Mataupu 32

O ā Mea e Faataga i le Sapati?

I SE tasi o Sapati, na asiasi atu ai Iesu i se sunako e latalata ane i le Sami o Kalilaia. Sa iai i inā se tamaloa sa gase lona lima taumatau. Na tulimatai lelei ane lava e le au tusiupu ma Faresaio po o le a faamalolo o ia e Iesu. Mulimuli ane sa latou fesili atu e faapea: “Pe faataga ea ona faamalolo i le sapati?”

Sa talitonu taʻitaʻi lotu Iutaia, e faataga ona faamalolo i le Sapati pe afai e lamatia ai le ola. Mo se faaaoaoga, sa latou aʻoaʻoina e faapea, e faasa ona faasaʻo se ponaivi pe fusi se manuʻa i le Sapati. O lea na tuufesili ane ai le au tusiupu ma Faresaio i a Iesu ona o le fia maua o se mea e molia ai o ia.

Peitai, sa silafia e Iesu o latou manatunatuga. I le taimi lava e tasi, na ia silafia ai foi lo latou aumaia o se manatu e matuā lē faale-Tusi Paia lava, e uiga i mea e aofia ai i le solia o tuutuuga o le aso Sapati, lea sa faasaina ai galuega. O lea, na faatulaga ai e Iesu se fetaiaiga mataina e ala i lona fetalai atu i le tamaloa sa gase lona lima: “Inā tulai ia, ma sau i le ogatotonu.”

Ona liliu atu lea o Iesu i le au tusiupu ma Faresaio, ua fetalai atu: “O ai ea so outou e ana le mamoe e tasi, afai foi e paʻū o ia i le lua i le sapati, e lē tago ea i ai, ma ave aʻe i luga?” Talu ai ona sa fai mamoe ma alagatupe, latou te lē tuua ai pea la i le lua seia oo i le aso e sosoo ai, auā atonu o le a maʻi ai ma lē maua ai se tau telē. E lē gata i lea, ua faapea mai le Tusi Paia: “Ua faapelepele le tagata amiotonu i lana manu.”

Sa faaauau ona fetalai atu Iesu e ala i le faia o se faatusatusaga e faapea: “E lē sili atu ai ea le tagata i le mamoe! O lea e tatau ai ona agalelei i le sapati.” Sa lē mafai ona faafitia e taʻitaʻi lotu le moni ma le tiga alofa o na fetalaiga, ma sa lē mautali ai i latou.

I lona toatamai ma le faanoanoa i lo latou faauamaaa faatagā vālea, na silasila solo atu ai Iesu i a te i latou. Ona ia fetalai atu lea i le tamaloa: “Inā faaloaloa ia lou lima.” Ona faaloaloa ai lea e ia ma mālōlō ai lona lima.

Na i lo le fiafia ua faamaloloina le lima o le tamaloa, sa ō loa i fafo le au Faresaio ma ua taupulepule ma le au Herotiano ina ia fasioti i a Iesu. O lenei vaega faapolotiki e foliga mai sa aofia ai sui o le lotu a le au Satukaio. Sa masani lava ona aliali i lumamea feteenaiga a lenei vaega faapolotiki ma le au Faresaio, ae na matuā autasi lava i latou i lo latou tetee atu i a Iesu. Mataio 12:9-14; Mareko 3:1-6; Luka 6:6-11; Faataoto 12:10; Esoto 20:8-10.

▪ O le ā le pogai o le fetaiaiga mataina i le va o Iesu ma taʻitaʻi lotu Iutaia?

▪ O le ā sa talitonu i ai nei taʻitaʻi lotu Iutaia e uiga i faamalologa i le Sapati?

▪ O le ā le tala faatusa na faaaogā e Iesu e faamaonia ai le sese o o latou manatu?