Na Tuua le Fale o Iairo ae Toe Asiasi atu i Nasareta
Mataupu 48
Na Tuua le Fale o Iairo ae Toe Asiasi atu i Nasareta
SA TELE galuega a Iesu i lea aso—sa malaga ane i se vaa mai Tekapoli, le faamaloloina o se fafine na iai le puna toto, ma le toe faatuina o le afafine o Iairo. Ae sa leʻi muta ai i inā. E foliga mai, a o tuua e Iesu le fale o Iairo, e toalua ni tagata tauaso sa mulimuli atu i a te ia, ma alalaga atu e faapea: “Le Alo e, o Tavita, ia e alofa mai i a te i maʻua.”
I le taʻua o Iesu o le “Alo o Tavita,” na faailoa atu ai e nei tagata lo la talitonuga e faapea, o Iesu o le suli lea o le nofoaiga a Tavita, ma o ia o le Mesia folafolaina. Peitai, e foliga mai sa lē āno ane i ai Iesu i lo la alalaga atu mo se fesoasoani, pe atonu sa ia tofotofoina lo la maumauai. Ae sa leʻi fiu ai nei tagata. Sa la mulimuli atu lava i a Iesu seʻia oo i le mea sa api ai o ia, ma ina ua ia ulu atu i le fale, sa la mulimuli atu ai foi i totonu.
O inā na fesili ane ai Iesu: “Ua oulua faatuatua mai ea i a te aʻu ou te mafaia lenei mea?”
Na la tali atu ma le mautinoa: “Ioe, le Alii e.”
O lea, sa paʻi atu ai Iesu i o la mata ma fetalai atu: “E pei ona oulua faatuatua, ia faapea lava ona faia i a te oulua.” Ona faafuasei ai lea ona pupula o la mata! Ua matuā faatonuina foi i laua e Iesu: “Ia oulua, neʻi faailoa atu i se tasi.” Ae ona sa faatumuina i laua i le fiafia, na la lē amanaia ai le poloaiga a Iesu, a ua la ō ma taʻutaʻu atu o ia i le nuu uma.
A o faatoʻā ō ese atu lava nei tagata, ae avane loa foi i totonu se tagata na uluitinoina e temoni ma na gūgū ai. Na tulia e Iesu le temoni, ma sa toe tautala ai loa le tamaloa. Sa maofa uma le motu o tagata i nei vavega, ma faapea ane: “E leʻi tupu se mea faapea i Isaraelu anamua.”
Sa auai foi i inā le au Faresaio. E ui ina e leʻi mafai ona latou faafitia na vavega, ae ona o o latou manatu leaga, sa latou toe faitioina ai foi le pogai na faia ai e Iesu ana galuega mamana, e faapea: “O le taʻitaʻi o temoni ua tulia ai e ia o temoni.”
E leʻi umi lava talu ona mavae o ia mea, ae toe maliu atu foi Iesu i lona nuu o Nasareta, ma sa faatasi atu ai ona soʻo i lena taimi. Pe tusa o le tausaga muamua atu, sa ia asiasi atu ai i le sunako ma aʻoaʻo atu ai i inā. E ui ina sa muai ofo tagata i ana upu faamalie loto, ae mulimuli ane sa latou tetee i ana aʻoaʻoga ma taumafai e fasioti i a te ia. Peitai, ua toe taumafai nei foi ma le alofa mutimutivale Iesu e fesoasoani atu i ona uluai tuaoi.
A o iai i isi nofoaga, sa lolofi ane ai tagata i a Iesu, ae i inei e foliga mai sa leʻi faapena. O lea, i le aso Sapati, na alu atu ai o ia i le sunako e aʻoaʻo atu ai. Sa taufaiofo foi le toatele o i latou na faalogologo i a te ia. Na latou fesili ane: “O fea na maua ai e lenei tagata lenei poto ma ia vavega? E lē o le atalii ea lenei o le tufuga? E lē o Maria ea le igoa o lona tinā, o ona uso foi o Iakopo, ma Iosefa, ma Simona, ma Iuta? E lē o i a te i tatou ea ona tuafāfine uma? O fea la na maua ai e lenei tagata nei mea uma?”
O lo latou taofi, ‘o Iesu ua na o se tagata e pei o i tatou. Na tatou vāai o tuputupu aʻe o ia, ma ua tatou iloa foi lona aiga. E faapefea la ona avea o ia ma Mesia?’ O lea e ui lava i nei faamaoniga uma—o lona poto uigaese ma vavega—ae sa latou teena lava o ia. Ma e talu ai lo latou iloa lelei o ia, sa oo lava i tagata o lona aiga, na latou faatausuai i a te ia, ma faapogaia ai Iesu e faia se faaiuga faapea: “E lē mamalu se perofeta i lona lava nuu ma ona tauaiga, atoa ma lona aiga.”
O le mea moni, sa matuā ofo lava Iesu i lo latou lē faatuatua. O lea na ia lē faia ai ni vavega i inā, seʻi vaganā ai ni nai tagata mamai na faaee atu i ai ona aao ma malolo ai i latou. Mataio 9:27-34; 13:54-58; Mareko 6:1-6; Isaia 9:7.
▪ I le taʻua o Iesu o le “Alo o Tavita,” na faaalia ai sa talitonu tagata tauaso i le ā?
▪ O le ā le faamatalaga na tautū i ai le au Faresaio mo vavega a Iesu?
▪ Aisea sa avea ai o se alofa mutimutivale o Iesu le toe foi atu e fesoasoani i a i latou i Nasareta?
▪ Sa faapeī le tali ane a tagata i a Iesu i Nasareta, ma aisea?