Mataupu 15

Le Uluai Vavega a Iesu

UA FAATOʻĀ tasi pe lua aso talu ona avea Aneterea, Peteru, Ioane, Filipo, Natanielu, atonu foi ma Iakopo, ma uluai soʻo o Iesu. Ae ō atu loa i latou nei i o latou aiga i le itumalo o Kalilaia, lea sa latou tutupu uma aʻe ai. Sa faamautu i latou i Kana, le nuu moni o Natanielu, e tu i atumauga e lē mamao ese mai Nasareta, le aai sa soifua aʻe ai Iesu. Na valaaulia i latou i le tausamaaga o se faaipoipoga i Kana.

Sa auai foi le tinā o Iesu i le faaipoipoga. Ona o ia o se uo a le aiga o i laua ia sa faaipoipo, e foliga mai ai sa aafia Maria i le tautuaina o manaoga o le toatele o mālō. O lea, sa vave ai ona ia iloa e iai se mea ua uma, lea na ia taʻuina atu i a Iesu e faapea: “Ua leai sa latou uaina.”

Ina ua fautua atu Maria i a Iesu e faia se gaoioiga i le uaina ua uma, sa faatautu muamua Iesu. Ma ua ia fesili atu: “Se ā ea lau na i a te aʻu?” Ona o ia o le Tupu tofia a le Atua, sa lē tau faatonuina ai le faiga o lana galuega e lona aiga ma ana uo. O lea, sa tuu atu ai ma le atamai e Maria le mataupu i lana tama, i le na ona faapea atu i a i latou sa tautua: “So o se mea lava e fai mai ai o ia i a te outou, ia outou faia.”

Sa iai faguele tetele e ono e utu ai vai, e mafai ona utu i ai kalone e sili atu i le sefulu i le fagu e tasi. Ua fetalai atu Iesu i ē tautua: “Inā faatutumu ia o faguvai i suavai.” Ona faatutumuina ai lea e le au tautua o faguvai ua oo lava i augutu. Ua fetalai atu Iesu: “Inā asu ane ia, ma ave i le pule o le tausamaaga.”

Na matuā ofo le pule o le tausamaaga ona o le manaia o le uaina, ae na te leʻi iloa sa saunia faavavega. Ona ia valaau atu lea i le faatoafaiavā, ua faapea atu: “E muamua ona aumai e tagata uma le uaina lelei; pe a tele foi le inu i ai o tagata, ona aumai ai lea o le uaina leaga; a ua tuu e oe le uaina lelei, ua oo mai i lenei itu aso.”

O le uluai vavega lena a Iesu, ma ina ua latou vaai i ai, sa faamalosia ai le faatuatua o ona soʻo fou. Mulimuli ane, ona latou malaga faatasi atu ai lea ma lona tinā ma ona ʻafa uso i le aai o Kapanaumi e latalata i le Sami o Kalilaia. Ioane 2:1-12.

▪ O le ā le vaitaimi o le faiva a Iesu sa faia ai le faaipoipoga i Kana?

▪ Aisea na tetee atu ai Iesu i le fautuaga a lona tinā?

▪ O le ā le vavega sa faia e Iesu, ma o le ā le iuga na oo ai i isi?