Na Faamaloloina se Tagata na Fanau mai o Tauaso
Mataupu 70
Na Faamaloloina se Tagata na Fanau mai o Tauaso
INA ua taumafai tagata Iutaia e tauai Iesu, na te leʻi tuua ai loa Ierusalema. Mulimuli ane, i le aso Sapati, ina ua latou savavali atu ma ona soʻo i le aai, na latou vaaia ai se tagata na fanau mai lava o tauaso. Na fesili le au soʻo i a Iesu: “Rapi e, po o ai ea na agasala, o ia ea po o ona mātua ua fanau mai ai o ia o tauaso?”
Atonu sa talitonu le au soʻo e pei ona talitonu ai nisi rapi e faapea, e mafai ona agasala le tagata a o iai i le manava o lona tinā. Peitai na tali atu Iesu: “E leʻi agasala lenei tagata, po o ona mātua; ae peitai ina ia faaalia ai galuega a le Atua i a te ia.” Na ala ona tauaso lena tagata, e lē faapea ona o se sese patino po o se agasala na ia faia po o ona mātua. Ae ona o le agasala a le uluai tagata o Atamu, ua lē lelei atoatoa ai tagata uma, ma ua afaina ai i āuga leaga e pei o le fanau mai o tauaso. O lenei āuga leaga sa i le tamaloa, na maua ai e Iesu le avanoa e faaalia ai galuega a le Atua.
Sa faamamafa e Iesu le faanatinati ona faia o nei galuega. Na ia faapea atu: “E tatau ona tatou faia galuega a lē ua auina mai aʻu, manū o ao. Pe a oo mai le po, e lē mafai e se tasi ona galue ai. Manū o oʻu iai i le lalolagi, o aʻu o le malamalama o le lalolagi.” Sa toe o se aga ona maliu lea o Iesu, ma tuuina atu ai o ia i le pouliuli o le tuugamau, e lē toe mafai ai ona ia faia se mea. Ae i lena taimi, sa avea o ia ma puna o le faamalamalamaina o le lalolagi.
Ina ua mavae ona ia fetalai atu i nei mea, ona feanu lea o Iesu i le palapala, ma ua palu faatasi ma ona fāūa. Ona ia nini ai lea o mata o le tagata tauaso ma fetalai atu: “Alu ia, inā mulumulu i le taelega i Seloa.” Na usiusitai i ai le tagata. Ma ina ua ia faia faapea, sa mafai ai ona ia pupula! Maeu lona olioli ina ua ia toe foi atu, ua mafai ona ia vaai mo le uluai taimi i lona olaga!
Sa ofo ona tuaoi ma ē sa latou iloa o ia. Ua latou fesili ane foi: “E lē o ia ea lenei sa nofo ma aisi atu i mea?” Na tali atu nisi, “O ia lenei.” A o isi sa lē talitonu e faapea: “E matuā leai lava, ae ua foliga i a te ia.” Peitai sa faapea ane le tamaloa: “O aʻu lava lenei.”
Na fesili atu tagata i lo latou fia iloa: “Pe na faapefea ona faapupulaina ou mata?”
“O le tasi tagata e igoa i a Iesu ua na faia le palapala, ua nini ai oʻu mata; ua fai mai foi i a te aʻu, Alu ia i le taelega i Seloa, ma ia mulumulu ai. Ona ou alu ai lea, ma ou mulumuluina, ona ou vaai ai lea.”
Ua latou fesili atu foi: “O fea o iai o ia?”
A ua ia tali ane: “Ou te lē iloa.”
Sa latou avatua loa lē na tauaso i o latou taʻitaʻi lotu, le au Faresaio. Ua fesili ane foi le au Faresaio i a te ia pe na faapefea ona toe pupula ona mata. A ua faamatala atu e le tamaloa: “Na tuu mai e ia le palapala i oʻu mata, na ou mulumuluina foi, ma ua ou pupula ai.”
O le mea mautinoa, sa tatau ona olioli le au Faresaio ina ua faamaloloina lena tagata ʻaisi! Peitai na i lo lena, sa latou upuvale i a Iesu ma faapea atu: “E lē mai le Atua lenei tagata.” Aisea na latou fai atu ai faapena? “Auā na te leʻi tausia le Sapati.” Ma sa tau manatu foi isi Faresaio: “Pe mafai faapefea e se tagata agasala ona faia ni faailoga faapena?” O lea sa feeseeseai ai i latou.
Ua latou fesili atu foi i le tagata: “Pe se ā sau upu i a te ia, auā ua faapupulaina e ia i ou mata?”
Na faapea ane lana tali: “O le perofeta lava ia.”
Sa mumusu le au Faresaio e talitonu i lena mea. A ua latou manatu atonu sa faia se maliega faalilolilo i le va o Iesu ma lenei tamaloa ina ia faaseseina ai tagata. O lea ina ia foia le mataupu, sa latou aamia ai loa mātua o le tagata ʻaisi ina ia fesili atu i a te i laua. Ioane 8:59; 9:1-18.
▪ O le ā le mafuaaga na tauaso ai le tagata, ae e lē o le ā?
▪ O le ā le po e lē mafai ona galue ai se tagata?
▪ Ina ua faamaloloina le tagata, o ā uiga faaalia o ē sa latou iloa o ia?
▪ Sa feeseeseai faapefea le au Faresaio i le faamaloloina o le tagata?