Mataupu 61

Na Faamaloloina se Tama na Uluitinoina e se Temoni

A O IAI Iesu, o Peteru, Iakopo ma Ioane, atonu i le tuasivi o le Mauga o Heremoni, sa feagai isi soʻo ma se faafitauli. I lona toe taliu ifo, na silafia vave ai lava e Iesu o loo iai se mea ua faaletonu. O loo vagaia ona soʻo e le motu o tagata, ma o loo finau atu le au tusiupu i a te i latou. Na matuā ofo le motu o tagata ina ua latou iloa atu Iesu, ma sa taufetuli atu loa e faafeiloai i a te ia. A ua ia fesili ane: “O le ā le mea tou te fefinauai ai ma i latou?”

Ona sau ai lea o se tasi tamaloa mai le motu o tagata ua tootuli i luma o Iesu, ma faamatala atu i a te ia: “Le aʻoaʻo e, ua ou aumai i a te oe loʻu atalii ua iai le agaga gūgū; so o se mea lava na te pue ai i a te ia, e lafotu ai i a te ia; ua fāuā lona gutu, ua lilivau foi ona nifo, ma ua leai foi se malosi o i a te ia. Na ou fai atu foi i ou soʻo ina ia latou tulia o ia, a ua lē mafaia e i latou.”

E lē taumate sa tele tala a le au tusiupu ina ua lē mafai e le au soʻo ona faamalolo i le tama, ma atonu sa latou faaamuamu i a latou taumafaiga. Na taunuu tonu ifo lava Iesu i lena taimi faigata. Na ia fetalai atu: “Le tupulaga lē faatuatua e, ou te iai ma outou seia afea? Ou te faapalepale i a te outou seia afea?”

E foliga mai sa fetalai atu Iesu i tagata uma lava na auai i inā, ae mautinoa sa patino atu lava i le au tusiupu, o ē sa faatiga i ona soʻo. Ona sosoo ai lea ma le fetalai atu o Iesu e uiga i le tama: “Inā aumai ia o ia i a te aʻu.” Peitai, ina ua sau le tama i a Iesu, sa faatafiti o ia e le temoni na uluitino ai, ma na paʻū ai o ia i le eleele ma matuā tetemū ai lava. Na taafilifili solo le tama i le eleele ma sa fāuā lona gutu.

Ona fesili ane lea o Iesu: “Talu mai anafea na oo ai lena mea i a te ia?”

Na tali atu le tamā: “Talu ina o tama itiiti. Ua lafo soo foi e [le temoni] i a te ia i le afi, atoa ma le vai, ina ia fano ai o ia.” Ona aioi atu lea o le tamā: “Ai se mea e te mafaia, ia e alofa mai i a te i matou, ma ia e fesoasoani mai i a te i matou.”

Atonu e tele ni tausaga sa tau saili ai e lenei tamā se fesoasoani. Ae ona sa lē mafaia ona faamalolo e soʻo o Iesu, sa matuā tele ai lona atuatuvale. Ina ua ootia Iesu i le matuā augani atu a le tamā, sa ia faalaeiau atu ai e faapea: “Afai ua e mafaia ona faatuatua, e mafaia mea uma i lē ua faatuatua.”

Ona alaga lea o le tamā: “Ua ou faatuatua,” ae na ia aioi atu: “Fesoasoani mai i le mea ou te manaomia ai le faatuatua.”

Ina ua ia silasila atu ua taufetuli mai le motu o tagata i a te i latou, ona fetalai atu lea o Iesu i le temoni: “O oe na, le agaga gūgū ma le tutuli, ou te fai atu i a te oe, inā e alu ia i fafo i a te ia, aua foi e te toe alu i totonu i a te ia.” A o alu ese le temoni, sa ia toe faapogaia foi le alaga o le tama ma matuā faatafiti i a te ia. Ona taatia ai lea o le tama i le eleele ua lē toe gaoioi, o lea na fai ane ai le toatele o tagata: “Ua oti o ia.” A ua tago ifo Iesu i lona lima, ona tulai ai lea o ia.

I le taimi muamua ina ua aauina atu le au soʻo e talaʻi, sa latou tutulia ai temoni. O lea, ina ua latou ulufale atu i le fale, ona latou fesili ane lea i a Iesu ina ua na o i latou: “Se ā le mea na matou lē mafai ai ona tulia o ia?”

I le faailoa atu ona o lo latou lē faatuatua, na tali atu ai Iesu: “Ua na o le tatalo e mafai ai ona ō ese o temoni faapena.” E mautinoa lava, sa manaomia se sauniuniga ina ia tuliese ai le temoni matuā malosi sa aafia ai i lenei mea. Sa manaomia ai foi le faatuatua malosi, faatasi ma le tatalo e talosagaina ai le fesoasoani e sili ona malosi a le Atua.

Ma na toe faaopoopo atu Iesu: “E moni, ou te fai atu i a te outou, afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i le la mea; ona alu atu ai lea; e leai foi se mea tou te lē mafaia.” Maeu le matuā malosi e mafai ona iai le faatuatua!

O toatuga ma faigata na e faalavelavea ai le agaigai i luma i le auaunaga a Ieova, atonu e foliga mai e pei o se mauga faitino e matuā sili ona telē ma e lē mafai ona siitia. E ui i lea, na faaalia e Iesu, afai tatou te atiina aʻe le faatuatua i o tatou loto, ia faasūsū ma faamalosia ina ia tuputupu aʻe, o le a oo ai ina matuā malosi, ma o le a mafai ai ona tatou manumalo i na toatuga ma faafitauli e pei o ni mauga. Mareko 9:14-29; Mataio 17:19, 20; Luka 9:37-43.

▪ O le ā le tulaga na fetaiai ma Iesu ina ua ia toe taliu ifo mai le Mauga o Heremoni?

▪ O le ā le faalaeiauga na avatu e Iesu i le tamā o le tama na uluitinoina e le temoni?

▪ Aisea na lē mafai ai e le au soʻo ona tuliese le temoni?

▪ O le ā le malosi e mafai ona oo i ai le faatuatua e pei ona faaalia e Iesu?