Na Toe Iai i Lona Aiga i Kapanaumi
Mataupu 26
Na Toe Iai i Lona Aiga i Kapanaumi
O LE taimi lea ua aave atu ai le tautaua o Iesu i nuu uma, ma e toatele tagata na malaga mamao ane i le mea sa nofo ai o ia. Peitai, ina ua mavae ni nai aso, ona toe foi atu lea o ia i Kapanaumi e ui atu i le Sami o Kalilaia. Sa vave lava ona salalau atu le tala i le aai atoa e faapea, ua toe foi mai o ia i lona aiga, ma e toatele sa ō ane i le fale na iai o ia. O le mamao na ō ane ai le au Faresaio ma aʻoaʻo Tulafono, e oo lava i Ierusalema.
Ona o le toatele naua o le motu o tagata, na latou pupunia ai le faitotoa ma sa lē mafai ai ona toe ulu atu se tasi i totonu. Ua faapena ona oo ai i se tulaga o le a tupu ai se mea e sili ona mataina. O le mea na tupu i lena taimi e matuā tāua, auā o le a fesoasoani lea i a i tatou ina ia talisapaia ai e faapea, o loo iai i a Iesu le mana e aveesea ai le pogai o mafatiaga o tagata, ma toe faafoisia le soifua maloloina i a i latou uma ua ia filifilia.
A o aʻoaʻoina e Iesu le motu o tagata, ae fata ane loa i le fale e ni tamaloloa se toafā se tagata maʻi supa, i luga o se moega. Sa latou mananao ina ia faamalolo e Iesu la latou uo, ae sa lē mafai ona latou ulufale atu i totonu, ona o le tumu o tagata. Pagā lo latou lē fiafia! Ae latou te leʻi faavaivai ai. Sa latou ō aʻe i luga o le fale, ma faapu lona taualuga ae tuutuu ifo ai le moega o loo iai le tagata maʻi supa i tafatafa o Iesu.
Pe sa toatamai ea Iesu ona o lo latou faalavelave? E matuā leai lava! Na i lo lea, na matuā maofa o ia i lo latou faatuatua. Ua ia fetalai atu i le supa: “Ua faamagaloina au agasala.” Ae pe e mafai moni ea e Iesu ona faamagaloina agasala? Sa lē faapena le manatu o le au tusiupu ma le au Faresaio. Ua latou faapea ifo i o latou loto: “Aisea ua soona tautala ai faapea lenei tagata? Ua upuvale o ia. E mafai ea e se tasi ona faamagaloina agasala seʻi vaganā le toatasi, o le Atua lea?”
I le silafiaina o o latou manatu, na fetalai atu ai Iesu i a te i latou: “Aisea ua outou manatunatu ai i nei mea i o outou loto? Po o lē fea e faigofie? o le fai atu ea i le supa, ‘Ua faamagaloina au agasala,’ po o le fai atu, ‘Inā tulai ia ma ave lou moega ma savali’?”
Ona faatagaina lea e Iesu o le motu o tagata, e aofia ai ma ē sa faitio i a te ia, ina ia vaai i se faaaliga uigaese e iloa ai o loo i a te ia le pule e faamagalo ai agasala i le lalolagi, ma iloa ai foi, o ia o le tagata silisili o ē uma na soifua mai. Ua liliu ane o ia i le supa ma fetalai atu i ai: “Tulai ia, inā ave lou moega, ma e alu i lou aiga.” Ona tulai loa lea o ia, ua savali atu i fafo ma lona moega i luma o i latou uma! Na matuā maofa tagata uma ma vivii atu i le Atua e faapea: “Matou te leʻi vaaia lava se mea faapenei”!
Na e matauina le taʻua e Iesu o le sootaga o agasala ma maʻi, atoa ma le sootaga o le faamagaloina o agasala ma le mauaina o le soifua maloloina faaletino? Ua fai mai le Tusi Paia, sa agasala lo tatou uluai tamā o Atamu, ma o lea ua tuufaasolo mai ai i a i tatou uma lava iuga o lena agasala, o maʻi ma le oti. Ae e ala i le pulega a le Malo o le Atua, o le a faamagaloina ai e Iesu agasala a i latou uma o ē alolofa i le Atua ma auauna i a te Ia, ona aveesea ai lea o maʻi uma lava. Maeu le lelei o lena mea! Mareko 2:1-12; Luka 5:17-26; Mataio 9:1-8; Roma 5:12, 17-19.
▪ O le ā tonu le mea mataina na tupu?
▪ Na faapefea ona oo atu le supa i a Iesu?
▪ Aisea ua tatou agasala uma ai, ae sa faapefea ona saunia e Iesu le faamoemoe ua mafai ai ona faamagaloina a tatou agasala ma maua le soifua maloloina lelei atoatoa?