Na Fafagaina Faavavega e Iesu le Faitauafe
Mataupu 52
Na Fafagaina Faavavega e Iesu le Faitauafe
SA OLIOLI le au aposetolo e toʻa 12 i la latou talaʻiga faataamilo i Kalilaia atoa. E leʻi leva lava talu ona fasiotia o Ioane, ae latou toe foi ane loa i a Iesu ma faamatala atu i ai mea ofoofogia na latou faia. I le silasila atu i lo latou vaivai, atoa ma le toatele naua o tagata fegasoloai sa lē maua ai foi se taimi latou te aai ai, na fetalai atu ai Iesu e faapea: ‘Seʻi o tatou ō atu ia na o i tatou i se mea tuufua ina ia mafai ai ona outou mālōlō.’
Na faaee loa lo latou vaa, atonu i tafatafa ane o Kapanaumi, ma latou agaʻi atu ai i se mea mamao, e foliga mai o le itu i sasae o Ioritana i tala atu o Petesaita. Peitai, e toatele tagata sa latou iloaina lo latou ō ese atu, a o isi sa faalogo i ai. Sa taufetuli atu loa i latou uma nei i le matafaga e muamua atu, ma e taunuu le vaa, a ua iai foi tagata i inā e faafeiloaia i latou.
Ina ua maliu aʻe Iesu nai le vaa ma silasila atu i le motu o tagata e toatele, ona mutimutivale ai lea o lona alofa auā sa pei na tagata o ni mamoe e leai so latou leoleo. O lea na ia faamaloloina ai o latou maʻi ma aʻoaʻo atu i a te i latou i mea e tele.
Sa vave lava ona mou atu le taimi, ma na ō ane loa soʻo o Iesu i a te ia ma faapea atu: “O le mea tuufua lenei, ma ua leva foi le aso. Inā tuu atu ia i latou e ō i aai ma faoa aai e latalata mai ina ia faatau ai ni a latou meaai.”
Peitai, na tali atu Iesu: “Inā avatu ia e outou ni meaai ma i latou.” Talu ai sa silafia e Iesu le mea o le a ia faia, na ia tofotofoina ai Filipo i le fesili atu i ai e faapea: “O fea e mafai ona tatou faatau mai ai ni areto e aai ai i latou nei?”
I le manatu o Filipo, e lē taitai mafai ona faia faapea. Auā, e tusa ma le 5,000 tane sa iai, ma e masalo e sili atu i le 10,000 tagata e aofia ai fafine ma tamaiti! Na tali ane Filipo e faapea “e lē lava ni areto e faatauina i tenari e lua selau [i aso na o le tenari o le totogi lea o le aso e tasi], ina ia tofu ai i latou ma sina mea itiiti.”
Atonu ina ia faaalia le lē taitai mafai ona fafagaina le toatele naua o tagata, o lea na ofo ane ai Aneterea e faapea: “O loo i inei se tamaitiiti o loo iai areto e lima ma nai tamai iʻa e lua lau,” ma na ia faaopoopo mai, “ae pe tofusia ea i nei mea le toatele?”
Ona o le taimi lea o le tau e totogo ai mea, a o toe o se aga oo i le Paseka i le 32 T.A., sa tele lava ina lanumeamata le mutia. O lea na faatonuina ai e Iesu ona soʻo e taʻu atu i tagata ina ia nonofo i le mutia i vaega taʻi 50 ma le taʻi 100. Sa tago loa o ia i areto e lima ma iʻa e lua lau, ua tepa aʻe i le lagi, ma fai le faafetai. Ona ia vaevaeina lea o areto ma iʻa, ma ia avatu i ona soʻo, o ē na latou tufatufaina atu i tagata. Ma le matuā ofo lava, sa aai uma ai lava tagata seia oo ina latou maoona!
Mulimuli ane, sa fetalai atu Iesu i ona soʻo: “Inā faapotopoto mai ia o mea na totoe, ina neʻi iai se mea e māumau.” Ina ua latou faia faapea, sa tutumu ai ato e 12 i mea na totoe mai mea na latou aai ai! Mataio 14:13-21; Mareko 6:30-44; Luka 9:10-17; Ioane 6:1-13.
▪ Aisea na saili ai e Iesu se mea tuufua mo na o i latou ma ona aposetolo?
▪ O fea na ave i ai e Iesu ona soʻo, ma aisea na lē faataunuuina ai lo latou fia mālōlō?
▪ Ina ua leva le aso, o le a na fai atu ai le au soʻo, ae na faapefea ona tausia e Iesu tagata?