Mai i a Pilato i a Herota ma Toe Foi atu i a Pilato
Mataupu 122
Mai i a Pilato i a Herota ma Toe Foi atu i a Pilato
E UI lava sa leʻi taumafai Iesu e natia mai i a Pilato le avea o ia ma tupu, ae na ia faamalamalama atu faapea o lona Malo sa lē o se faamataʻu i a Roma. Na taʻu atu e Iesu: “E lē mai le lalolagi nei loʻu malo. Afai ana mai le lalolagi nei loʻu malo, po ua tau aʻu auauna ina ia lē tuuina atu aʻu i a Iutaia; a o lenei, e lē mai i inei loʻu malo.” I lea sa faailoa faatolu atu ai e Iesu faapea e iai sona Malo, e ui lava e lē pogai mai i le lalolagi.
Peitai, na uunai atili atu o ia e Pilato: “O lena foi, e te se tupu ea oe?” O lona uiga, pe o oe o se tupu, e ui lava e lē mai le lalolagi nei lou Malo.
Sa faailoa atu e Iesu i a Pilato lona faia o le faaiʻuga saʻo, i lona tali atu: “O oe lava lenā ua e fai mai o aʻu o le Tupu. O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i loʻu leo.”
Ioe, o le fuafuaga moni lava o le iai o Iesu i le lalolagi, ina ia molimau atu i “le upu moni,” e faapitoa lava i le upu moni e uiga i lona Malo. Sa nofo sauni Iesu e faamaoni i lena upu moni e tusa lava pe sa iu ina maliu ai. E ui lava na fesili atu Pilato: “Po o le ā le upu moni?” ae sa leʻi faatali o ia mo se isi faamatalaga atili. Na lava mea na ia faalogo i ai e tuuina atu ai se faamasinoga.
Sa toe foi atu Pilato i le motu o tagata sa faatali i fafo o le maota. E foliga mai sa ō atu faatasi ma Iesu, ma na ia taʻu atu ai i ositaulaga sili ma ē na faatasi ma i latou: “Ou te lē iloa se mea e sala ai lenei tagata.”
I le feitai ona o le faaiuga, na amata ai ona finau maumauai atu le motu o tagata: “Ua faaoso e ia i le nuu, ua aʻoaʻo i Iutaia uma, ua afua mai i Kalilaia ua oo mai i inei.”
Atonu na maofa Pilato i le maelega valea o tagata Iutaia. O lea a o faaauau ona alalaga mai ositaulaga sili ma toeaina, sa liliu Pilato ma fesili atu i a Iesu: “Ua e lē faalogo ea i le tele o mea ua latou molimau mai ai i a te oe?” E leai se tali atu a Iesu. O le toʻafilemu i ona fofoga a o fesagaʻi ma tuuaʻiga matuiā na matuā maofa ai Pilato.
Ina ua iloaina o Iesu o le Kalilaia, na maua ai e Pilato se auala na te lē faia ai le faamasinoga o Iesu. Sa iai le pule o Kalilaia, o Herota Anetipa (le atalii o Herota le Sili), i Ierusalema mo le Paseka, o lea na auina atu ai e Pilato Iesu i a te ia. Muamua atu, na vavae ai e Herota Anetipa le ao o Ioane le Papatiso, ma sa fefe Herota ina ua ia faalogo i galuega mamana na faia e Iesu, i le mataʻu faapea o Iesu o Ioane moni lava lea o lē na toe faatuina mai nai ē ua oti.
O lea, na matuā olioli ai Herota i le faamoemoe e vaai i a Iesu. O lena mea sa lē ona o lona manatu mamafa i se lelei mo Iesu pe faapea sa manao o ia ina ia faia se taumafaiga moni e aʻoaʻoina ai pe moni tuuaʻiga faasaga i a te ia pe leai. Na i lo o lea, sa na ona ia naunau e fia iloa ma faamoemoe e vaai i a Iesu o faia ni vavega.
Ae peitai, sa musu Iesu e faamalie le naunau fia iloa o Herota. O le mea moni, a o tuufesili Herota i a te ia, sa leʻi tali atu Iesu i se upu. Ona o le lē fiafia, na ula ai Herota ma ana fitafita i a Iesu. Sa latou faaofu o ia i se ofu iila ma faaamuamu ma tauemu i a te ia. Ona latou toe auina atu lea o ia i a Pilato. O le iuga, na oo ai ina uō mamae Herota ma Pilato o ē sa muai avea o ni fili.
Ina ua toe foi atu Iesu, ona valaaulia lea e Pilato o ositaulaga sili, o taʻitaʻi Iutaia, ma tagata ina ia potopoto faatasi ane ma faapea atu: “Ua outou aumai lenei tagata i a te aʻu, e peiseai se faasese i le nuu; faauta mai foi, ua ou suesue i a te ia i o outou luma, ou te leʻi iloa se mea e sala ai lenei tagata i mea ua outou molia mai ai i a te ia. A ua lē iloa foi e Herota; auā na ia toe auina mai o ia i a te i tatou; faauta foi e leai se mea ua faia e ia e tusa ai ona oti o ia. O lenei foi, ou te aʻoaʻi atu i a te ia, i le ou tatalaina atu ai.”
O lea, sa faalua ona taʻu atu e Pilato le leai o se sala a Iesu. Na naunau o ia ina ia faasaoloto i a te ia, auā sa ia iloa ona o le matauʻa na ala ai ona tuuina atu o ia e ositaulaga sili. Ae a o faaauau ona taumafai Pilato ina ia tatalaina Iesu, sa ia maua se tasi uunaiga malosi atili ina ia faia faapea. A o iai o ia i lona nofoa faamasino, sa auina atu e lana avā se feau, e timai atu i a te ia: “Neʻi e mao i lea tagata amiotonu; auā na ou matuā tigaina analeila i le miti [e foliga mai o se timaiga mai le Atua ona o Iesu].”
Peitai, e mafai faapefea e Pilato ona tatala lenei tagata lē sala, e pei ona ia iloa e ao ona ia faia faapea? Ioane 18:36-38; Luka 23:4-16; Mataio 27:12-14, 18, 19; 14:1, 2; Mareko 15:2-5.
▪ Sa faapefea ona taliina e Iesu le fesili faatatau i lona tulaga tautupu?
▪ O le ā “le upu moni” lea na faaaluina ai e Iesu lona soifuaga faalelalolagi ina ia avatu ai le molimau?
▪ O le ā le faamasinoga a Pilato, o le ā le tali a tagata, ma o le ā sa faia e Pilato i a Iesu?
▪ O ai Herota Anetipa, aisea na matuā olioli ai o ia e vaai i a Iesu, ma o le ā na ia faia i a te ia?
▪ Aisea na naunau ai Pilato e faasaoloto i a Iesu?