Mataupu 107

Le Tala Faatusa i le Tausamaaga o le Faaipoipoga

E ALA i ni tala faatusa se lua, sa faaalialia ai e Iesu amioga a tusiupu ma ositaulaga sili, ma na latou mananao ai e fasiotia o ia. Peitai sa leʻi taitai uma mea na fia taʻu atu e Iesu i a i latou. Ona faaauau lea ona ia taʻu atu i a i latou se isi foi tala faatusa, i lona fetalai atu:

“E tusa le malo o le lagi ma le tasi tupu ua na faia le tausamaaga mo le faaipoipoga a lona atalii; ua aauina atu e ia ana auauna e fai atu i ē na talaʻiina ia ō mai i le tausamaaga o le faaipoipoga; ae sa lē mananao i latou e ō mai.”

O Ieova le Atua o le Tupu, o lē na saunia le tausamaaga o le faaipoipoga mo lona Alo, o Iesu Keriso. Mulimuli ane, o le a aufaatasi atu i a Iesu i le lagi le faatoanofotane o ona soʻo faauuina e 144,000. O tagatanuu a le Tupu, o tagata Isaraelu ia, o ē na maua le avanoa e avea ai ma “malo o ositaulaga” ina ua aumaia i le feagaiga o le Tulafono i le 1513 T.L.M. I lena taimi, sa muai faalauteleina atu i a i latou le valaaulia i le tausamaaga o le faaipoipoga.

Ae peitai, sa leʻi auina atu le uluai valaau i a i latou na valaaulia, seia oo i le tau e afu ai mea i le 29 T.A., ina ua amataina e Iesu ma ona soʻo (auauna a le tupu) la latou galuega o le talaʻiga o le Malo. Ae o Isaraelu faaletino o ē na maua lenei valaaulia na talaʻiina atu i ai e auauna, mai le 29 T.A. e oo i le 33 T.A., sa lē mananao e ō mai. O lea na tuuina ai e le Atua i le nuu o ē na valaaulia se isi avanoa, e pei ona taʻua e Iesu:

“Ua toe aauina atu e ia nisi auauna, ua faapea atu, ‘Ia outou fai atu i ē na talaʻiina, “Faauta, ua ou saunia mea taumafa, ua fafasi aʻu povi ma aʻu manu pepeti, ua saunia foi mea uma; inā ō mai ia i le tausamaaga.”’” O lenei valaau lona lua ma o le valaau faaiʻu foi lea, i a i latou na valaaulia, sa amata i le Penetekoso e 33 T.A., ina ua liligiina ifo le agaga paia i luga o soʻo o Iesu. Sa faaauau lenei valaaulia seia oo i le 36 T.A.

Ae peitai, o le toatele lava o na tagata Isaraelu, sa latou teena foi lenei valaaulia. Na fai atu atili Iesu: “A ua latou faasāla ese mai, ua taitasi ma alu, o le tasi i lona fanua, ma le tasi i lana faatau. A o isi, ua latou pupue i ana auauna, ua faaleaga ma fasiotia.” Na faaauau faapea Iesu, “ua faalogo ai le tupu, ona matuā ita ai lea o ia; ua aauina atu e ia ana ʻau, ua faaumatia na tagata fasi tagata, ma susunu la latou aai.” Na tupu lenei mea i le 70 T.A., ina ua faaliuefuefuina Ierusalema e ʻau a Roma, ma fasiotia ai na tagata fasioti tagata.

Ona faamatala atu lea e Iesu le mea na tupu i lena taimi: “Ona fai atu ai lea o [le tupu] i ana auauna, ‘Ua saunia lava le tausamaaga, a ua lē aogā ē na talaʻiina. O lenei, ia outou ō atu i ala tele, o i latou uma tou te iloa ai, tou te talaʻi i ai le tausamaaga.’” Na faia e auauna lena mea, “ona tumu ai lea o le mea ua fai ai le tausamaaga i ē na taooto ina ia aai ai.”

O lenei galuega o le aoaoina o mālō mai i ala tele i fafo atu o le aai o i latou na valaaulia, na amata i le 36 T.A. O le taʻitaʻiʻau Roma o Konelio ma lona aiga o i latou nā o uluai tagata lē peritomeina e lē ni Iutaia na aoaoina. O le aoaoina o nei tagata e lē ni Iutaia, o i latou uma ia o ē na fai ma sui o i latou na muai teena le valaaulia, ua faaauau pea seia oo mai i lenei 20 o senituri.

Na faatumuina le potu mo le tausamaaga o le faaipoipoga a o faagasolo le senituri lona 20. Na faamatala atu e Iesu le mea na tupu, i lona fetalai atu: “Ona ulufale atu ai lea o le tupu e vaavaai atu i ē na taooto e aai ua iloa atu ai e ia o le tasi tagata ua lē ofu i le ofu o le tausamaaga. Ona fai atu ai lea o ia i a te ia, ‘Sole, pe faapefea ona e ulufale mai i inei ua lē i a te oe le ofu o le tausamaaga?’ Ona lē gagana ai lea o ia. Ona fai atu ai lea o le tupu i auauna, ‘Ia outou fusifusia ona vae ma ona lima, ma ave o ia, ma lafo i le pouliuli i fafo, e iai le taufaitagiaue ma le lilivau o nifo.’”

O le tagata sa lē iai se ofu o le tausamaaga sa faaatagia ai Kerisiano faatagāfai o Kerisinetoma. O i latou na sa lē taitai ona silafia e le Atua ua iai se faailoaga saʻo e avea ai ma Isaraelu faaleagaga. Sa leʻi faauuina i latou e le Atua i le agaga paia e avea o ni suli o le Malo. O lea na lafoina ai i latou i fafo i le pogisa ma o i inā o le a puapuagatia ai i latou i le faaumatiaga.

Na faaiʻu e Iesu lana tala faatusa i lona fetalai atu: “Auā e toatele ē ua valaaulia ae toaitiiti ē ua filifilia.” Ioe, e toatele na valaaulia mai le nuu o Isaraelu ina ia avea o ni sui o le faatoanofotane a Keriso, ae e toaitiiti Isaraelu faaletino na filifilia. O le toatele o le 144,000 o mālō, e maua le taui faalelagi, ua faamaonia e mai i tagata e lē ni Isaraelu. Mataio 22:1-14; Esoto 19:1-6; Faaaliga 14:1-3.

▪ O ai i latou na muai valaaulia i le tausamaaga o le faaipoipoga, ma o anafea na avatu ai i a i latou le valaaulia?

▪ O anafea na muai alu atu ai le valaau i a i latou na valaaulia, ma o ai auauna na faaaogaina e faailoa atu?

▪ O anafea na avatu ai le valaau lona lua, ma o ai na valaaulia mulimuli ane?

▪ O ai ua faaatagia e le tagata sa leai se ofu o le tausamaaga?

▪ O ai le toatele na valaaulia, ma le toaitiiti na filifilia?