O Ē Galulue i le Tovine
Mataupu 97
O Ē Galulue i le Tovine
FAATOʻĀ uma lava ona fetalai atu Iesu: “E toatele ē muamua o le a avea ma ē mulimuli, o ē mulimuli foi o le a avea ma ē muamua.” A o lea la, o le a ia faataitaia lena mea e ala i lona faamatalaina o se tala. Fai mai a ia: “Ua tusa le Malo o le lagi ma le tasi tagata, o le matai o le aiga, o lē na ala usu lava i le taeao e valaau i nisi ina ia galulue i lona tovine ae taui atu.”
Sa faaauau ona faamatala atu e Iesu: “Ina ua uma ona faia o se maliega [a le matai o le aiga] ma ē galulue i se totogi e tasi le tenari mo le aso, ona ia aauina atu lea o i latou i le tovine. Ua alu atu foi o ia i le itu aso e tolu ona ia vaaia ai lea o isi o loo tutū i le maketi e lē o faia ni galuega; ua ia fai atu foi i a te i latou na, ‘Inā ō atu ia ma outou i le tovine, ou te avatu ai i a te outou o mea e tusa ai.’ Ona latou ō atu ai lea. Ua ia toe alu atu foi i le itu aso e ono ma faapena foi i le itu aso e iva. Mulimuli ane, ona ia alu atu ai lea i le itu aso e sefulutasi ma iloa ai isi na tutū i le maketi i le aso atoa e leʻi faia ni a latou galuega, ona ia fai atu lea i a i latou, ‘Aisea ua outou tutū ai i inei i le aso atoa ae lē faia ni a outou galuega?’ Ona latou fai ane lea i a te ia, ‘Auā e leʻi valaauina i matou e se tasi.’ Ona ia fetalai atu lea i a te i latou, ‘Inā ō atu foi ia ma outou i le tovine.’”
O le matai o le aiga po o lē ana le tovine, o Ieova le Atua, a o le tovine o le nuu lea o Isaraelu. O ē galulue i le tovine o tagata ia na aumaia i le feagaiga o le Tulafono; e patino lava i tagata Iutaia na ola i aso o le ʻau aposetolo. E na o ē lava sa galulue i le aso atoa na faia ai se maliega mo se totogi. O le totogi, e tasi le tenari i le aso faigaluega. Talu ai o le “itu aso e tolu” e tusa lea o le 9:00 i le taeao, o i latou la na valaaulia ina ia galulue i le itu aso e 3, 6, 9, ma le 11, e tusa na o le 9, 6, 3 ma le 1 le itula sa galulue ai e tusa ma le faasologa.
O tagata sa galulue mo itula e 12, po o le aso atoa, ua faaatagia ai taʻitaʻi lotu Iutaia o ē sa faaauau pea ona latou faia le auaunaga faalelotu. Sa leʻi pei i latou o soʻo o Iesu, o ē na faigaluega i le tele o taimi o o latou olaga, i faiga faiva po o isi galuega masani. Ina ua oo i le tau e afu ai mea i le 29 T.A. ona auina atu lea o Iesu Keriso e le “matai o le aiga” ina ia aoaoina i latou na e fai mona soʻo. O lea, na avea ai i latou ia ma ē “mulimuli,” po o ē na amata galulue i le tovine i le itu aso e 11.
Mulimuli ane, ona faaiuina lea o le aso faigaluega faafaatusa ina ua maliu Iesu, ma ua oo i le taimi e totogi ai tagata faigaluega. O loo mulimuli mai le aiaiga e lē masani ai o le totogi muamua lea o le tagata na mulimuli faigaluega, e pei ona faamatalaina e faapea: “Ina ua oo i le afiafi, ona fai atu ai lea o le matai e ana le tovine i lana auauna pule, ‘Valaau ia i ē galulue ma avatu i a i latou o latou totogi, ia amata mai i ē na mulimuli seia oo i ē na muamua.’ Ina ua ō ane ē na amata galulue i le itula e sefulutasi, sa maua uma e i latou o tenari taitasi. O lea, ina ua ō ane ē na muamua, sa latou manatu o le a sili atu ni a latou mea e maua; ae sa latou maua foi le totogi o le tenari. Ina ua maua o latou totogi, ona latou muimui ai lea i le matai o le aiga ma faapea atu, ‘O i latou nei na mulimuli, e na o le taitasi lava itula na galulue ai; a ua e faatutusa i latou ma i matou o ē na galulue ma le tiga i le aso atoa i le vevela o le la!’ Peitai, i lana tali atu i le tasi o i latou, na ia faapea atu ai, ‘Sole, e leai se mea sese ua ou faia i a te oe. Ta te leʻi ioe ea i le tenari e tasi? Inā ave ia lau mea ma e alu. Ou te manao e avatu i le tagata mulimuli le mea e tasi e pei ona avatu i a te oe. E lē faitalia ea aʻu ona pule i aʻu lava mea? Pe e te faaūū mai ea ina ua ou lelei?” I le faaiuga na toe taʻua ai e Iesu le manatu na ia uluai taʻua: “E faapea ona muamua o ē na mulimuli, e mulimuli foi ē na muamua.”
Sa leʻi tufaina atu tenari ina ua maliu Iesu, ae na tufaina atu i le Penetekoso o le 33 T.A., ina ua liligi ifo e le “auauna pule” o Keriso, le agaga paia i luga o ona soʻo. O na soʻo o Iesu sa pei o “ē na mulimuli,” po o tagata na amata galulue i le itula e 11. Ua lē faaataina i le tenari, le meaalofa o le agaga paia lava ia. O le tenari, o se mea lea sa faaaogā e le ʻau soʻo i luga o le lalolagi. O se mea e aogā i o latou olaga, po o lo latou ola e faavavau. O le faaeaga lea o le iai i le Isaraelu faaleagaga, ua faauuina e talaʻi le Malo o le Atua.
E leʻi pine ae matauina e i latou na valaauina muamua, ua tauia le ʻau soʻo o Iesu, ma ua latou vāaia le faaaogaina e i latou o le tenari faafaatusa. Peitai, sa latou mananao i ni mea e sili atu na i lo o le agaga paia ma ona faaeaga o le Malo. Na faatinoina lo latou muimui ma lo latou tetee, e ala i le sauaina o soʻo o Keriso, o ē sa galulue “mulimuli” i le tovine.
Pe na pau ea le faataunuuga o le tala faatusa a Iesu, o le faataunuuga lea i le uluai senituri? E leai, ua faataunuuina foi i taʻitaʻi lotu o Kerisinetoma i lenei 20 o senituri, ona o o latou tulaga ma avega tauave o ni ē sa valaauina “muamua” ina ia galulue i le tovine faafaatusa a le Atua. Ua latou manatu i tagata talaʻi tuuina atu o loo auaufaatasi ma le Watchtower Bible and Tract Society o ē faatoʻā “mulimuli” nei ona latou mauaina o so o se tofiga aogā i le auaunaga a le Atua. Ae o le mea moni, o i latou moni ia, o ē ua inosia e taʻitaʻi lotu, o ē ua mauaina le tenari—o le faaeaga lea o le avea ma avefeau o le Malo faalelagi o le Atua. Mataio 19:30–20:16.
▪ O le ā ua faaataina i le tovine? O ai ua faaataina i lē e ana le tovine ma ē sa galulue i itula e 12, ma ē sa galulue i le itula e 1?
▪ O anafea na iu ai le aso faigaluega faafaatusa, ma o anafea na faia ai le totogi?
▪ O le ā ua faaataina i le totogi o tenari?