Mataupu 83

Na Talimalo i a te Ia se Faresaio

SA IAI pea Iesu i le aiga o se Faresaio sili, ma na seʻi faatoʻā uma lava ona ia faamaloloina se tagata na maua i le maʻi fula. A o ia matauina le ʻau valaaulia o loo latou filifilia nofoa e sili i le taumafataga, sa ia aʻoaʻo atu loa se lesona e uiga i le loto maulalo.

Na faamatala atu e Iesu: “Pe a valaaulia oe e se tasi i se taumafataga o se faaipoipoga, aua e te taoto i le nofoaga sili. Auā atonu o iai se tasi e sili atu i lo o oe na valaaulia e ia; ona alu atu ai lea o lē na valaaulia i a te oe ma ia, ma fai atu i a te oe, ‘Inā tuu ia le nofoaga mo le alii nei; ona e alu ai lea ma le mā i le nofoaga aupito faatauvaa.”

O lea na fautua atu ai Iesu e faapea: “Peitai o oe, pe a valaaulia oe, ia e alu ma taoto i le nofoaga aupito faatauvaa; ina ia fai atu lē na valaaulia oe, pe a sau o ia, ‘Sole inā alu ia oe i le nofoaga sili.’ Ona mamalu ai lea o oe i luma o ē taooto e ʻaai faatasi ma oe.” I le faaiuga, na fetalai atu ai Iesu: “Auā o sē faamaualuga o ia i a te ia, e faamaulaloina lea, a o lē faamaulalo o ia i a te ia, e faamaualugaina lea.”

Ona sosoo ai lea ma le fetalai atu o Iesu i le Faresaio na valaauliaina o ia, ma faamatala atu i ai le auala e saunia ai se taumafataga e sili ona tāua i le Atua. “Pe a e sauni se faigaai, po o se talisuaga, aua e te valaaulia au uō, po o ou uso, po o tagata o lou aiga, po o tagata mauoa tou te tuaoi, neʻi latou toe valaaulia mai foi i a te oe, ona toe taui mai ai lea i a te oe. Peitai o oe, pe a e saunia se faigaai, inā talaʻi atu ia i ē matitiva, i ē mumutu, i ē pipili, ma ē tauaso; e manuia ai oe, auā latou te lē mafaia ona toe taui mai i a te oe.”

O le saunia o se taumafataga faapena mo i latou e lē atoatoa le malosi, o le a maua ai le fiafiaga e lē na te saunia le taumafataga, auā e pei ona faamatala e Iesu i lē na valaauliaina o ia, “E tauia oe i le toe tutū mai o ē amiotonu.” O le faamatalaga a Iesu e uiga i lena taumafataga matagofie, na faamanatu atu ai i se tasi o le ʻau valaaulia, se isi foi ituaiga o taumafataga. Na faapea atu lenei tagata valaaulia: “Amuia lē ʻai i le malo o le Atua.” Peitai, e lē o tagata uma e tauia ma le tonu i lena taumafataga fiafia, e pei ona faailoa atili mai e Iesu i se tala faatusa e faapea.

“Na saunia e se tasi tagata le talisuaga tele, ma sa ia valaaulia foi tagata e toatele. Ona ia auina atu lea o lana auauna . . . e fai atu i le ʻau valaaulia, ‘Inā ō mai ia, auā ua uma ona sauni o mea uma.’ A ua taitasi i latou uma ma le faamolemolega. Ua fai ane i a te ia le tagata muamua, ‘Sa ou faatauina se fanua, ma e tatau ona ou alu e matamata ai; ou te talosaga atu i a te oe, ia tuu mai i a te aʻu.’ A ua faapea ane le isi, ‘Na ou faatauina ni povi tailua e lima ma e tatau ona ou alu e faataitai; o lea ou te talosaga atu ai ina ia tuu mai i a te aʻu.’ Ua fai ane foi le isi, ‘Faatoʻā uma lava ona ma faaipoipo ma laʻu avā ma o lea e lē mafai ai ona ou alu atu.’”

Pagā ni faamolemolega lē talafeagai! E masani lava ona vaavaai muamua se fanua po o se lafu povi a o leʻi faatauina, e telē lava la le taimi e mafai ona vaai mulimuli ai na mea. E faapena foi ona lē tatau ona avea le faaipoipoga a se tagata ma itu e taofia ai o ia mai le taliaina o sea valaaulia tāua. O lea, ina ua faalogo le matai i nei faamolemolega, ona ita ai lea o ia ma faatonu atu i lana auauna e faapea:

“‘Inā alu vave ia i ala tetele, ma alatua o le aai, ma aumai i inei o ē matitiva, ma ē mumutu, ma ē pipili atoa ma ē tauaso.’ E leʻi umi ae toe foi ane le auauna ma faapea atu, ‘Loʻu matai e, ua uma ona faia o mea na e poloai mai ai, ae o loo iai pea ni avanoa.’ Ona fai atu lea o le matai i le auauna, ‘Inā alu atu ia i magāala ma nofoaga tapunipuni, ma ia pulunaunau atu latou te ō mai, ina ia tumu ai loʻu fale nei. . . . E leai lava se tasi o na tagata na valaaulia, e ʻai i laʻu talisuaga.’”

O le ā le tulaga sa faamatalaina i le tala faatusa? Ia, “o le Matai” na saunia le talisuaga sa faaataina ai Ieova le Atua; “o le auauna” sa ia faasalafaina atu le valaaulia, o Iesu Keriso; ma o le “talisuaga tele,” o ni avanoa ia mo le Malo i le lagi.

O i latou na muai oo atu i ai le valaaulia mo le Malo, e ese ai mai isi, o taʻitaʻi lotu ia o Iutaia i ona po o Iesu. Ae peitai, na latou teena le valaaulia. O lea la, na amata tonu mai ai lava i le Penetekoso i le 33 T.A., ona faasalafa atu le valaaulia lona lua i tagata inosia ma le faatauvaa o le nuu o Iutaia. Ae peitai sa leʻi lava i latou na tali ane ina ia faatumuina ai avanoa e 144,000 i le Malo faalelagi o le Atua. O lea, i le 36 T.A., i le tolu ma le ʻafa tausaga mulimuli ane ai, na faasalafa atu ai le valaaulia lona tolu, ma o le valaaulia mulimuli foi lea i tagata lē peritomeina e lē o ni tagata Iutaia, ma na faaauau pea le aoaoina o i latou na seia oo mai i o tatou aso. Luka 14:1-24.

▪ O le ā le lesona o le loto maulalo na aʻoaʻo atu e Iesu?

▪ E mafai faapefea e se tagata talimalo ona saunia se taumafataga e tāua i le Atua, ma aisea na te mauaina mai ai le fiafia?

▪ Aisea e vaivai ai faamolemolega na faia e malo na valaaulia?

▪ O le ā na faaatagia i le tala faatusa a Iesu e uiga i le “talisuaga tele”?