Mataupu 27

Le Valaauina o Mataio

INA ua mavae le faamaloloina o le supa, ona maliu ese lea o Iesu mai Kapanaumi ae agaʻi atu i le Sami o Kalilaia. Na toe lolofi ane foi le motu o tagata i a te ia, ma ua ia aʻoaʻoina i latou. A o savali ane pea o ia, sa ia iloa atu Mataio, o lē na igoa foi i a Levi, o loo nofo mai i le ofisa o lafoga. Ua valaaulia o ia e Iesu e faapea: “Inā mulimuli mai ia i a te aʻu.”

E foliga mai, sa masani Mataio i aʻoaʻoga a Iesu, e pei foi o Peteru, Aneterea, Iakopo ma Ioane ina ua valaauina i latou. Ma sa talia loa lava e Mataio le valaaulia, e pei foi o i latou na. Ua tulai o ia, ae tuua ana avega tauave o se ao lafoga, a ua mulimuli atu i a Iesu.

Mulimuli ane, ona faia lea e Mataio o se faigaai tele i lona fale, atonu e sami ai le taliaina o lona valaaulia. E lē gata ina sa auai Iesu ma Ona soʻo, ae faapena foi uluai aumea a Mataio. Sa masani ona itagia nei tamaloloa e o latou uso Iutaia, ona o lo latou aoina o lafoga mo taʻitaʻi inosia o Roma. E lē gata i lea, ae sa fai soo lo latou lē faamaoni i le tagisiaina o tupe faasili mai tagata na i lo o lafoga masani.

Ina ua vāai o faatasi Iesu ma ia tagata i le faigaai, sa fesili ane ai le au Faresaio i ona soʻo e faapea: “Se ā le mea ua aai faatasi ai lo outou aʻoaʻo ma telona, atoa ma ē agasala?” Ina ua ia lagona ane le fesili, sa tali atu loa Iesu i le au Faresaio: “E lē aogā le fomai i ē malōlō, na o ē mamai. Inā o ia, ma saili po o le ā le uiga o lenei upu, ‘Ou te loto i le alofa, ae e lē o le taulaga.’ Auā ou te leʻi sau e valaau i tagata amiotonu, a o ē agasala.”

Atonu, sa valaaulia e Mataio nei tagata ao lafoga i lona fale ina ia mafai ai ona latou faalogologo i a Iesu ma faamaloloina ai i latou i le itu faaleagaga. O lea la na faatasi atu ai Iesu e fesoasoani i a te i latou, ina ia maua se faiā lelei ma le Atua. Sa leʻi inoino Iesu i na tagata, e pei ona faia e le au Faresaio faafiaamiotonu. Na i lo lea, i le uunaia e le alofa, sa avea ai o ia ma fomai faaleagaga mo i latou.

O le faaalia la e Iesu o le alofa mutimutivale i ē agasala, e lē o se faamolemolega lea mo a latou agasala ae o se faailoaga lea o lagona mafana foi ia na ia faaalia i tagata sa mamai faaletino. Mo se faaaoaoga, ia manatua foi lona paʻi atu ma le tiga alofa i le tagata lepela, ma faapea atu: “Ou te loto i ai. Inā mamā ia oe.” Seʻi faapena foi ona tatou faaalia le alofa mutimuti vale e ala i le fesoasoani atu i manaoga o tagata, ae maise lava le fesoasoani atu i a te i latou i le itu faaleagaga. Mataio 8:3; 9:9-13; Mareko 2:13-17; Luka 5:27-32.

▪ O fea na iai Mataio ina ua iloa atu o ia e Iesu?

▪ O le ā le galuega a Mataio, ma aisea na inosia ai na tagata e isi Iutaia?

▪ O le ā le faitioga sa faia i a Iesu, ma sa faapefea ona ia tali atu i ai?

▪ Aisea na aufaatasi ai Iesu ma ē agasala?