Mataupu 16

Maelega mo le Tapuaiga a Ieova

O ʻAFA uso o Iesu—o isi fanau tama a Maria—o Iakopo, Iosefa, Simona, ma Iuta. A o leʻi ō atu uma i latou nei ma Iesu ma ona soʻo i Kapanaumi, o se aai e latalata ane i le Sami o Kalilaia, atonu sa afe ifo i latou i lo latou aiga i Nasareta ina ia mafai ai ona tapena ni mea latou te manaomia.

Ae aisea na maliu atu ai Iesu i Kapanaumi ae lē faaauau ai pea lana faiva i Kana, i Nasareta, po o se isi nofoaga i mea maupuepue o Kalilaia? O se tasi o mafuaaga, ona sa sili atu le tautaua o le nofoaga na tu ai Kapanaumi, ma e mautinoa o se aai e telē. E lē gata i lea, o le toatele o soʻo fou o Iesu, sa nonofo i Kapanaumi pe sa nonofo latalata ane foi i ai, o lea sa lē tau tuua ai e i latou o latou aiga ae ō atu ina ia aʻoaʻoina e ia.

A o nofo o ia i Kapanaumi, sa faia e Iesu ni galuega ofoofogia, e pei ona ia faaalia mai i ni masina mulimuli ane. E leʻi pine, ae toe malaga ese foi Iesu ma ana uo. O le taimi lea, o le tau e totogo ai mea, ma sa malaga atu i latou i Ierusalema ina ia auai i le Paseka o le 30 T.A. A o latou iai i inā, sa vaaia ai e ona soʻo se mea e uiga i a Iesu, atonu latou te leʻi vāai muamua lava i ai.

E tusa ai ma le Tulafono a le Atua, sa manaomia ona faia e Isaraelu ni taulaga i manu. O lea, ina ia faigofie mo i latou, sa faatau atu ai e tagata faatauoloa o Ierusalema ni manu vaefa ma manu felelei mo lea fuafuaga. Ae sa latou faatauina atu ia mea i totonu o le malumalu, ma sa gāoi i latou ona o le soona faataugata o a latou oloa.

Ona o lona toatamai tele, sa faia ai e Iesu se sasa i maea, ma tutuli ai i fafo le au faatauoloa. Na ia sasaaina foi tupe a le au talatupe ma tafuli ese a latou laulau. Ua alaga atu o ia i le au faatau lupe: “Ave ese ia nei mea! Aua le faia le fale o loʻu Tamā ma fale faatauoa.”

Ina ua vaaia e soʻo o Iesu lena mea, ona latou manatua ai lea o le valoaga e uiga i le Alo o le Atua e faapea: “Ua ʻaina lava aʻu i le maelega i lou fale.” Ae sa fesili atu tagata Iutaia: “Se ā se faailoga e te faailoa mai i a te i matou, ua e faia ai nei mea?” Na tali atu Iesu: “Inā lepeti ia i lalo o lenei malumalu, ona ou toe faia lea i aso e tolu.”

Sa manatu tagata Iutaia o loo fetalai atu Iesu e uiga i le malumalu faitino, o lea na latou fesili ane ai: “E fagafulu ma le ono o tausaga o fai lenei malumalu, pe e te toe faia foi e oe i aso e tolu?” Peitai, sa fetalai atu Iesu e uiga i le malumalu, o lona tino. Ma i le tolu tausaga mulimuli ane, sa manatuaina ai e ona soʻo le uiga o lana fetalaiga ina ua toe faatuina mai o ia nai le oti. Ioane 2:12-22; Mataio 13:55; Luka 4:23.

▪ Ina ua uma le faaipoipoga i Kana, o ā nofoaga sa malaga atu i ai Iesu?

▪ Aisea na toatamai ai Iesu, ma o le ā sa ia faia?

▪ O le ā sa manatua e soʻo o Iesu ina ua latou vaaia ana gaoioiga?

▪ O le ā sa fetalai atu ai Iesu e uiga i “lenei malumalu,” ma o le ā sa ia faauigaina i ai?