Mataupu 100

Le Tala Faatusa e Uiga i Mina

ATONU sa iai pea Iesu i le fale o Sakaio, lea na ia mālōlō ai a o agaʻi atu i Ierusalema. Sa talitonu ona soʻo e faapea, pe a latou oo atu i Ierusalema, o le a ia folafola atu ai o ia o le Mesia, ma faatū ai loa lona Malo i inā. Ina ia faasaʻoina lenei manatu, ma ina ia faailoa atu o loo mamao lava le oo mai o le Malo, na faamatala atu ai e Iesu se tala faatusa.

Fai mai a ia: “Na malaga se tasi alii mamalu i se nuu mamao ina ia faamautinoa ai lana pule tau tupu, i le toe foi mai ai.” O lena “alii mamalu,” o Iesu, ma o le “nuu mamao” o le lagi lea. Pe a taunuu atu Iesu i inā, o le a tuuina atu i a te ia e lona tamā le pule tau tupu.

Peitai, a o leʻi malaga ese, na valaauina ai e le alii mamalu ana auauna e toasefulu ma tuuina atu i a te i latou taitoatasi se mina siliva, ma fetalai atu: “Tou te faatau aʻi seia ou toe sau.” I le uluai faataunuuga, sa faaataina ai i auauna e toasefulu, ia uluai soʻo o Iesu. I se faatatauga lautele, ua faaatagia ai i latou uma o le a avea ma suli faatasi ma ia i le Malo faalelagi.

O mina siliva o ni tupe e tāua, sa tusa le mina e tasi ma le totogi o se tagata faifaatoaga i le tolu masina. Ae o le ā ua faaataina i mina? Ma o ā ituaiga o pisinisi sa tatau i auauna ona faia i ai?

O mina, ua faaataina ai alagaoa sa mafai ona faaaogā e soʻo faauuagagaina, ina ia maua ai nisi suli o le Malo faalelagi seia afio mai Iesu e fai ma Tupu i le Malo folafolaina. Ina ua mavae lona toetu mai ma faaali atu i ona soʻo, ona ia tuuina atu lea i a te i latou o mina faafaatusa ina ia maua atili ai nisi soʻo, ma faaopoopo atu ai i le vasega o le Malo faalelagi.

Sa faaauau ona fetalai atu Iesu, “a ua itagia o ia [le alii mamalu] e lona nuu, ua latou auina atu foi le sāvali e mulimuli atu i a te ia, ua faapea atu, ‘Matou te lē mananao i lena tagata e fai mo matou tupu.’” O tagata o le nuu, o tagata ia o Isaraelu, po o tagata Iutaia, e lē aofia ai ona soʻo. Ina ua mavae le afio aʻe o Iesu i le lagi, na faailoa atu ai e nei tagata Iutaia latou te leʻi mananao e fai o ia ma o latou tupu, e ala i lo latou sauaina o ona soʻo. I lena auala, sa latou gaoioi ai e pei o tagata o le nuu o ē na auina atu le sāvali.

Na faapefea ona faaaogaina e auauna e toasefulu a latou mina? Fai mai le faamatalaga a Iesu: “Ua toe foi mai o ia ina ua uma ona faamautinoa lana pule tau tupu, ona ia fai ane ai lea, ia valaau atu ia i auauna na ia avatu i ai tupe ia ō mai i a te ia, ina ia faamautinoa po o ā ni mea na latou maua mai i a latou gaoioiga faapisinisi. Ona sau ai lea o lē na muamua, ua faapea mai, ‘Le Alii e, o lau mina ua maua ai isi mina e sefulu.’ Ona fai atu lea o ia i a te ia, ‘Ua lelei ia, le auauna lelei e, ua e faamaoni i le mea itiiti lava, o lea ia e pule ai i aai e sefulu.’ Ua sau foi le lona lua ua faapea mai, ‘Le Alii e, o lau mina ua maua ai mina e lima.’ Ua fai atu foi o ia i lena, ‘Inā pule foi ia oe i aai e lima.’”

O le auauna na iai mina e sefulu, ua faaatagia ai se vasega, po o se vaega o soʻo, na amata mai i le aso Penetekoso o le 33 T.A., seia oo mai i le taimi nei, lea e aofia ai ma aposetolo. O auauna na iai mina e lima, ua faaatagia ai foi se vaega mai i lena lava vaitaimi, o ē sa latou faateleina mea faalelalolagi a lo latou tupu, i o latou avanoa ma tomai sa iai. Sa talaʻia ma le maelega e na vaega uma e lua le tala lelei, ma o le iuga, ua avea ai le toatele o tagata e saʻo o latou loto ma Kerisiano. O le toaiva o nei auauna, sa manuia a latou fefaatauaiga, ma faateleina ai a latou mea.

Peitai, na fetalai atili atu Iesu, “Ua sau le tasi e ese, ua faapea mai, ‘Le Alii e, o lau mina lenei, sa i a te aʻu na nonoa i le solosolo. Na ou mataʻu lava i a te oe, auā o oe o le tagata faigata; ua e avae le mea na e lē tuuina i lalo, ua e selesele foi i le saito e te leʻi luluina.’ Ona fai atu lea o ia i a te ia, ‘Le auauna leaga e, o lau upu lava ou te faasala ai i a te oe; ua e iloa lava, o aʻu o le tagata faigata, o lē avae le mea na ou lē tuuina i lalo, o lē selesele foi i le saito na aʻu lē luluina. Se ā le mea na e lē avatu ai laʻu ario i le faletupe? Po ua ou sau ona ou maua ai lea ma lona taui.’ Ona o lea, na fai atu ai o ia i ē na tutū mai, ‘Ia outou fao le mina ua i a te ia, ma avatu i lē ua iai mina e sefulu.’”

O le aveesea o le mina faafaatusa mai le auauna leaga, o lona uiga e leai sona tofi i le Malo faalelagi. Ioe, na aveesea lona faaeaga e pule ai, e pei ona sa iai i luga o aai e sefulu po o aai e lima. Ia mātau foi, sa leʻi tauleagaina le auauna ona o se mea leaga na ia faia, peitai, na i lo lea, ona o le lē taulau ona ia galue mo le faateleina o oa o le malo a lona matai.

Ina ua tuuina atu le mina a le auauna leaga i le uluai auauna, sa lāgā ai se tetee e faapea: “Le Alii e, ua i a te ia mina e sefulu.” I lea, na tali atu ai Iesu: “O lē ua iai mea, e avatu i ai; a o lē ua leai sana mea, e faoa mea ua i a te ia. Peitai, o i latou ua fai aʻu mo latou fili, sa lē mananao e fai aʻu mo latou tupu, ia outou taʻitaʻi mai i inei, ma fasioti i a te i latou i oʻu luma.” Luka 19:11-27; Mataio 28:19, 20.

▪ O le ā na mafua ai le tala faatusa a Iesu e uiga i mina?

▪ O ai le alii mamalu, ma o le ā le nuu mamao na ia alu atu i ai?

▪ O ai auauna, ma o le ā ua faaataina i mina?

▪ O ai tagatanuu, ma sa faaalia faapefea lo latou inoino?

▪ Aisea na tauleagaina ai le tasi auauna, ma o le ā le uiga o le aveesea o lana mina?