Le Tala i se Atalii na Taase
Mataupu 86
Le Tala i se Atalii na Taase
INA ua faatoʻā uma lava ona faamatalaina atu i le ʻau Faresaio ni tala faatusa e uiga i le toe mauaina o se mamoe na leiloa atoa foi ma se tupe siliva na leiloa, na faaauau le faamatalaga a Iesu i lona taʻu atu ai foi o se isi tala faatusa. O lenei tala faatusa, e uiga i se tamā alofa ma le tausiga o lana fanau e toalua, sa tofu i laua ma ni vaivaiga matuiā.
Muamua lava, sa iai le uii, o le tagata autū lea o le tala faatusa. Na ia tāpā lona tofi, ma e aunoa ma le faatalatu sa vave ona tuuina atu i ai e lona tamā. Ona ia tuua loa lea o le aiga ma ua oo ina aafia i se olaga e sili ona lē mamā. Ae seʻi faafofoga foi a o faamatalaina e Iesu le tala, ma tagaʻi pe mafai ona e iloaina po o ai ua faaataina i tagata taitoatasi o le tala.
Na amata ona fetalai Iesu i le faapea atu: “O le tasi tagata e toalua ona atalii. Ua fai atu le uii i lona tamā, ʻLoʻu tamā e, ia e aumaia i a te aʻu loʻu tofi o le oa.’ Ona vaelua lea e [le tamā] o ana mea i a te i laua.” O le ā na faia e le uii lenei i mea sa ia mauaina?
“Mulimuli ane” e pei ona faamatala e Iesu: “Ua mavae nai aso, ona faapotopoto ai lea e le uii o mea uma, ua malaga i le nuu mamao, ma faamaimau ai ana mea i lea nuu, i se olaga soonafai.” O le mea moni, na ia faaaluina ana tupe e ola faatasi ai ma fafine talitane. Mulimuli ane ona oo mai loa lea o taimi faigata, e pei ona faaauau ona faamatalaina mai e Iesu:
“Ua uma atu ana mea, ona oge tele ai lea o le nuu; ona faatoʻā mativa ai lea o ia. Ua alu atu foi o ia ua nofo i le tasi tagata o lea nuu, ua ia auina atu foi o ia i ōna fanua e fafaga ai puaa. Sa manao foi o ia e ʻai i atigi mea na ʻaina e puaa ina ia maona ai o ia; ae leai ma se isi na ia avane sina mea i a te ia.”
Pagā se tulaga matagā ma le faalumaina o le faamalosia ina ia leoleo i meaai a puaa, talu ai o nā manu o ni manu e lē mamā e tusa ai ma le Tulafono! Ae peitai o le mea sa aupito sili ona tiga ai le uii ona o le fia ʻai lea sa māfua ai ona ia manao e ʻai i meaai a puaa. Ona o lenei mala matautia, na fetalai atu ai Iesu, “ona toe atamai ai lea o ia.”
Sa faaauau ona faamatala atu e Iesu lana tala: “Ua faapea ifo [le uii] i a te ia, ‘E lē toatele ea auauna a loʻu tamā, ua faulai ā latou areto ua totoe, a o aʻu, ou te matelaina. O le a ou tulai ma alu i loʻu tamā, o le a ou fai atu i a te ia: “Loʻu tamā e, ua ou agasala i le lagi atoa ma ou luma. Ua lē toe aogā ona taʻua aʻu o sou atalii. Ia e avea aʻu e pei o se tasi o au auauna.”’ O lea na tulai ai o ia ma alu atu i lona tamā.”
O le mea lenei e tatau ona manatunatu mamafa i ai: Ana faapea sa liliu atu lona tamā ma alaga atu ma le ita i a te ia ina ua ia tuua le aiga, semanū atonu e lē maumauai i le mafaufau o le atalii le mea e ao ona fai. Pe atonu foi o le a ia filifili e foi atu ma taumafai e saili se galuega i se isi mea i lona nuu moni ina ia lē mafai ai ona la feiloai ma lona tamā. Peitai, sa leʻi iai se manatu faapena i a te ia. Pau lava le mea sa ia manao ai o le fia oo i le aiga!
