Le Talisuaga Afiafi o le Faamanatuga
Mataupu 114
Le Talisuaga Afiafi o le Faamanatuga
INA ua uma ona mulumulu e Iesu vae o ona aposetolo, ona ia sii atu lea o le mau i le Salamo 41:9, i lona fetalai atu: “O lē ʻai faatasi ma aʻu ua aa mai o ia i a te aʻu i lona mulivae.” Ona o le atuatuvale o lona loto, na ia faapea atu ai: “E faalataina aʻu e so outou.”
Ona amata lea ona tiga le au aposetolo ma taitasi ma faapea atu i a Iesu: “O aʻu ea?” E oo lava i a Iuta le Sekara na fesili atu foi. A o Ioane, o lē sa taoto latalata atu i a Iesu i le laulau, na faalagolago atu i le fatafata o Iesu ma fesili atu: “Le Alii e, o ai ea?”
Na tali atu Iesu: “O le tasi o le toatinoagafulu ma le toalua, o lē fufui faatasi nei o ma lima i le tanoa. E moni, e alu lava le Atalii o le tagata e pei ona tusia i a te ia; a o le tagata na te faalataina le Atalii o le tagata oi talofa i a te ia! e lelei i lea tagata pe ana lē fanau mai o ia.” Ina ua mavae lena, ona toe ulu foi lea o Satani i a Iuta, na faaaogā le avanoa sa i le loto o Iuta, lea na oo ina leaga. Mulimuli ane i lena po, na taʻua ai ma le talafeagai e Iesu Iuta o le “tagata o le malaia.”
Na taʻu atu e Iesu i a Iuta: “O le mea e te faia, ia vave ia ona fai.” E leai se isi o le au aposetolo sa malamalama i le uiga o le fetalaiga a Iesu. Na tau mānatu nisi faapea talu ai ona sa i a Iuta le pusa tupe, o lea na fetalai atu ai Iesu i a te ia: “Inā faatau mai ia ni mea e tatau i a te i tatou i le tausamiga,” pe avatu ai se mea i ē matitiva.
Ina ua alu ese Iuta, ona faailoa atu lea e Iesu se faamanatuga matuā fou lava, po o le faamanatuina, faatasi ma lona au aposetolo faamaoni. Sa tago o ia i le areto, ua tatalo faafetai, ua tofitofi, ma avatu i a i latou, ua fetalai atu: “Inā fetagofi ia, inā aai.” Na ia faamatala atu foi: “O loʻu tino lenei, ua foaiina atu mo outou; tou te faia le mea nei e fai ma faamanatuga i a te aʻu.”
Ina ua uma ona aai e i latou taitoatasi le areto, ona tago lea o Iesu i le ipu o le uaina, e foliga o le ipu lona fa lea na faaaogā i le sauniga o le Paseka. Na ia faia foi le tatalo faafetai mo lea mea, tufatufa atu i a i latou, na fetalai atu i a i latou ina ia inu i le ipu, ma fetalai atu: “O lenei ipu o le feagaiga fou lea i loʻu toto, ua faamaligiina mo outou.”
O le mea moni, o le faamanatuga lena o le maliu o Iesu. Sa tatau ona faia pea lava pea i tausaga taitasi i a Nisani 14, e pei ona taʻua e Iesu, e fai ma faamanatuga i a te ia. O le a manatua ai e i latou o le a faamanatuina, le mea na faia e Iesu ma lona Tamā faalelagi ina ia saunia ai le faasaoina mo le fanau a tagata mai le faasalaina i le oti. Mo tagata Iutaia o ē sa avea ma soʻo o Keriso, o le faamanatuga o le a suia ai le Paseka.
O le feagaiga fou, lea sa aogā ona o le toto masaa o Iesu, na suia ai le feagaiga tuai o le Tulafono. Ua puluvagaina e Iesu Keriso i le va o itu e lua—i le isi itu, o Ieova le Atua, ma i le isi itu, o le 144,000 o Kerisiano fanauagagaina. E lē gata ina saunia mo le faamagaloga o agasala, ae sa faaavanoaina ai foi e le feagaiga le faatūina o se malo faalelagi o tupu ma ositaulaga. Mataio 26:21-29; Mareko 14:18-25; Luka 22:19-23; Ioane 13:18-30; 17:12; 1 Korinito 5:7.
▪ O le ā le valoaga faale-Tusi Paia na sii mai e Iesu e faatatau i se aumea, ma o le ā le faatatauga na ia faia o lea mea?
▪ Aisea na matuā tiga ai le au aposetolo, ma o le ā na fesili atu ai i latou taitoatasi?
▪ O le ā na taʻu atu e Iesu i a Iuta e fai, ae sa faapefea ona faauiga e isi aposetolo na faatonuga?
▪ O le ā le faamanatuga na faailoa atu e Iesu ina ua uma ona alu ese Iuta, ma mo le ā le fuafuaga na ia faia ai?
▪ O ai itu e lua o le feagaiga fou, ma o le ā na faataunuuina ona o lea feagaiga?