Mataupu 109

Na Taʻusalaina e Iesu Ē na Tetee i a te Ia

NA MATUĀ faamasiasia lava e Iesu taʻitaʻi lotu o ē sa tetee i a te ia, ma na latou matataʻu ai e toe fesili atili atu i a te ia. O lea na ia tausolomua ai i le faaalialia o lo latou valea. Sa ia fesili atu: “Se ā la outou taofi i le Keriso? Se atalii ea ia o ai?”

Na tali atu le au Faresaio: “O le alo o Tavita.”

E ui lava, sa leʻi faafitia e Iesu le avea o Tavita o le tupuaga faaletino o le Keriso, po o le Mesia, ae na ia fesili atu: “O lenei, pe faapefea ona taʻua e Tavita e ala i le faagaeeina e le agaga [i le Salamo 110] o ia o lona Alii, i le faapea mai, ‘Ua fetalai atu Ieova i loʻu Alii, “Ia e nofo i loʻu itu taumatau, seia ou tuuina ou fili i lalo o ou vae?”’ O lenei, afai ua taʻua o ia e Tavita o le Alii, pe faapefea ona fai o ia mona atalii?”

Sa lē magagana le au Faresaio auā sa latou lē iloa le faailoaga moni o le Keriso, po o lē na faauuina. O le Mesia sa lē o sē e tau ina tupuga mai faaletagata i le gafa o Tavita, e pei ona foliga sa talitonu i ai le au Faresaio, ae sa soifua o ia i le lagi ma sa sili o ia, i a Tavita, po o lona Alii.

I le faliu atu i le motu o tagata ma ona soʻo, na lapatai atu ai Iesu e uiga i tusiupu ma Faresaio. Talu ai o i latou nei sa aʻoaʻoina le Tulafono a le Atua, sa ‘latou nonofo i le nofoa o Mose,’ na timai atu ai Iesu: “Ia outou anaana ai ma ia outou faia mea uma latou te fai atu ai i a te outou e anaana i ai.” Ae na ia faaopoopo atu: “Ae aua tou te faaaʻoaʻo i a latou amio; auā ua latou fai atu, ae latou te lē faia.”

Sa avea i latou o tagata faafiaamiotonu, ma na taʻusalaina e Iesu i latou i upu e pei ona sa ia fetalai atu ai a o taumafa i le fale o se Faresaio i ni masina na muamua atu. Fai mai a ia: “Ua latou fai a latou galuega uma, ina ia iloa ai e tagata.” Ma na ia saunia ni faaaoaoga, e pei ona matauina:

“Ua latou faalautele i a latou filateri,” o mea latou te ofuina e avea o ni puipuiga. O nei mea o ni mea lauiti, e fusi i le muaulu po o le ogalima, sa iai vaega e fa o le Tulafono: I le Esoto 13:1-10, 11-16; ma le Teuteronome 6:4-9; 11:13-21. Ae sa faalauteteleina e le au Faresaio nei mea ina ia faailoa atu ai faapea sa latou maelega i le Tulafono.

Na fai atu atili Iesu e faapea, sa latou “faatele i tuupao o o latou ofu.” I le Numera 15:38-40 na poloaiina ai tagata Isaraelu ina ia faia ni tuupao i o latou ofu, ae na faia e le au Faresaio a latou tuupao e sili atu ona uumi na i lo so o se isi lava. O na mea uma sa faia ona o le faalialia! Na toe fetalai atu Iesu: “Ua latou fiafia foi i le mea sili e taoto ai.”

E faanoanoa lava, ona sa aafia ai ona lava soʻo i lenei faanaunauga mo le fiasili. O lea na ia fautua atu ai faapea: “A o outou, aua neʻi taʻua outou o rapi; auā e toatasi la outou aʻoaʻo; a o outou uma o le au uso outou. Aua foi neʻi tou taʻua se tasi i le lalolagi o lo outou tamā; auā e toatasi lo outou Tamā, o i le lagi ia. Aua foi neʻi taʻua outou o taʻitaʻi; auā e toatasi lo outou Taʻitaʻi, o le Keriso.” Sa tatau i le au soʻo ona aveesea mai i a i latou le faanaunauga o le fia muamua! O lea na apoapoai atu ai Iesu, “O lē sili i a te outou e fai lea ma a outou auauna.”

Ona sosoo ai lea ma lona faailoa atu o le faasologa o auē i tusiupu ma Faresaio, i le taʻua pea o i latou o tagata pepelo. Fai mai a ia, sa latou “pupuni le malo o le lagi i tagata,” ma na latou “faauma fale o fafine ua oti a latou tane; ua faalevaleva foi a latou tatalo e fai ma ufiufi.”

Ona fetalai atu ai lea o Iesu: “Oi talofa i a te outou taʻitaʻi tauaso!” Na ia taʻusalaina le leai o ni aogā faaleagaga o le au Faresaio, e pei ona faaalia i manatu maumaututū eseese na latou faia. Mo se faaaoaoga na latou faapea mai, ‘Ai se tauto i le malumalu, ua o se meanoa lea, a o se tauto i le auro o le malumalu, ua mau lea.’ E ala i lo latou matuā faamamafaina o le auro o le malumalu na i lo o le faamamafaina o le tāua faaleagaga o lena nofoaga o le tapuaiga, na latou faaalia ai le leaga o a latou amio.

O lea, e pei ona sa ia faia muamua, na taʻusalaina e Iesu le au Faresaio mo le faagaloina o “mea silisili o i le tulafono, o le amiotonu, ma le alofa, ma le faamaoni” a ua matuā uaʻi atu i le totogiina o le sefuluaʻi, po o le lona sefulu o mea, o laulaau e lē tāua.

Na taʻua e Iesu le au Faresaio o “taʻitaʻi tauaso, ua faapilia le namu, a ua folo atoa le kamela.” Sa latou vaimamāina ese le namu mai i a latou uaina, e lē ona e faapea ua na o se iniseti, ae ona sa lē mamā foi e tusa ai ma a latou faiga faaletapuaiga. Peitai, o lo latou tuulafoaia o mea sa sili ona tāua o le Tulafono, sa faatusaina lea i le folo atoa o le kamela, o se manu foi sa lē mamā i a latou faiga faaletapuaiga. Mataio 22:41–23:24; Mareko 12:35-40; Luka 20:41-47; Levitiko 11:4, 21-24.

▪ Aisea na lē magagana ai le au Faresaio ina ua fesiligia i latou e Iesu e uiga i upu a Tavita i le Salamo 110?

▪ Aisea na faalautetele ai e Faresaio a latou filateri ma tuupao o o latou ofu?

▪ O le ā le fautuaga na avatu e Iesu i ona soʻo?

▪ O ā manatu maumaututū eseese sa faia e le au Faresaio, ma na faapefea ona taʻusalaina i latou e Iesu ona o le tuulafoaia o mea sa sili ona taua?