o le ʻau Faresaio ma tusiupu, ae faapea foi ma le ʻau Satukaio ma faitaulaga sili. Sa mauoa i latou i faaeaga ma tofiga faaleagaga, ma na amioai i latou e pei ona faia e le tagata mauoa. O o latou ofu o le ie violē ua faaatagia ai lo latou tulaga talileleia, a o le ie lino sinasina ua faaatagia ai lo latou faafiaamiotonu.
O lenei vasega faamaualuga e pei se mauoa, sa latou vaai ma le inoino i ē matitiva ma tagata lautele, ma na latou taʻua i latou o ʻam ha·’aʹrets, po o tagata o le eleele. O le tagata ʻaisi o Lasalo, ua faaataina ai tagata o ē sa mumusu taʻitaʻi lotu e avatu i ai ni meaai lelei faaleagaga ma ni faaeaga. O lea, e pei ona sa liloia o Lasalo i le papala, sa faapena foi ona vaai maulalo ai i tagata lautele e faapea, ua mamai faaleagaga i latou ma e na o ulī e fetaui ona latou nonofo faatasi. Peitai, sa matelaina ma galala le vasega a Lasalo mo meaai faaleagaga, o lea na latou ō atu ai i le faitotoa, e saili ina ia maua so o sina momoi mea o meaai faaleagaga e pauu ifo i le laulau a le tagata mauoa.
Ua faamatala atu foi e Iesu ni suiga i tulaga o le tagata mauoa ma Lasalo. O ā na suiga, ma o le ā ua faaataina ai?
Ua Oo i le Tagata Mauoa ma Lasalo se Suiga
O le tagata mauoa, ua faaataina ai taʻitaʻi lotu o ē ua maua faaeaga ma tofiga faaleagaga, a o Lasalo ua faaatagia ai tagata lautele o ē o loo fia ʻaai i meaai faaleagaga. Na faaauau e Iesu lana tala, i le faamatalaina o le suiga mataina i tulaga o ia tagata.
“A o mavae atu le taimi,” na fetalai Iesu, “ona oti ai lea o le tagata ʻaisi ma ua aveina atu e agelu i le fatafata o Aperaamo. Ua oti foi le tagata mauoa ma ua tanu. Ma i seoli, ua tepa aʻe ai ona mata, o loo puapuagatia o ia, ma ua ia iloa mamao atu Aperaamo ma Lasalo o loo i lona fatafata.”
Ona o le tagata mauoa ma Lasalo e lē o ni tagata moni, a ua faaataina ai ni vasega o tagata, e mautinoa foi la o o la oti e faafaatusa. O le ā ua faatusaina po o ua faaatagia i o la oti?
Faatoʻā uma lava ona faasino atu e Iesu i se suiga o tulaga i lona faapea atu, ‘na faaauau pea le Tulafono ma le au Perofeta seia oo mai i le taimi o Ioane le Papatiso, ae talu mai na ona po ua folafolaina atu ai le malo o le Atua.’ O lea, ona o le talaʻiga a Ioane ma Iesu Keriso, na feoti uma ai le tagata mauoa ma Lasalo i o la uluai tulaga, po o aiaiga.
Ua mavae atu le tulaga o le mativa faaleagaga sa iai le vasega salamō ma le loto maulalo a Lasalo, a ua oo i se tulaga talileleia i le Atua. Auā i le amataga, sa latou vaavaai atu ai i taʻitaʻi lotu mo ni nai momoi mea e pauu ifo i le laoai faaleagaga, a o lea ua faamalieina o latou manaoga i upu moni o le Tusi Paia ua tuuina atu e Iesu. Ua faapea ona avatu ai i latou i le fatafata, po o se tulaga talileleia i a Aperaamo Sili, o Ieova le Atua.
I le isi itu, o ē o loo faia aʻe ai le vasega o le tagata mauoa, ua fesagai i latou ma le toasa o le Atua ona o le maumauai e teena le feau o le Malo na aʻoaʻoina e Iesu. O lea la, ua aveesea ai lo latou tulaga talileleia e foliga mai sa iai. O le mea moni, sa pei ua faapuapuagatiaina faafaatusa i latou. Seʻi faalogo foi a o tautala mai le tagata mauoa:
“Loʻu tamā e, Aperaamo, ia e alofa mai i a te aʻu ma auina mai Lasalo ina ia fufui le tumutumu o lona tamatamaʻilima i le vai seʻi faamālū ai loʻu nei laulaufaiva, auā ua ou matuā tigaina lava i le mumū o lenei afi.” Na avea feau faafaamasinoga e pei o le afi a le Atua ia na folafola atu e soʻo o Iesu, ma mea na faapuapuagatiaina ai tagata o le vasega a le mauoa. Sa latou mananao i le ʻau soʻo ina ia taofia le folafolaina atu o nā feau, ina ia avatu ai sina mapusaga mo i latou mai o latou puapuaga.