Ma le manino lava, o le tamā i le tala faatusa a Iesu sa faaatagia mai ai lo tatou Tamā faalelagi e alofa ma alofa mutimutivale, o Ieova le Atua. Ma atonu ua outou matauina mai foi, o lē na taase, po o le atalii faamaumauoa, ua faaatagia mai ai tagata sa lauiloa i le faia o agasala. O le ʻau Faresaio, lea o loo talanoa atu i ai Iesu, na latou faitioina Iesu i se taimi muamua atu, ona o lona taumafa faatasi ma i latou nei. Ae o ai ua faaataina mai ai le atalii matua?
Ina ua Maua le Atalii na Taase
Ina ua toe foi atu i le aiga o lona tamā, le atalii na taase, po o le atalii faamaumauoa o le tala faatusa a Iesu, o le ā le ituaiga o faafeiloaiga na ia maua? Seʻi faafofoga foi a o faamatalaina mai e Iesu:
“Ua iloa mamao atu foi o ia e lona tamā, ona mutimutivale ai lea o lona alofa, ua momoʻe atu ia, ua fusi i a te ia, ma sogi atu i a te ia.” Maeu se tamā alofa mutimutivale, ma le faamafanafana loto, ua matuā lelei ona faaataina ai lo tatou Tamā faalelagi, o Ieova!
Atonu sa faalogo le tamā i ni tala i le olaga soonafai sa iai lona atalii. E ui i lea, sa ia talia o ia i le aiga e aunoa ma le faatali sei faamatala auiliili mai po o le a le mea na tupu. Na iai foi i a Iesu lena agaga faafeiloai, o le tausolomua lea e faalatalata atu i ē agasala ma ao lafoga, o ē na faaataina mai e le atalii faamaumauoa i le tala faatusa.
E moni, e lē masalomia sa iai i le tamā faautauta o le tala faatusa a Iesu se manatu ua salamō lona atalii ona o le matauina o lona faanoanoa, ma le faanoʻunoʻu a o ia toe foi ane. Peitai, ona o le tausolomua o le alofa o le tamā, na faafaigofie ai i le atalii ona taʻutino atu ana agasala, e pei ona faamatala mai e Iesu: “Ua fai mai le atalii i a te ia, ‘Loʻu tamā e, ua ou agasala i Lē o i le lagi, atoa ma ou luma. Ua lē toe aogā ona taʻua aʻu o lou atalii. Ia fai aʻu o se tasi o au auauna.’”
E ui i lea, e leʻi uma atu upu a le atalii, ae gaoioi loa le tamā i le faatonuina o ana auauna e faapea: “Aumai ia le ofu tatapuvae e aupito lelei, ma faaofu i a te ia, ma ia tuu se mama i lona lima, ma faasee i ona vae. Ia aumai foi le tamai povi peti, ma fasi tatou te aai ma olioli ai, auā o loʻu atalii lenei, na oti, ua toe ola mai; na taase foi o ia a ua maua.” Ona amata lea ona “latou olioli ai.”
O le taimi lena, o loo “i le vao le atalii ulumatua” o le tamā. Seʻi vaai pe e te iloa po o ai o loo ia faaataina mai, e ala i le faafofoga atu i le isi vaega o le tala. Fai mai Iesu e uiga i le atalii ulumatua: “Ua sau ia, ua latalata mai i le fale, ona faalogo ai lea o ia i laaupese ua ta, ma le siva. Ua valaau atu ia i le tasi auauna, ua fesili atu, po o le ā le uiga o nei mea. A ua fai mai o ia i a te ia, ‘Ua sau lou uso, ua fasi foi e lou tamā le tamai povi peti, ina ua toe foi mai o ia o loo ola.’ Ona ita ai lea o ia, ua lē mafai ona ulufale atu i ai. Ona alu ane ai lea o lona tamā i fafo, ua faaoleole i a te ia. Ua tali atu foi o ia i lona tamā e faapea, ‘Faauta, ua tele tausaga o oʻu auauna i a te oe, ua leai lava sau poloaiga ua ou solia, ae e te leʻi aumai lava se tamai ʻoti ma aʻu, matou te olioli ai ma aʻu uō. Peitai o lou atalii lena, sa na faaumatia au mea faatasi ma fafine talitane, ua sau o ia, ona e fasi lea o le tamai povi peti mo ia.’”
