Mataupu 51

Na Fasiotia se Tagata i le Patī o se Aso Fanau

INA ua maeʻa ona tuuina atu faatonuga i ona aposetolo, ona aauina atu lea e Iesu o i latou e taitoalua i le oganuu. Atonu sa ō faatasi le auuso o Peteru ma Aneterea, faapea foi Iakopo ma Ioane, o Filipo ma Patolomaio, o Toma ma Mataio, o Iakopo ma Tataio, a o Simona ma Iuta le Sekara. Sa folafola atu e na paga e toaono o ē faievagelia le tala lelei o le Malo ma faia faamalologa faavavega i so o se mea na latou ō atu i ai.

O le taimi lena, o loo iai pea Ioane le Papatiso i le falepuipui. Ua toeitiiti lava atoa le lua tausaga o iai o ia i inā. Atonu o e manatua sa faalauiloaina atu e Ioane i luma o le lautele faapea o se mea sese mo Herota Anetipa le ave o Herotia, le avā a lona uso o Filipo, e fai ma ana avā. Talu ai sa faapea mai Herota Anetipa o loo ia mulimuli i le Tulafono a Mose, sa faaalialia ai ma le tonu e Ioane lenei faiā mulilua. O lea na faafalepuipuiina ai Ioane e Herota, atonu e ala i se uunaiga a Herotia.

Sa iloa lelei lava e Herota Anetipa, o Ioane o se tagata amiotonu, ma sa ia faalogologo foi i a te ia ma le fiafia. O le mea lea, na ia lē iloa ai po o le ā se mea o le a faia i a te ia. I le isi itu, sa inoino Herotia i a Ioane ma sailiili ai pea e fasioti i a te ia. Mulimuli ane, sa ia maua le avanoa na ia faatalitali i ai.

I sina taimi puupuu lava a o leʻi oo i le Paseka o le 32 T.A., na fuafua ai e Herota se faamanatuga tele lava o lona aso fanau. Na potopoto uma ane i le patī, alii sili uma ma taitaiau a Herota, atoa ma tagatanuu sili o Kalilaia. A o faagasolo le po, sa auina ane Salome le tama teine laitiiti a Herotia mai lana tane muamua o Filipo, ina ia saasaa mo mālō faaaloalogia. Sa matuā faafiafiaina lava le aofia o tamaloloa i lana siva.

Sa fiafia tele Herota i a Salome. Sa ia folafola atu i a te ia: “Ia e fai mai i a te aʻu i so o se mea e te manao ai, ou te avatu lava i a te oe.” Na ia tauto atu foi e faapea: “So o se mea lava e te ole mai ai i a te aʻu, ou te avatua lava i a te oe, e oo lava i le vaeluagalemu o loʻu malo.”

A o leʻi tali atu Salome, sa ulufafo o ia e talanoa ma lona tinā. Ua ia fesili atu: “O le ā se mea e ao ona ou fai atu ai?”

Sa maua ai loa i inā le avanoa! Na tali atu Herotia e aunoa ma le toe faatali: “O le ulu o Ioane le Papatiso.”

Ua toe faatopetope atu nei Salome i a Herota ma talosaga atu e faapea: “Ou te manao ina ia e aumai vave lava i a te aʻu le ulu o Ioane le Papatiso i se tanoa.”

Na matuā tiga ma lē mautonu Herota. Ae ona sa faalogo ana mālō i lana tautoga, sa ia maasiasi ai e teena, e ui lava ina o le a fasiotia ai se tagata e leai sana agasala. Sa auina atu loa se tagata faaoosala i le falepuipui ma ana faatonuga sauā. E leʻi umi, ae toe foi mai o ia ma le ulu o Ioane i se tanoa, ma avatu i a Salome. Ona ia avatu ai lea i lona tinā. Ina ua faalogo i ai soʻo o Ioane, sa latou ō ane loa ua ave lona tino ma tanu, ona latou logoina atu lea o le faalavelave i a Iesu.

Mulimuli ane, ina ua faalogo Herota i le faamaloloina e Iesu o tagata ma tutuli i temoni, ona fefe ai lea o ia ona o le mataʻu i a Iesu e faapea, ai o Ioane lea ua toe faatuina mai nai le oti. Talu mai lena taimi, sa matuā naunau ai lava o ia e fia vaai i a Iesu, e lē ina ia faalogo i lana talaʻiga, ae ina ia faamautinoa ai po o tatau lona mataʻu pe leai. Mataio 10:1-5; 11:1; 14:1-12; Mareko 6:14-29; Luka 9:7-9.

▪ Aisea na faafalepuipuiina ai Ioane, ma aisea sa lē manao ai Herota e fasiotia o ia?

▪ Sa maua mulimuli faapefea e Herotia le avanoa e fasiotia ai Ioane?

▪ Ina ua mavae le maliu o Ioane, aisea sa manao ai Herota e fia vaai i a Iesu?