Mataupu 37

Na Aveesea e Iesu le Faavauvau o se Fafine ua Oti Lana Tane

E LEʻI umi talu ona faamaloloina le auauna a le taitaiau, ae maliu atu loa Iesu i Naina, o se aai e sili atu i le 20 maila (po o le 30 kilomita) i saute sisifo o Kapanaumi. Sa ō atu faatasi o ia ma ona soʻo, atoa ma se motu o tagata e toatele. Masalo e tau afiafi ane loa, ae latou taunuu i tuaoi o Naina. O i inā sa latou fetaiai ai ma se solo o se maliu. O loo fataina mai le tino maliu o se taulealea e ave i tuapa o le aai, mo lona tanuga.

Sa matuā mafatia lava le tinā, ona o ia o se fafine ua oti lana tane, ma e na o le pau lava foi lea o lana tama. Ina ua maliu lana tane, sa mafai ona faamafanafanaina o ia ona sa iai lana tama. O ona faamoemoega, o faanaunauga, ma vilivilitaiga, sa faalagolago uma i le lumanai o lana tama. A o lea ua leai se tasi e maua ai se faamafanafanaga. Na faateteleina lona faanoanoa a o latou ō atu faatasi ma tagata o le aai i le tuugamau.

Ina ua silafia atu e Iesu le fafine lea sa matuā faavauvau, sa ootia ai le finagalo o Iesu. O lea, na ia fetalai atu ai i se auala mālū, ma le maumauai e faatoʻatoʻa ai e faapea: “Aua e te tagi.” Na avea ona uiga ma ana gaoioiga ma itu na uaʻi ane ai le motu o tagata. O lea, ina ua ia faalatalata ane ma paʻi atu i le fata o loo iai le tino maliu, ona tutū ai lea o ē sa aveina le fata. Atonu sa tau mānatu tagata uma po o le ā le mea o le a ia faia.

E moni, sa vaai i latou na ō atu faatasi ma Iesu a o ia faamaloloina faavavega maʻi o le toatele o tagata. Ae e mautinoa, latou te leʻi vāai lava o ia toe faatuina se tagata mai le oti. Pe mafai ona ia faia se mea faapea? Ua fetalai atu Iesu i le tino oti ma faapea atu i ai: “Le taulealea e, ou te fai atu i a te oe, Inā tulaʻi ia!” Ona nofo ai lea i luga o le tama! Ua amata ona ia tautala, ona avatu ai lea o ia e Iesu i lona tinā.

Ina ua vāai atu tagata ua toe ola moni lava le tama, ona latou fai ane lea: “Ua faatuina mai i a i tatou se perofeta sili.” A ua fai mai nisi: “Ua asiasi mai le Atua i lona nuu.” Sa vave lava ona salalau atu le tala e uiga i lenei gaoioiga ofoofogia i Iutaia uma lava, atoa ma atunuu na siomia ai.

O loo iai pea Ioane le Papatiso i le falepuipui, ma sa ia fia iloa atili galuega na faia e Iesu. Ma ina ua taʻu atu e soʻo o Ioane i a te ia i nei vavega. O le ā lana tali? Luka 7:11-18.

▪ O le ā na tupu a o latalata atu Iesu i Naina?

▪ Sa faapefea ona aafia Iesu i le mea na ia silasila i ai, ma o le ā na ia faia?

▪ Sa faapefea ona tali atu tagata i le vavega a Iesu?