Mataupu 39

O Ē Faamaualuluga ma Ē Faamaualalalo

INA ua uma ona taʻua uiga lelei o Ioane le Papatiso, ona liliu atu lea o Iesu i tagata faamaualuluga ma le loto fefete sa siomia ai o ia. Ua ia folafola atu e faapea: “E faatusaina lenei tupulaga i tamaiti o loo nonofo i maketi ma valaau atu i a latou aumea taaalo, e faapea, ‘Ua matou ili atu le fagufagu ae tou te leʻi saasaa mai; ua matou tagiauē atu, ae tou te leʻi taufaitagituʻi mai.’”

O le ā le uiga o na fetalaiga a Iesu? Fai mai a ia: “Na sau Ioane e leʻi ʻai ma e leʻi inu ia, a ua fai mai tagata, ‘Ua i a te ia le temoni’; na sau le Atalii o le tagata ua ʻai ma inu, a ua fai mai foi tagata, ‘Faauta i le tagata ʻai tele ma le inu tele i uaina, o le uo a le au ao lafoga ma ē agasala.’”

Sa faigata ona faamalieina tagata. E augapiu ma se mea e mafai ona faamalieina ai i latou. Na ola Ioane i se olaga faigata e ala i le faasāsāina o ia e fai ma Naseri, ona o le folafolaga a le agelu e faapea “e lē tatau ona inu o ia i se uaina po o se ava malosi.” Ae fai mai tagata ua uluitinoina o ia e le temoni. I le isi itu, sa soifua Iesu e pei o isi tagata sa saoloto, ae na faitioina foi o ia i lona faaloloto.

Pagā le faigata ona faamalieina o tagata! E pei lava i latou o ni aumea taaalo, o nisi e mumusu e sisiva atu ina ua ili mai e isi tamaiti le fagufagu pe taufaitagituʻi atu foi pe a tagiauē mai a latou uō. Peitai ane, na fetalai atu Iesu: “E taʻuamiotonuina le poto i ana galuega.” Ioe, o le faamaoniga—o galuega—na faamanino ai le sese o tuuaiga na faia i a Ioane ma Iesu.

Sa faaauau le fetalaiga a Iesu i lona taulaʻi atu i ni aai se tolu mo le faalumaina o Koasini, Petesaita, ma Kapanaumi, ia sa faia ai le tele o ana galuega mamana. Ua fetalai atu Iesu, ana ou faia na galuega i aai o Foinie, o Turo ma Saitonu, semanū e salamō na aai i le ie talatala ma le lefulefu. I le taʻusalaina o Kapanaumi, lea e foliga mai sa avea ma ona nofoaga autū i le vaitaimi o lana faiva, na faapea atu ai Iesu: “E feololo le nuu o Sotoma i le Aso Faamasino i a te oe.”

Ona sosoo ai lea ma le vivii atu o Iesu i lona Tamā faalelagi i luma o le lautele. Na uunaia o ia e faia faapea ona ua natia e le Atua upu moni tāua faaleagaga mai ē popoto ma ē atamamai, ae faaalia atu na mea ofoofogia i ē faamaualalo, ma tamameamea.

I le faaiuga, sa fofoga atu ai e Iesu le valaaulia faatosina e faapea: “Inā ō maia i a te aʻu o outou uma o ē tigaina ma mafatia i avega, ona ou faamaloloina lea o outou. Ia outou amoina laʻu amo ma faaaoao mai i a te aʻu, auā o aʻu le agamalu ma le loto maulalo, ona maua lea e outou o le malologa mo o outou agaga. Auā e avegofie laʻu amo, o laʻu avega foi e māmā ia.”

Sa faapefea ona ofo atu e Iesu le malologa? Na ia faia faapea e ala i le saunia o le saolotoga mai uputuu e faapologaina ai, ia na faaee atu e taʻitaʻi lotu i tagata, mo se faaaoaoga, e aofia ai tulafono maumaututu mo le tausia o le Sapati. Sa ia faailoa atu foi le auala e maua ai le mapusaga e i latou o ē sa mafatia i le mamafa o pulega a pule faapolotiki, ma i a i latou sa mafatia i le mamafa o a latou agasala ona ua oia le loto fuatiaifo. Sa ia faaalia atu i na tagata mafatia le auala e faamagaloina ai a latou agasala ma le auala e mafai ai ona latou maua se faiā tāua ma le Atua.

O le avega avegofie sa ofoina atu e Iesu, o le tuuina atu atoatoa lea i le Atua, o le mafai lea ona auauna atu i lo tatou Tamā faalelagi e tigaalofa, ma alofa mutimutivale. Ma o le avega māmā sa ofo atu e Iesu i a te i latou o ē ō mai i a te ia, o le usiusitai atu lea i mea e manaomia e le Atua mo le olaga, o Ana poloaiga ia o loo faamauina i le Tusi Paia. Ma o le usiusitai i nei mea e lē o se avega mamafa. Mataio 11:16-30; Luka 1:15; 7:31-35; 1 Ioane 5:3.

▪ Sa faatusaina faapefea i tamaiti tagata faamaualuluga ma le faafefeteina o le tupulaga a Iesu?

▪ Aisea na uunaia ai Iesu e vivii atu i lona Tamā faalelagi?

▪ I ā auala na mafatia ai tagata, ma o le ā le mapusaga na ofo atu e Iesu?