Na Tō, ae Le‘i Faaipoipo
Mataupu 4
Na Tō, ae Leʻi Faaipoipo
UA TOLU masina talu ona to o Maria. E te manatua foi sa asiasi atu o ia i a Elisapeta i uluai masina o lona maitaga, a o lea la ua toe foi ane i lona aiga i Nasareta. Ua lē toe umi ae iloa uma e tagata o lona nuu le tulaga ua oo i a te ia. O le mea moni sa iai o ia i se tulaga pagatia!
O le mea e sili ai ona leaga, ona ua uma ona faamau o Maria e avea ma avā a le kamuta o Iosefa. Ma na ia iloaina, o le tulafono a le Atua i a Isaraelu, o se fafine ua uma ona faamau ma se tasi tamaloa ae toe faia ma le loto i ai ni feusuaiga ma se isi tamaloa, e tatau ona fetogia ina ia oti. Sa mafai la faapefea ona ia faamatala atu lona maʻi to i a Iosefa?
Ona e tolu masina na malaga ese ai Maria, tatou te mautinoa lava la le naunau o Iosefa e toe fia vaai i a te ia. Ina ua la feiloai, e foliga mai na taʻu atu loa e Maria le tala i a te ia. Atonu sa ia faia le mea sili e faamatala atu ai faapea, o lana to e mai le agaga paia o le Atua. Ae e pei ona e vaai faalemafaufau i ai, e matuā faigata lava ona talitonu Iosefa i lena mea.
Sa iloa e Iosefa le talaaga lelei o Maria. Ma e foliga mai sa ia alofa faapelepele i a te ia. Peitai, e tusa lava po o le ā sana faamatalaga, ae e matuā foliga mai lava na to o ia i se isi tamaloa. E ui i lea, sa leʻi manao Iosefa ina ia fetogia Maria ia oti, pe faamasiasi foi o ia i luma o tagata. O lea na ia manatunatu ai e faatea faalilolilo i a te ia. I aso na, o tagata ua uma ona faamau, sa tali tutusa lava ma tagata ua uma ona faaipoipo, ma sa manaomia ai se alei ina ia toe tatalaina ai se faamau.
Mulimuli ane, a o manatunatu pea Iosefa i nei mea, sa oo ina moe. Ona faaali ane lea i a te ia o le agelu a Ieova i le miti ua faapea ane: “Aua e te fefe e ave Maria lau avā i lou aiga, auā o lana to e mai le agaga paia. O le a fanau e ia se tama tane, ma e tatau ona e faaigoa i a te ia o Iesu, auā e faaola e ia lona nuu ai a latou agasala.”
Ina ua ala Iosefa, maeu lona loto faafetai! Sa leʻi toe faatali loa, a ua faia le mea na faatonu atu e le agelu. Ua ia ave Maria i lona aiga. O lena gaoioiga i luma o le lautele, sa pei o se sauniga o le faaipoipoga, e faailoa atu ai o lea ua faaipoipoina faaletulafono Maria ma Iosefa. Ae sa leʻi faia e Iosefa se feusuaiga ma Maria a o to o ia i a Iesu.
Faauta! O loo mamafa Maria i le tama, a ua faatietie o ia e Iosefa i luga o se asini. Po o fea o le a la ō i ai, ae aisea o le a la toe malaga ese ai a ua toeitiiti fanau Maria? Luka 1:39-41, 56; Mataio 1:18-25; Teuteronome 22:23, 24.
▪ O le ā sa mafaufau i ai Iosefa ina ua iloa ua to Maria, ma aisea?
▪ Sa ono mafai faapefea e Iosefa ona faatea i a Maria, a o lea la te leʻi faaipoipo?
▪ O le ā le gaoioiga i le lautele sa avea ma sauniga o le faaipoipoga a Maria ma Iosefa?