Le Talisuaga ma se Faresaio
Mataupu 76
Le Talisuaga ma se Faresaio
INA ua uma ona tali atu Iesu i tagata faitio o ē sa fesiligia le puna o lona mana na faamalolo ai le tagata sa gūgū, ona valaaulia lea o ia e se Faresaio mo se taumafataga. Sa masani ona faia e Faresaio le tu, o le fafano o o latou lima e oo i o latou tulilima a o leʻi taumamafa i latou. Latou te faia lenei mea a o leʻi taumamafa, ma pe a uma foi le taumafataga pe i le va o taumafataga. E ui ina sa lē solia e lena tu le tulafono tusia a le Atua, ae sa sili atu lea faiga i le mea sa manaomia e le Atua mai le mataupu o le tumamā i sauniga faalelotu.
Ina ua lē faia e Iesu lena tu, sa ofo lē na talimalo i a te ia. E ui ina atonu sa leʻi faaleoina ane lona ofo, ae sa silafia lava e Iesu, ma fetalai atu ai e faapea: “Outou Faresaio, ua outou faamamāina le tua o le ipu ma le tanoa, ae o totonu o outou ua tutumu i mea ua faoa ma le amioleaga. Tagata valea e! O lē na faia le tua, pe na te leʻi faia ea foi ma totonu?”
O lea na faaalialia ai e Iesu le faafiaamiotonu o le au Faresaio o ē na fai ma a latou tu le fufulu o o latou lima, ae e lē mafai ona faamamāina o latou loto mai amioga leaga. Na ia fautua atu e faapea: “Ia outou foai atu meaalofa mai totonu o outou, faauta foi! e mamā ai mea uma o i a te outou.” Sa tatau ona latou foai atu mai le loto alofa, ae e lē i se faanaunauga ina ia faaofo ai isi i o latou uiga faafiaamiotonu.
Sa faaauau ona fetalai atu Iesu: “Oi talofa i a te outou Faresaio, auā ua outou avatu mea e sefuluai le mili, ma le pekano, ma laau uma e afu, a ua tuua e outou le faamasinoga tonu ma le alofa i le Atua! O mea ia sa tatau ona outou faia, ae aua foi le tuua isi mea na.” O le Tulafono a le Atua i a Isaraelu, sa manaomia ai ona totogi atu le sefuluai, po o mea e sefuluai mea, o fua o le laueleele. O le mili ma le pekano o laau iti ia sa faaaogā e faamanogi ai mea taumafa. Sa totogi atu ma le faaeteete e le au Faresaio le sefuluai e oo lava i nei laau iti faatauvaa, peitai sa tausalaina i latou e Iesu ona o lo latou lē amanaia o mea e aupito sili ona tāua sa manaomia, o le faaalia lea o le alofa, le agalelei, ma le amio maulalo.
I le tausalaina atili o i latou, na fetalai atu ai Iesu: “Oi talofa i a te outou Faresaio, auā ua outou mananao i nofoa sili i sunako ma ia alofaina i malae! Oi talofa i a te outou, auā ua tutusa outou ma tuugamau e lilo, e savavali ai foi tagata i luga, a ua lē iloa e i latou.” E lē o iloa atu lo latou lē mamā. Na faaalia e le lotu a le au Faresaio uiga e faaaliali atu i fafo ae e lē o iai se aogā! Sa faavaeina i lo latou faafiaamiotonu.
I le faalogologo atu i lenei tausalaina, na faitio atu ai se lōia, o se tasi e tomai i le Tulafono a le Atua e faapea: “Le aʻoaʻo e, i lou taʻua o nei mea, ua e faaleaga ai foi i a te i matou.”
Sa tuuaia foi e Iesu na tagata tomai i le Tulafono e faapea: “Oi talofa i a te outou le au aʻoaʻo tulafono! Auā ua outou faaee atu avega mamafa i tagata, a o outou tou te lē papaʻi lava i na avega i so outou tamatamai lima! Oi talofa i a te outou, auā ua outou fausia tuugamau o perofeta; ae na fasiotia i latou e o outou tamā!”
O avega na sa taʻua e Iesu, o uputuu tuugutu ia, ae sa leʻi faia e na lōia se mea e tasi e faamāmā ai nei tulafono mo tagata. Na faaalia faapea e Iesu, sa oo lava ina latou loto malilie e fasiotia perofeta, ma na ia lapatai atu ai e faapea: “ʻO toto o perofeta uma lava ua faamaligiina talu mai ona faavaeina o le lalolagi, [o le a] tauia lea i lenei tupulaga; e afua mai i le toto o Apelu e oo atu i le toto o Sakaria, o lē na fasiotia i le va o le fata faitaulaga ma le malumalu.’ E moni, ou te fai atu i a te outou, e tauia lava ia i lenei tupulaga.”
Na amata le lalolagi o tagata o ē e mafai ona togiolaina ina ua faia le fanau a Atamu ma Eva; o lea sa ola ai Apelu talu mai ona “faavaeina o le lalolagi.” Ina ua mavae le fasiotia faataugā o Sakaria, sa ō ane ai autau a Asuria ma faatafunaina Iuta. Peitai sa valoia e Iesu se isi faatafunaga e sili ona leaga o lana lava tupulaga, ona o le tetele o lo latou amioleaga. Na tupu lenei faatafunaga i le tusa ma le 38 tausaga mulimuli ane ai, i le 70 T.A.
I le faaauauina o lana tausalaina, na fetalai atu ai Iesu: “Oi talofa i a te outou le au aʻoaʻo tulafono! auā ua aveesea e outou le ki o le malamalama; tou te lē ulu atu i ai outou, ma ua outou vavao foi i ē a ulu atu i ai.” Sa iai i na tagata tomai i le Tulafono, le tiute o le faamatalaina atu o le Afioga a le Atua i tagata, ma ia faamalamalamaina lona uiga. Peitai, latou te leʻi faia faapena, ma sa latou faasaina foi tagata mai le malamalama i ai.
Na matuā feita lava le au Faresaio ma ē tomai i le tulafono i a Iesu ona o le faaalialia o a latou mea sese. Ina ua ia tuua le fale, sa amata ona latou matuā tetee i a te ia ma tuʻi i a te ia i fesili. Sa latou taumafai e maileia o ia ina ia fetalai ane i se upu e mafai ai ona latou molia o ia. Luka 11:37-54; Teuteronome 14:22; Mika 6:8; 2 Nofoaiga a Tupu 24:20-25.
▪ Aisea na tausalaina ai e Iesu le au Faresaio ma ē tomai i le Tulafono?
▪ O ā avega na faaee atu e lōia i tagata?
▪ O anafea na ‘faavaeina ai le lalolagi’?