Mataupu 98

Na Fefinauai le Au Soʻo a o Latalata le Maliu o Iesu

UA OO Iesu ma ona soʻo i tafatafa o le Vaitafe o Ioritana, lea sa latou sopoia atu mai le itumalo o Perea agaʻi i Iutaia. E toatele isi tagata na latou malaga faatasi i le Paseka o le 33 T.A., lea sa toe o se vaiaso pe ā ona faia lea.

Na muamua atu Iesu i ona soʻo, ma sa latou maofa i lona faamalosi ma le maumauai. Ia manatua, i ni nai vaiaso muamua atu ina ua maliu Lasalo, a o toeitiiti foi malaga atu Iesu mai Perea agaʻi i Iutaia, sa faalototele atu ai Toma i isi e faapea: “Inā tatou ō atu foi ia ma i tatou, ina ia tatou oti faatasi ai ma ia.” Ia manatua foi, ina ua uma ona faatuina e Iesu o Lasalo, sa faia ai e le ʻau Saniterini ni fuafuaga ina ia fasiotia Iesu. E letioa la ona matatau o le ʻau soʻo a o latou toe ō atu i Iutaia.

Ina ia sauniunia i latou mo le mea o le a tupu, na ave ai e Iesu le toʻa 12 ua na o i latou, ma ua fetalai atu i ai: “O lenei ua tatou ō atu i Ierusalema, e tuuina atu ai le Atalii o le tagata i le ʻau faitaulaga sili ma le ʻau tusiupu, latou te faasala i a te ia i le oti, latou te tuuina atu foi i a te ia i tagata o nuu ese, latou te faatauemu foi i a te ia ma feanu i a te ia ma sasa i a te ia ma fasioti i a te ia, a mavae foi aso e tolu ona toe faatuina mai lea o ia.”

O le faatolu aʻi lea i nai masina talu ai nei, ona taʻu atu e Iesu i ona soʻo lona maliu ma lona toetu. Ma e ui ina sa latou faalogo i a te ia, ae latou te leʻi malamalama ai. E lē taumatea, ona sa latou talitonu i le toe fuataiina o le malo o Isaraelu i le lalolagi, ma sa latou faamoemoe o le a maua ai le mamalu ma le viiga faatasi ma Keriso i se malo faalelalolagi.

Sa aofia ai i tagata na malaga atu mo le Paseka, i a Salome, le tinā o aposetolo o Iakopo ma Ioane. Na taʻua e Iesu nei tagata o “Atalii o le Faititili,” e lē taumatea ona o o la uiga aasa. Sa umi se vaitaimi o faanaunau pea i laua nei ina ia silisili i le Malo o Keriso, ma sa la faailoa atu foi o la faanaunauga i lo la tinā. Ona ia faalatalata atu lea i a Iesu e fai ma sui o lana fanau, ua ifo atu i ona luma, ma talosaga atu mo sona finagalo.

Na fesili ane Iesu: “Se ā se mea e te manao ai?”

Ua tali atu o ia: “Ia e fetalai ane ia nonofo aʻu nei tama e toalua, o le tasi i lou itu taumatau, a o le isi i lou itu tauagavale i lou malo.”

Ina ua ia silafia le pogai o le talosaga, ona fetalai atu lea o Iesu i a Iakopo ma Ioane: “Lua te lē iloa le mea ua lua ole mai ai. E te lua mafaia ea ona inu i le ipu o le a aʻu inu ai?”

Na tali ane i laua: “Ma te mafaia.” E ui ina faatoʻā uma ona taʻu atu e Iesu i a te i latou e faapea, o loo fesagai o ia ma ni sauaga matautia ma o le a fasiotia mulimuli ane ai, ae foliga mai sa leʻi malamalama i laua, o le uiga lena o lana fetalaiga e faatatau “i le ipu” o le a ia inuina.

Peitai, na taʻu atu e Iesu i a te i laua: “Lua te feinu lava i laʻu ipu, ae o le nofo i loʻu itu taumatau ma loʻu itu tauagavale, e lē o saʻu lea e avatu, ae tau lava o ē ua saunia mo i latou lea mea e loʻu Tamā.”

A o faagasolo le taimi, na iloa ai e isi aposetolo e toasefulu le mea na talosaga atu ai Iakopo ma Ioane, ma sa latou feita ai. Atonu sa faumalo Iakopo ma Ioane i le finauga muamua a le ʻau aposetolo, po o ai o i latou e sili. A o lea ua faaalia i la la talosaga, la te leʻi faatatauina le fautuaga na avatu e Iesu e faatatau i lena mataupu. E faanoanoa lava, ona sa malolosi pea o la faanaunauga mo le fia silisili.

O lea, ina ia foia lena finauga, atoa ma le loto tiga na tupu aʻe ai, na valaau atu ai Iesu i a i latou uma e toʻa 12 ina ia ō ane. I le fautuaina ma le alofa o i latou, na ia fetalai atu ai: “Ua outou iloa o tupu o atunuu e aliitai i latou i a te i latou, ma o alii sili foi e pule i a i latou. Ae lē faapena outou; a o sē fia sili i a te outou, e tatau ona avea o ia ma a outou auauna, o sē foi e fia muamua i a te outou ia fai o ia ma a outou pologa.”

Na faataatia e Iesu le faaaoaoga e ao ona latou faataitai i ai, e pei ona ia faamatala atu: “E pei lava o le Atalii o le tagata, e leʻi sau ia ina ia auauna mai tagata i a te ia, ae ia auauna atu o ia ma foaiina atu lona ola e fai ma togiola e sui aʻi tagata e toatele.” E lē gata ina sa auauna atu Iesu mo isi, ae sa ia faia foi faapena e oo lava i lona maliu mo tagata! Sa manaomia e le ʻau soʻo lena lava manatu e pei ona i a Keriso, o le naunau lea ina ia auauna atu, na i lo o le auauna mai i ai o tagata, ma ia avea o sē aupito itiiti, na i lo o le fia iai i se tulaga silisili. Mataio 20:17-28; Mareko 3:17; 9:33-37; 10:32-45; Luka 18:31-34; Ioane 11:16.

▪ Aisea na matatau ai le ʻau soʻo?

▪ Sa saunia faapefea e Iesu lona ʻau soʻo mo mea o le a tutupu?

▪ O le ā le talosaga na fai atu i a Iesu, ma sa faapefea ona aafia ai isi aposetolo?

▪ Na foia faapefea e Iesu le faafitauli o ona aposetolo?