O ai ua pei o le atalii ulumatua, sa faitio ona o le alofa mutimutivale ma manatu lelei na faaalia i ē agasala? Pe lē o tusiupu ea ma le ʻau Faresaio? Ona o a latou faitioga i a Iesu i lona taliaina o ē agasala na mafua ai lenei tala faatusa, ua mautinoa ai lava la o i latou na, sa faaataina e le atalii ulumatua.
Na faaiuina e Iesu lana faamatalaga ina ua talosaga atu le tamā i lona atalii ulumatua e faapea: “Atalii e, ta te nonofo pea ma oe, o aʻu mea uma foi o āu ia; ae e tatau ona tatou fiafia ma olioli, auā o lou uso lena na oti, a ua toe ola mai, na taase foi a ua maua.”
Sa tuu ai faapena e Iesu e leʻi taʻu maia le mea na faia mulimuli ane e le atalii ulumatua. Ae i se taimi mulimuli ina ua mavae le maliu ma le toetu mai o Iesu, na “anaana ai faitaulaga e toatele lava i le faatuatua,” ma atonu sa aofia ai ma nisi o le vasega a le “atalii ulumatua” o ē na fetalai atu i ai Iesu i lena taimi.
Ae o ai i aso nei o loo faaataina mai i atalii e toalua? E ao ona avea i latou ia o ē ua matuā lava le iloa e uiga i fuafuaga a Ieova, e faavae ai lo latou ulu atu i se faiā ma ia. Ua faaataina e le atalii ulumatua nisi o sui o le “lafu mamoe itiiti,” po o le “faapotopotoga a le ʻau ulumatua o ē ua tusia i le lagi.” Na i a i latou na se uiga e tāli tutusa ma le uiga lea sa i le atalii ulumatua. Sa leai so latou faanaunauga e taliaina le vasega faalelalolagi, o “isi mamoe,” o ē sa latou manatu ua faatauaina naʻuā.
I le isi itu, o le atalii faamaumauoa, ua faaataina ai tagata o le Atua o ē ua toe foi atu ma olioli ai i fiafiaga ua ofoina mai e le lalolagi. Peitai, a o faagasolo le taimi, sa toe foi mai ma le salamō i latou ia ma toe avea ma auauna maelega a le Atua. O le mea moni, maeu le alofa mutimutivale o le Tamā i a i latou o ē latou te iloa lo latou manaoga mo le faamagaloga ma toe foi atu ai i a te ia! Luka 15:11-32; Levitiko 11:7, 8; Galuega 6:7; Luka 12:32; Eperu 12:23; Ioane 10:16.
▪ O ai na faamatala atu i ai e Iesu lenei tala faatusa, po o lenei tala, ma aisea?
▪ O ai le tagata autū i le tala, ma o le ā na tupu i a te ia?
▪ O ai i ona po o Iesu sa faaataina mai e le tamā ma le uii?
▪ Sa faataitaia faapefea e Iesu i lana tala faatusa le faaaoaoga a le tamā alofa mutimutivale?
▪ O le ā le manatu o le atalii ulumatua i le faafeiloaiga o lona uso, ma sa amioai faapefea le ʻau Faresaio e pei o le atalii ulumatua?
▪ O le ā le faatatauga o le tala faatusa a Iesu i o tatou aso?