Mataupu 119

Na Aveina atu i a Ana, Sosoo ai ma Kaiafa

NA FUSIFUSIA Iesu e pei o se pagota, ma na taʻitaʻiina atu i a Ana, o lē sa avea muamua ma ositaulaga sili e matuā malolosi ana taaʻiga. Sa avea Ana ma ositaulaga sili i le taimi a o avea Iesu o se tama e 12 ona tausaga o lē na ia faaofoina le au aʻoaʻo faarapi i le malumalu. O nisi o atalii o Ana sa mulimuli ane avea ma ositaulaga sili, ma o le taimi lea na umia ai e Kaiafa, le tane a lona afafine lena tulaga.

Atonu na muai taʻitaʻiina atu Iesu i le fale o Ana ona o le umi o se taimi o lauiloa lena ositaulaga sili i le olaga faalotu a Iutaia. O le afe ane lena e vaai i a Ana, na mafai ai ona maua e le Ositaulaga Sili o Kaiafa se taimi e faapotopoto ai le au Saniterini, o sui e toʻa 71 o le faamasinoga maualuga a Iutaia, ma faapea foi ona aoaoina mai ai ni molimau pepelo.

Sa fesiligia nei e le ositaulaga sili o Ana Iesu e uiga i ona soʻo ma lana aʻoaʻoga. Ae peitai, na fetalai atu Iesu e faapea: “Ua ou tautala faaali i tagata uma; ua ou aʻoaʻo soo i sunako ma le malumalu, e faapotopoto soo ai Iutaia; ma ou te leʻi tautala faalilolilo i se mea e tasi. Pe se ā le mea e te fesili mai ai i a te aʻu? Ia e fesili i ē na faalogo ai, i mea na ou tautala atu ai i a te i latou. Faauta! Ua iloa e i latou nei le mea na ou fai atu ai.”

Ona o lea, na po ai e se tasi fitafita sa tu latalata ane i a Iesu ona fofoga, ma faapea atu: “E te tali atu ea faapena i le ositaulaga sili?”

Na tali atu Iesu: “Afai ua sese laʻu tali, ia e molimau i lona sese; ae afai e saʻo, aisea ua e po mai ai i a te aʻu?” Ina ua uma lenei felafolafoaiga, ona aauina atu lea e Ana o Iesu sa fusifusia i a Kaiafa.

O le taimi lea, na amata ona faapotopoto uma mai ai ositaulaga sili ma toeaina ma tusiupu, ioe, le au Saniterini uma lava. O lo latou falefono e foliga o le fale o Kaiafa. I le faia o se faamasinoga faapena i le po o le Paseka, e manino lava sa faasagatau i le tulafono a Iutaia. Ae sa lē taofia ai lava le au taʻitaʻi lotu mai la latou faufauga leaga.

I ni vaiaso muamua atu, ina ua faatuina e Iesu Lasalo, na muai faia ai le filifiliga a le au Saniterini lava latou faapea e tatau ona oti o ia. Ma i le na o le lua lava aso muamua atu, i le Aso Lulu lea, na faia faatasi ai e taʻitaʻi lotu se taupulepulega ina ia puʻeina Iesu e ala i le faia o se togafiti poto ina ia fasiotia ai o ia. Seʻi manatunatu i ai, ua uma ona taʻusalaina o ia a o leʻi oo i lona faamasinoga!

Ona faia lea o ni taumafaiga e saili mai ni molimau o ē na saunia ni faamaoniga sese ina ia faalagi ai se mea e molia ai Iesu. Ae peitai, e leai ni molimau na faia e ioe faatasi a latou mau. Mulimuli ane, ona ō mai ai lea i luma o molimau e toalua ma la taʻutino mai: “Na ma faalogo o fai mai o ia, ‘Ou te lepetia lenei malumalu na faia e lima, ma ou toe faia se tasi i aso e tolu, e leʻi faia e lima.’”

Na fesili atu Kaiafa: “E te lē tali mai ea sina upu? Pe se ā le mau a nei tagata i a te oe?” Ae sa leai se tali atu a Iesu. E oo lava i lena tuuaʻiga sese, sa matuā masiasi ai lava le au Saniterini, ona sa lē tutusa le mau a molimau. O lea, na taumafai ai foi le au ositaulaga sili e faia se isi togafiti.

Na iloa e Kaiafa le ilitata tele o tagata Iutaia i so o se tasi e taʻua o ia faapea o le Alo lava o le Atua. I nisi o mea na muamua atu, sa latou soona tuuaʻia ai fua Iesu faapea na upuvale ma ua tatau i ai le oti, lea foi sa manatu sese i ai faapea ua fai mai o ia, la te tutusa ma le Atua. Na fesili atu loa ma le poto Kaiafa: “Ou te fai atu i a te oe ia e tauto mai i a te i matou i le suafa o le Atua soifua, Po o oe o le Keriso, le Alo o le Atua!”

E tusa lava po o ā manatu o na tagata Iutaia, ae o Iesu o le Alo moni lava o le Atua. Ma o le lē tautala atu e faaono manatu ai faapea o le faafitia lea o lona avea ma Keriso. O lea na tali atu ai ma le lototele Iesu: “O aʻu lava lea; tou te iloa foi le Atalii o le tagata e nofo i le itu taumatau o Lē ona le mana, e sau foi o ia i ao o le lagi.”

Ona o lena mea, na saei ai e Kaiafa ona ofu ma alaga atu: “Ua upu leaga o ia! Se ā ea le aogā o le toe aumaia o nisi molimau? Faauta! Ua outou faalogo nei i ana upu leaga. O le ā ea so outou manatu?”

Na fai atu le au Saniterini: “Ua tatau ona oti o ia.” Ona amata ai lea ona latou ula i a te ia, ma sa latou faia foi isi upu leaga e tele faasaga i a te ia. Sa latou tapō atu i ona fofoga ma tuufeanu i ai. A o isi na latou ufiufi i ona fofoga ma tatuʻi atu i a te ia ma fesili atu i upu faatiga: “E te iite mai po o ai na ia po atu i a te oe?” O na amioga sauā ma le lē faaletulafono na faia i le po o le faamasinoga. Mataio 26:57-68; 26:3, 4; Mareko 14:53-65; Luka 22:54, 63-65; Ioane 18:13-24; 11:45-53; 10:31-39; 5:16-18.

▪ O fea na muai taʻitaʻiina atu i ai Iesu, ma o le ā le mea na tupu i a te ia i inā?

▪ O fea na sosoo ona avatu i ai Iesu, ma mo le ā le fuafuaga?

▪ Na mafai faapefea e Kaiafa ona uunaia le au Saniterini e faapea atu sa tatau ona oti Iesu?

▪ O ā amioga sauā ma le lē faaletulafono na faia i le po o le faamasinoga?