O ā Mea e Leaga ai le Tagata?
Mataupu 56
O ā Mea e Leaga ai le Tagata?
SA OO ina malolosi teteega i a Iesu. E lē gata ina ō ese le toatele o ona soʻo ae sa saili foi tagata Iutaia e fasioti i a te ia, e pei lava ona latou faia a o iai o ia i Ierusalema i le taimi o le Paseka i le 31 T.A.
Ua oo nei i le taimi o le Paseka i le 32 T.A. Atonu, e tusa ai ma mea sa manaomia e le Atua ia auai atu i ai, na maliu atu ai Iesu i le Paseka i Ierusalema. Peitai, sa ia maliu atu ma le faaeteete ona sa lamatia lona soifua. Ina ua mavae lena, ona ia toe foi ane lea i Kalilaia.
Atonu sa iai Iesu i Kapanaumi ina ua ō ane i a te ia Faresaio ma le au tusiupu mai Ierusalema. Sa latou mataʻitūina ni mafuaaga e molia ai o ia i le solia o tulafono faalelotu. Ua latou fesili atu: “Aisea ua soli ai e ou soʻo uputuu a ē anamua? Mo se faaaoaoga, e lē fafano o latou lima pe a oo ina ʻaai.” Sa lē o se mea lena na manaomia e le Atua, peitai sa manatu i ai Faresaio o se tetee matuiā le lē faia o lena tu faalelotu, lea sa aofia ai le fufuluina e oo lava i tulilima.
Na i lo o le tali atu i a te i latou e tusa ai ma la latou tuuaiga, sa faasino atu e Iesu i la latou amioga leaga o le solia lea ma le loto i ai o le Tulafono a le Atua. Sa ia faapea atu i lona fia iloa: “Aisea ua outou soli ai foi le poloaiga a le Atua ona o a outou uputuu? Mo se faaaoaoga, na fetalai mai le Atua, ‘Ia e āva i lou tamā ma lou tinā’; ma, ‘O sē upuvale i le tamā po o le tinā ia fasiotia lava o ia.’ A ua outou fai mai, ‘O sē fai atu i lona tamā po o lona tinā: “So o se mea o i a te aʻu e aogā i a te oe, o le meaalofa lea e tuuina atu i le Atua,” ua lē toe āva ai o ia i lona tamā.’”
Ioe, sa aʻoaʻo atu e Faresaio faapea, o tupe, o mea totino, po o so o se mea lava na tuuina atu e fai ma meaalofa i le Atua, e tatau ona teu i le malumalu ma e lē mafai ona faaaogāina i se isi lava fuafuaga. Ae o le mea moni, o le meaalofa na tuuina atu sa masani ona taofia lea e lē na ia tuuina atu. I lena auala, ua na ona faapea atu ai o le atalii, o lana tupe po o lana mea totino e “kopano”—o se meaalofa ua tuuina atu i le Atua po o le malumalu—ma ua alofia ai lana avega tauave o le fesoasoani atu i ona mātua ua matutua, o ē atonu o loo iai i ni tulaga pagatia.
Ona o lona inoino i le faauiga sese e Faresaio o le Tulafono a le Atua, na fetalai atu ai Iesu: “Ua outou faaleaogāina le afioga a le Atua ona o a outou uputuu. O outou tagata pepelo, ua moni lava le valoaga a Isaia e uiga i a te outou, ina ua ia faapea mai, ‘E vivii mai nei tagata i a te aʻu i o latou laugutu, a o o latou loto e matuā mamao lava ia i a te aʻu. E lē aogā ona latou tapuai mai pea i a te aʻu, auā ua latou faia poloaiga a tagata ma aʻoaʻoga.’”
Atonu na ala ona tuumuli le motu o tagata, ina ia mafai ai e Faresaio ona tuufesili atu i a Iesu. Ae, ina ua lē mafai ona tali ane Faresaio i aoaiga malolosi a Iesu i a te i latou, sa ia valaau atu loa i le motu o tagata e faalatalata ane. Ua ia fetalai atu foi i ai: “Inā faalogo mai ia i a te aʻu, ma ia outou iloa le uiga. E lē o mea ua tuu i totonu o le tagata e leaga ai o ia; ae o mea e sau mai totonu o le tagata o mea ia e leaga ai le tagata.”
Mulimuli ane, ina ua latou ulu atu i se fale, ona fesili atu lea o ona soʻo: “Ua e silafia ea sa tausuai Faresaio ina ua faalogo i lau fetalaiga?”
Na tali atu Iesu: “O laau uma e leʻi totoina e loʻu Tamā o i le lagi, o le a liaiina. Tuu ai pea i latou. O taʻitaʻi tauaso i latou. Afai foi e taitaiina e le tauaso le tauaso, ona la pauu uma ai lea i le lua.”
E foliga mai na ofo Iesu ina ua fesili atu Peteru e fai ma sui o le au soʻo, mo se faamaninoga e faatatau i mea e leaga ai le tagata. Na tali ane Iesu: “Tou te lē au malamalama ea foi outou? Tou te lē au iloa ea, o mea uma ua tuu i le gutu, ua oo ia i le manava, ona lafoaiina lea i le māliuga? Peitai, o mea e sau mai le gutu e sau mai le loto, ma o mea na e leaga ai le tagata. Mo se faaaoaoga, e alu aʻe mai le loto o manatunatuga leaga, o le fasioti tagata, o le mulilua, o le faitaaga, o le gaoi, o le molimau pepelo, ma upuleaga. O mea ia e leaga ai le tagata; ae o le ʻai ma lima e leʻi fafanoina e lē leaga ai se tagata.”
Sa leʻi faaleaogaina e Iesu i inā le tausia o le tumamā. E leʻi finau atu foi o ia e faapea e lē manaomia e se tagata ona fafano ona lima a o sauniunia se mea taumafa po o le pe a taumafa foi. Na i lo lea, sa taʻusalaina e Iesu le pepelo o taʻitaʻi lotu o ē sa matuā taumafai aʻiaʻi e mimilo tulafono amiotonu a le Atua, e ala i le tausisi i uputuu e lē faale-Tusi Paia. Ioe, o galuega leaga e faaleagaina ai le tagata, ma sa faaalia e Iesu, o na mea e mapuna aʻe mai le loto o le tagata. Ioane 7:1; Teuteronome 16:16; Mataio 15:1-20; Mareko 7:1-23; Esoto 20:12; 21:17; Isaia 29:13.
▪ O ā teteega na fesagai ma Iesu?
▪ O le ā le tuuaiga na faia e Faresaio, ae e tusa ai ma le manatu o Iesu, sa faapefea ona solia ma le loto i ai e Faresaio le Tulafono a le Atua?
▪ O le ā le mea na faaalia e Iesu e leaga ai le tagata?