“Ae na faapea atu Aperaamo, ‘Loʻu atalii e, ia manatua sa e maua mea lelei i lou olaga, ae na oo i a Lasalo mea leaga. Peitai, o lea ua faaolioliina o ia i inei, a ua puapuagatia oe. E lē gata i nei mea uma, a ua iai foi le vanu tele i lo tatou va, o lea ua lē mafai ai ona sao atu i latou o i inei o loo fia ō atu i inā, e lē mafai foi ona sao mai outou o i inā, i a i matou i inei.”
Maeu le tonu ma le alagātatau ona faia o lena suiga mataina i le va o le vasega a Lasalo ma le vasega a le mauoa! Na faataunuuina lena suiga o tulaga i ni nai masina mulimuli ane ai i le aso Penetekoso i le 33 T.A., ina ua suia le feagaiga tuai o le Tulafono i le feagaiga fou. O i inā, sa matuā manino mai ai le talileleia e le Atua o le ʻau soʻo, ae e lē o Faresaio ma isi taʻitaʻi lotu. O le “vanu tele” lea sa i le va o le tagata mauoa faafaatusa ma soʻo o Iesu, ua faaataina ai le faamasinoga amiotonu e lē masuia a le Atua.
Ona sosoo ai lea ma le talosaga atu o le tagata mauoa e faapea, “loʻu tamā e, Aperaamo: Ia e auina atu [Lasalo] i le aiga o loʻu tamā, ona e iai oʻu uso e toalima.” Na taʻutino atu ai e le tagata mauoa le iai o sana faiā e sili ona vavalalata ma se isi tamā, o ia moni lea o Satani le Tiapolo. Sa talosaga atu le tagata mauoa ina ia faamālū atu e Lasalo feau faafaamasinoga a le Atua, ina ia lē tuuina atu ai foi ona “uso e toalima,” po o ana aumea faalelotu, i “lenei nofoaga e faapuapuagatia ai.”
“A ua faapea atu Aperaamo, ‘O loo i a i latou Mose ma le ʻau Perofeta; ia latou faalogo i a i latou nei.’” Ioe, afai e mananao “uso e toalima” ina ia sosola ese mai le faapuapuagatiaina, na pau lava le mea e manaomia ona latou faia, o le utagia lea o tusitusiga a Mose ma le ʻau Perofeta o loo faailoaina mai ai Iesu o le Mesia, ona avea ai lea o i latou mona soʻo. Ae na tetee atu le tagata mauoa e faapea: “E leai, loʻu tamā e, Aperaamo, ae afai e alu atu i a i latou se tasi nai ē ua oti, o le a salamō i latou.”
Peitai, na taʻu atu i a te ia: “Afai latou te lē faalogo i a Mose ma le ʻau Perofeta, e lē mafai foi ona faatalitonuina i latou pe afai e tulai mai se tasi nai ē ua oti.” O le a lē saunia faavavega e le Atua ni faailoga faapitoa po o ni vavega e faatalitonu ai tagata. E tatau lava ona latou faitau ma faatatauina le Tusi Paia, ina ia latou maua ai lona finagalo malie. Luka 16:14-31; Ioane 9:28, 29; Mataio 19:3-9; Kalatia 3:24; Kolose 2:14; Ioane 8:44.
▪ Aisea e tatau ai ona faafaatusa oti o le tagata mauoa ma Lasalo, ma o le ā ua faaatagia i o la oti?
▪ I le amataga o le faiva a Ioane, o le ā le suiga ua faia na faaalia e Iesu?
▪ O le ā e ao ona aveesea pe a mavae le maliu o Iesu, ma e faapefea ona aafia ai i lenei mea le mataupu i le tatalaina o faaipoipoga?
▪ I le tala faatusa a Iesu, o ai ua faaataina i le mauoa ma Lasalo?
▪ O ā puapuaga na tigaina ai le mauoa, ma o ā auala na ia talosagaina ina ia latou maua ai se mapusaga?
▪ O le ā ua faaataina i le “vanu tele”?
▪ O ai le tamā moni o le tagata mauoa, ma o ai ona uso e toalima?