Mataupu 92

Na Faamaloloina Lepela e Toasefulu i le Malaga Faaiu a Iesu i Ierusalema

NA FAALEAOGAINA e Iesu taumafaiga a le ʻau Saniterini ina ia fasiotia o ia, e ala i lona tuua o Ierusalema ae malaga atu i le aai o Efaraima, e tusa na o se 15 maila [po o le 24 kilomita] pe ā, i mātū i sasae o Ierusalema. O i inā, sa nonofo ai o ia ma ona soʻo, e mamao ese mai ona fili.

Peitai, sa latalata mai le taimi o le Paseka i le 33 T.A., ma e leʻi pine ae toe malaga atu foi Iesu. Na ui atu o ia i Samaria ma agaʻi atu ai i Kalilaia. O lana asiasiga mulimuli lea i lena vaipanoa a o leʻi maliu o ia. A o iai i Kalilaia, sa faatasi atu ai o ia ma ona soʻo i isi tagata o ē sa malaga atu i Ierusalema mo le faamanatuina o le Paseka. Na ui atu i latou i le ala agaʻi i le itumalo o Perea, i le itu i sasaʻe o le Vaitafe o Ioritana.

I le amataga lava o le malaga, ina ua oo atu Iesu i se aai i Samaria po o Kalilaia, na fetaiai ai o ia ma ni tagata lepela e toasefulu. O lenei maʻi matautia e faasolo ina pala ai vaega o le tino o se tagata—o ona tamatamailima, ona tamatamaivae, ona taliga, lona isu, ma ona laugutu. Ina ia puipuia isi tagata mai le pisia ai, na faapea mai ai le Tulafono a le Atua e faatatau i se lepela: “E tatau ona ia ufitia lona laugutu aupitoaluga ma alaga atu, ‘Ua leaga, ua leaga!’ O aso uma foi e iai le ila i a te ia, e leaga ai o ia, . . . E ao foi ona faleesea o ia.”

Na usiusitai lepela e toasefulu i faasasaāga a le Tulafono mo tagata lepela, ma tutū mamao ese ai mai i a Iesu. Peitai, na latou alalaga mamao ane ma leo tetele: “Le Aʻoaʻo e, Iesu, ia e alofa mai i a te i matou!”

Ina ua ia iloa mamao atu i latou, ona fetalai atu lea o Iesu: “Inā ō ia, ma faaali atu outou i faitaulaga.” Na ala ona fetalai atu Iesu faapena, ona sa tuuina atu e le Tulafono a le Atua le pule i faitaulaga e faailoa atu ai faapea ua mamā lepela e toe manuia o latou maʻi. I lena auala, na toe faatagaina ai na tagata ina ia nonofo faatasi ma isi tagata o loo maloloina.

Sa talitonu lepela e toasefulu i le mana faivavega o Iesu. O lea, na latou faanatinati atu ai e vaai le ʻau faitaulaga, e ui ina e leʻi faamaloloina i latou i lea taimi. A o ō i latou i le ala, na tauia ai lo latou faatuatua i a Iesu. Sa latou vaaia ma faalogoina le toe faafoi atu o lo latou soifua maloloina!

Na ō pea isi lepela e toaiva i lo latou ala, ae na toe foi ane le tasi lepela, o se Samaria, ma saili i a Iesu. Aisea? Ona o lona matuā loto faafetai i le mea na tupu i a te ia. Na ia vivii atu ma le leotele i le Atua, ma ina ua ia maua Iesu, ona ia tootuli atu lea i ona aao ma faafetai atu i a te ia.

Na tali atu Iesu e faapea: “E leʻi faamamāina ea le toasefulu? A o i fea le isi toaiva? Ua lē toe foi mai i latou e vivii atu i le Atua, a ua na o lenei tagata ese?”

Ona ia fetalai atu lea i le tagata Samaria: “Inā tulai ia ma e alu; ua e malōlō i lou faatuatua.”

Pe a tatou faitau i le faamaloloina e Iesu o lepela e toasefulu, e tatau lava ona goto ifo i o tatou loto le lesona ua faaalia i lana fesili: “A o i fea le isi toaiva?” O le lē loto faafetai na faaalia e le toaiva, o se agasala matuiā lea. Pe o le a pei ea i tatou o le Samaria, i lo tatou faaalia o le loto faafetai mo mea ua tatou maua mai le Atua, e aofia ai le folafolaga mautinoa o le ola e faavavau i le lalolagi fou amiotonu a le Atua? Ioane 11:54, 55; Luka 17:11-19; Levitiko 13:16, 17, 45, 46; Faaaliga 21:3, 4.

▪ Na faaleaogaina faapefea e Iesu taumafaiga ina ia fasiotia o ia?

▪ O fea sa toe malaga atu i ai Iesu, ma o fea sa nonofo ai?

▪ Aisea na tutū mamao mai ai lepela, ma aisea na fetalai atu ai Iesu, ia latou ō i le ʻau faitaulaga?

▪ O le ā le lesona tatou te aʻoaʻoina mai i lenei mea?