Na A‘oa‘o atu Iesu i Ieriko
Mataupu 99
Na Aʻoaʻo atu Iesu i Ieriko
E LEʻI pine ae taunuu loa Iesu ma le motu o tagata sa latou malaga faatasi i Ieriko, o se aai e tusa ma se aso e malaga atu ai mai Ierusalema. E foliga mai o Ieriko o se aai e lua ni ona vaega, ona sa tusa o le maila [po o le tasi ma le ʻafa kilomita] le mamao ese o le aai tuai o Iutaia mai le aai fou o Roma. A o ō ese atu le motu o tagata mai le aai tuai, ae faasolo atu i le aai fou, e toalua ni tagata tauaso ʻaisi na faalogo ane i le vavaō. O le tasi o i laua e igoa i a Patimaio.
Ina ua la iloaina o Iesu lea e malaga ane, ona alalaga atu lea o Patimaio ma lana uō e faapea: “Le Alii e, le Alo o Tavita, ia e alofa mai i a te i maʻua!” Ina ua faatonuina i laua e le motu o tagata ina ia aua le pisa, na atili ai ona la alalaga atu ma le leo tetele e faapea: “Le Alii e, le Alo o Tavita, ia e alofa mai i a te i maʻua!”
Ina ua faafofoga Iesu i lo la alalaga ane, ona tu ai lea. Ua ia fetalai atu i a te i latou sa faatasi ma ia, ina ia valaau i ē sa alalaga ane. Ona latou ō atu ai lea i tagata tauaso ʻaisi ma fai atu i se tasi o i laua: “Ia e lototele, inā tu ia i luga, o loo valaau o ia i a te oe.” I lona fiafia tele, na lafoai ai e le tagata tauaso lona ofu tele, a ua tu i luga, ma alu atu i a Iesu.
Ona fesili atu lea o Iesu: “Se ā se mea lua te mananao ai ou te faia mo oulua?”
Na aioi ane nei tagata e toalua: “Le Alii e, ia pupula o maʻua mata.”
I le alofa mutimutivale, na paʻi atu ai Iesu i o la mata. E tusa ai ma le tala a Mareko, na fetalai atu Iesu i se tasi o i laua: “Inā alu ia, ua e ola oe i lou faatuatua.” Ona pupula ai lea o mata o tauaso ʻaisi, ma e lē taumatea, sa amata ai ona la vivii uma atu i le Atua. Ina ua iloa e tagata uma le mea na tupu, ona latou vivii atu ai foi lea i le Atua. E leʻi toe faatali Patimaio ma lana uō, a ua mulimuli atu loa i a Iesu.
A o ui atu Iesu i Ieriko, sa matuā faatoateleina le motu o tagata. Sa mananao i latou uma e fia vaai i lē na ia faamaloloina tagata tauaso. Na lolofi ane tagata mai itu uma i a Iesu, ma o le iuga, sa faafaigata ai ona iloa atu o ia e isi. O se tasi o i latou ia, o Sakaio, o se ao lafoga sili i totonu ma fafo atu o Ieriko. Ona o lona puupuu tele, sa lē mafai ai ona ia iloa atu le mea na tupu.
O lea na tamoe atu ai i luma Sakaio ma aʻe i le laau o le sukamoru sa tū e latalata ane i le ala o loo ui atu ai Iesu. Mai i lena nofoaga maualuga, na mafai ai ona ia iloaina lelei ifo mea uma. A o faalatalata atu le motu o tagata, sa valaau atu loa Iesu i luga o le laau: “Sakaio e, ia e vave alu ifo ia i lalo, auā e tatau ona ou nofo i lou fale i le aso nei.” Ona alu ifo ai lea i lalo o Sakaio ma le olioli, ua nanati atu i le fale ina ia sauni mea uma mo lana malo faapitoa.
Peitai, ina ua iloa e tagata lena mea, ona latou muimui uma ai lea. Ua latou manatu e lē o se mea talafeagai le avea o Iesu ma malo a lena tagata. Auā na mauoa Sakaio ona o le tauanauina ma le lē faamaoni o tupe i lana pisinisi o le ao lafoga.
E toatele tagata na mulimuli atu, ma ina ua ulu atu Iesu i le fale o Sakaio, sa latou faitio atu e faapea: “Ua alu atu o ia i le tagata agasala e api ai.” Ae sa silafia e Iesu e mafai ona salamō Sakaio. Ma sa leʻi atuatuvale Iesu, auā na tulai Sakaio ma folafola ane: “Faauta! Le Alii e, o le a ou tufatufaina atu le ʻafa o aʻu mea i ē matitiva, ma so o se mea sa ou faoa mai se tasi ona o tuuaiga sese, ou te toe taui atu ai e taʻi fa.”
Na faamaonia e Sakaio lona salamō moni e ala i lona tuuina atu o le ʻafa o ana mea i tagata matitiva ae faaaogaina le isi ʻafa e toe totogi atu ai mea a i latou na ia ʻoleʻoleina. Atonu sa mafai ona ia fuafuaina e ala i ana faamaumauga o lafoga, le tele o tupe na ia aitalafu ai i na tagata. O lea, na ia tauto atu ai, e na te toe totogi atu e taʻi fa, ina ia ōgatasi ma le tulafono a le Atua lea e faapea: ‘Afai e gaoia e se tasi se mamoe, e ao ona ia taui atu i mamoe e fa o le lafu e sui aʻi le mamoe.’
Sa fiafia Iesu i le auala na folafola atu e Sakaio o le a tufatufa atu ai ana mea, auā na Ia fetalai atu: “Ua oo mai le faaolataga i le aiga nei i le asō, ina ua fai o ia ma atalii o Aperaamo. Auā ua sau le Atalii o le tagata e saili ma faaola i lē na taase.”
E leʻi mamao atu, na faaalia atu ai e Iesu le tulaga o ‘lē na taase’ i le tala e uiga i le atalii faamaumauoa. A o lea, ua tatou maua se faaaoaoga moni i le olaga o lē na taase a ua toe maua. E ui lava ina muimui taʻitaʻi lotu ma ē sa mulimuli i a te i latou, e uiga i le uaʻi atu o Iesu i tagata e pei o Sakaio, ae sa faaauau pea ona saili e Iesu ma toe faafoisia mai nei fanau taase a Aperaamo. Mataio 20:29-34; Mareko 10:46-52; Luka 18:35–19:10; Esoto 22:1.
▪ E foliga mai, o fea na fetaui ai Iesu ma tagata tauaso ʻaisi, ma o le ā na ia faia mo i laua?
▪ O ai Sakaio, ma aisea na ia aʻe ai i le laau?
▪ Sa faamaonia faapefea e Sakaio lona salamō?
▪ O le ā le lesona tatou te aʻoaʻo mai i le auala na feagai ai Iesu ma Sakaio?