Mataupu 79

Na Tuulafoaia le Nuu, ae Leʻi Tuulafoaia Uma

E LEʻI pine ona uma le talanoaga a Iesu ma i latou na faapotopoto ane i fafo o le fale o se Faresaio, ae taʻu atu loa e nisi i a te ia “e uiga i tagata Kalilaia o ē na faafefiloi e le [kovana Roma, o Ponotio] Pilato o latou toto ma ā latou taulaga.” O nei tagata Kalilaia, atonu o i latou ia na fasiotia ina ua tetee faasagatau le faitau afe o tagata Iutaia, ona o le faaaogāina e Pilato o tupe mai le mea e teu ai tupe o le malumalu, e fausia ai se alāvai e faatafe atu ai le vai i totonu o Ierusalema. Atonu sa manatu i latou na taʻuina atu lenei mataupu i a Iesu e faapea, na puapuagatia ia tagata Kalilaia i le mala ona o a latou lava galuega leaga.

Peitai, na faasaʻo e Iesu i latou i lona fesili atu: “Pe ua outou manatu ea, ua sili atu ona agasala ia tagata Kalilaia na i lo o isi Kalilaia uma, ona ua tigaina i latou i nei mea? Na tali atu Iesu: “E matuā leai lava.” Ona ia faaaogāina lea o lena mea e lapataia ai tagata Iutaia e faapea: “Afai tou te lē salamō, e faapena lava ona fano o outou uma.”

I le faaauau pea, na toe faamanatu atu ai e Iesu se isi mala na tupu i le nuu, atonu e fesootai foi ma le fausiaina o le alāvai. Sa ia fesili atu: “E toasefulu valu na paʻū i ai le olo i Seloa ma latou feoti ai, pe tou te manatu ea ua sili atu a latou agasala i tagata uma o ē o loo nonofo i Ierusalema”? E leai, e lē ona o le leaga o nei tagata ua feoti ai i latou, e pei o le faamatalaga a Iesu. Na i lo lea, “o le taimi ma le mea e tupu ai” e masani lava ona mafua ai nei mala. Peitai, sa toe faaaogā foi e Iesu lena mea e lapatai atu ai e faapea: “Ae afai tou te lē salamō, e faapena lava ona fano o outou uma.”

Ona faaauau lea ona avatu e Iesu se tala faatusa fetaui, i le faamatala atu: “Sa iai i le tasi tagata le mati na totō i lona tovine, ua alu atu o ia e saili ai ni fua, ae leʻi maua. Ona fai atu lea o ia i lē galue vine, ‘Ua tolu nei tausaga o oʻu sailia ni fua o lenei mati, ae ou te leʻi maua ai lava se fua. Inā tuu ia i lalo! Se ā foi le mea ua tuua ai le fanua e aunoa ma ni mea aogā e maua mai ai?’ Ua tali ane o ia i le Matai, e faapea, ‘Le alii e, toe tuu pea ia mo lenei tausaga seia oʻu eli faataaliolio i ai, ma avane i ai ni faalelei eleele; afai foi e fua mai e lelei, e lelei; ae afai e leai, e mulimuli ane ona e tuu ai lea i lalo.’”

E sili atu i le tolu tausaga o taumafai Iesu e totōina le faatuatua i le nuu o Iutaia. Ae na o ni nai selau o soʻo sa mafai ona avea ma fua o ana galuega. O lea, i lenei tausaga lona fa o lana faiva, na ia matuā faamalosia ai ana taumafaiga i se uiga faafaatusa, o le eli lea ma tuu faataamilo ai faalelei eleele i le laau o le mati faa-Iutaia, e ala i le talaʻi ma aʻoaʻo atu ma le maelega i Iutaia ma Perea. Peitai e leʻi manuia! Sa lē fia salamō le nuu ma o lea na tuu ai mo le faaumatiaga. Ua na o se vaega totoe lava o le nuu na talilelei ane.

E leʻi mamao atu, ae faia loa aʻoaʻoga a Iesu i le sunako i le Sapati. O i inā na ia silafia ai se fafine o lē na ulufia e se temoni, ma faanoʻunoʻu ai mo le 18 tausaga. Ona o le alofa mutimutivale, na fetalai atu Iesu i a te ia: “Funa e, ua faamaloloina lou vaivai.” I lea, na faaee atu ai ona aao i luga o le fafine, ma o le taimi lava lena na tu saʻo ai o ia ma ua vivii atu i le Atua.

Peitai, sa ita le alii pule o le sunako. Ua ia tetee atu: “E ono aso e tatau ona galulue ai. O aso ia tou te ō mai ai ina ia faamaloloina, ae aua lē ō mai i le sapati.” Sa amanaia e le alii pule le mana o Iesu e faamaloloina ai maʻi, peitai na ia tausalaina tagata ona o le ō ane ina ia faamaloloina i le Sapati!

Na tali atu Iesu: “O oe na le pepelo, po ua lē taitasi ea outou i le sapati ma tatala i lana povi, po o lana asini mai le fale povi, ma taʻitaʻi e faainu? Pe ua lē tatau ai ea la i lenei fafine, o le afafine o Aperaamo, ma o lē ua noanoatia e Satani mo tausaga e 18, ona tatalaina o ia ai lenei noanoataga i le aso sapati?”

Ia, ina ua latou faalogo i lenei mea, ona mamā ai lea o i latou sa tetee i a Iesu. Peitai, sa olioli le motu o tagata ona o mea mamana uma sa latou vaai i ai o faia e Iesu. I lana tali atu, na toe taʻu atu ai foi e Iesu ni tala faatusa faavaloaga se lua, e faatatau i le Malo o le Atua, ia sa ia faamatalaina atu mai le vaa i luga o le Sami o Kalilaia e tusa o se tausaga ua mavae atu. Luka 13:1-21; Failauga 9:11; Mataio 13:31-33.

▪ O ā mala o loo taʻua i inei, ma o le ā le lesona na avatu e Iesu i a i latou?

▪ O le ā se faatatauga e mafai ona faia e uiga i le laau o le mati e lē fua, faapea ma taumafaiga na faia ina ia fua?

▪ Na amanaia faapefea e le alii pule le mana o Iesu e faamaloloina ai maʻi, peitai na faaalialia faapefea e Iesu le pepelo o le tamaloa?