Mataupu 6

Le Tama o le Folafolaga

NA I LO o le toe foi i Nasareta, sa nonofo ai pea Iosefa ma Maria i Peteleema. Ma ina ua valu aso le matua o Iesu, sa peritomeina loa o ia e tusa ma poloaiga o le Tulafono a le Atua i a Mose. Sa foliga mai o se tu foi le faaigoaina o se tama tane i lona valu o aso. O lea, na la faaigoaina ai le la tama i a Iesu, e pei ona muai faailoa atu e le agelu o Kaperielu.

Ua silia i le masina, ma ua 40 foi aso le matua o Iesu. O fea la na ave i ai o ia e ona mātua? I le malumalu i Ierusalema, lea e na o ni nai maila le mamao ese mai le mea sa latou nonofo ai. E tusa ai ma le Tulafono a le Atua i a Mose, a 40 aso talu ona fanau mai se tama, e manaomia ona ofoina atu e le tinā se taulaga mo le faamamāina i le malumalu.

O le mea lena sa faia e Maria. Na ia aumaia ni tamai manulele se lua e fai ma ana taulaga. Sa faaalia ai i lea, se mea e uiga i le tulaga tau tamaoaiga o Iosefa ma Maria. Ua taʻua i le Tulafono a Mose, e ao ona ofoina atu se tamai mamoe, auā e sili lona tāua na i lo o manulele. Ae afai e lē gafatia e le tinā, ona lava lea o ni tamai manutagi se lua, po o ni tamai lupe se lua.

A o iai i le malumalu, sa sapasapaia ai Iesu e se toeaina. O lona igoa o Simeona. Na faailoa atu i ai e le Atua e faapea, o le a lē oti o ia seʻi vaganā ua ia vaai i le Keriso folafolaina po o le Mesia a Ieova. Ina ua sau Simeona i le malumalu i lea aso, sa taitaiina o ia e le agaga paia i le tamaitiiti o loo sii e Iosefa ma Maria.

A o sapai e Simeona Iesu, sa ia faafetai atu i le Atua e faapea: “Le Alii e, e te tuuina atu nei lau auauna ia alu ma le manuia, e pei o lau afioga; auā ua iloa e oʻu mata le faaolataga mai i a te oe, ua e saunia i luma o nuu uma lava; o le malamalama e faamalamalama aʻi nuu ese, ma le mamalu o lou nuu o Isaraelu.”

Na matuā ofo Iosefa ma Maria ina ua la faalogo i lenei mea. Ona faamanuia atu lea o Simeona i a te i laua ma ua fai atu i a Maria, “ua tuu le tama nei e pauu ma toe tutū ai tagata e toatele o i Isaraelu” ma o le a tuia foi lona loto i le faanoanoa, e pei o se pelu maai.

Sa iai i lea taimi le perofeta fafine ua 84 ona tausaga e igoa i a Ana. O le mea moni, sa iai pea o ia i le malumalu i taimi uma. I lena lava itu aso sa ia faalatalata ane ai ma amata ona faafetai atu i le Atua ma faailoa atu Iesu i a i latou uma o ē na fia faalogologo.

Maeu le fiafia o Iosefa ma Maria i nei mea na tutupu i le malumalu! E mautinoa, o na mea uma sa faamautuina ai i a te i laua e faapea, o le tamaitiiti lenei o Lē na Folafolaina mai e le Atua. Luka 2:21-38; Levitiko 12:1-8.

▪ E tusa i le aganuu a Isaraelu o fea le taimi sa faaigoa ai se tama tane?

▪ O le ā sa manaomia ona faia e se tinā Isaraelu pe a oo ina 40 aso le matua o sana tama tane, ma sa faapefea i le faataunuuina o lenei manaoga ona faaalia ai le tulaga tau tamaoaiga o Maria?

▪ O ai sa matauliaina Iesu i lena taimi, ma sa faapefea ona la faaalia atu?