O Ai Moni Lava Iesu?
Mataupu 59
O Ai Moni Lava Iesu?
I NA ua taunuu le vaa sa folau ai Iesu ma ona soʻo i Petesaita, ona avane lea e tagata i a te ia o se tagata tauaso ma ole atu ina ia papai ane i le tamaloa ma faamalolo i a te ia. Ua taʻitaʻi foi e Iesu le tamaloa i tua o le aai, ma ina ua uma ona ia feanu i ona mata ona fesili atu lea: “Ua e iloa atu se mea?”
Na tali ane le tamaloa: “Ua ou iloa atu tagata, e faapei o laau o loo savavali.” Sa toe papai atu aao o Iesu i mata o le tamaloa, ma na toe lelei ai lana vaai ma ua manino ai. Ona auina atu lea e Iesu o le tamaloa i lona aiga faatasi ma le faatonuga, ia aua neʻi ulu atu i totonu o le aai.
Sa ō atu loa Iesu ma ona soʻo i le nuu o Kaisareia Filipi, i le tulimanu i mātū o Palesitina. E tusa ma le 30 maila [po o le 50 kilomita] le umī o lena aʻega, agaʻi i le nofoaga matagofie o Kaisareia Filipi, lea e pe ā ma le 1,150 futu [po o le 350 mita] i luga aʻe o le fogatai. E tusa ma le lua aso o alu le malaga.
A o ō atu i latou i le ala, na maliu ese ai Iesu na o ia e tatalo. O le taimi lena sa toe iva pe toe sefulu ni masina, a o leʻi oo i lona maliu, ma sa manatu mamafa o ia i ona soʻo. E toatele sa ō ese mai i a te ia. O nisi e foliga mai sa fenuminumiai ma sa lē malilie ona o lona teena o taumafaiga a tagata ina ia fai o ia ma tupu, atoa foi ma lona lē tuuina atu o se faailoga mai le lagi e faamaonia ai lona tulaga tautupu, ina ua luia o ia e ona fili. O le ā sa talitonu i ai ona soʻo e uiga i a te ia? Ina ua latou ō ane i le mea sa ia tatalo ai, ona fesili atu lea o Iesu: “Pe se ā le upu a tagata i a te aʻu nei, po o ai?”
Ua latou tali ane: “Fai mai isi o oe o Ioane le Papatiso, a o isi o Elia, o isi o Ieremia, po o se tasi o le au perofeta.” Ioe, sa manatu tagata e faapea, o Iesu o se tasi o tagata na ua toe faatuina mai nai le oti!
Ona fesili atu lea o Iesu: “A o outou, pe se ā la outou upu i a te aʻu, po o ai?”
Sa vave lava ona tali atu Peteru: “O oe o le Keriso, o le Alo o le Atua soifua.”
Ina ua maeʻa ona faailoa atu lona ioeina o le tali a Peteru, ona fetalai atu loa lea o Iesu: “Ou te fai atu i a te oe, O Peteru oe, ma ou te ati aʻe foi laʻu ekalesia i luga o lenei papa, e lē mafaia foi e faitotoa o Seoli ona manumalo i ai.” O i inā na uluai faasilasila atu ai e Iesu, o le a ia atiina aʻe se faapotopotoga, ma e oo lava i le oti e lē mafai ona saisaitia ai ona sui, pe a maeʻa a latou auaunaga faamaoni i luga o le lalolagi. Ona ia fetalai atu lea i a Peteru: “Ou te avatu foi i a te oe ki o le malo o le lagi.”
Sa faapea ona faaalia ai e Iesu, o le a maua e Peteru ni faaeaga faapitoa. E leai, sa leʻi tuuina atu ai i a Peteru se tulaga muamua i lo isi aposetolo, sa leʻi avea ai foi o ia ma faavae o le faapotopotoga. O Iesu lava ia o le Papa, lea o le a atiina aʻe ai lana faapotopotoga. Ae i se isi itu, sa tuuina atu i a Peteru ni ki se tolu e tatala ai le avanoa mo tagata ina ia ulu atu ai i le Malo o le lagi.
Na faaaogā e Peteru le uluai ki i le Penetekoso o le 33 T.A., e taʻu atu ai i tagata salamō o Iutaia, le mea e tatau ona latou fai ina ia faaolaina ai. Sa leʻi pine mulimuli ane, ae ia faaaogāina le ki lona lua, e tatala ai le avanoa mo tagata talitonu o Samaria, ina ia ulu atu ai i le Malo o le Atua. Ma i le 36 T.A., na ia faaaogāina ai le ki lona tolu, e tatala atu ai lena lava avanoa i tagata o Nuuese lē peritomeina, o Konelio ma ana uō.
Sa faaauau le talanoaga a Iesu ma ona aposetolo. Na ia faatupuina i a te i latou le faanoanoa, e ala i lona taʻuina atu i ai o puapuaga ma le oti e lē o toe mamao ae oo i a te ia i Ierusalema. Ona e na te leʻi iloa o le a toe faatuina aʻe Iesu i le ola faalelagi, na taʻitaʻi ese ai e Peteru Iesu. Ua ia faapea atu i ai: “Le Alii e, ia mamao i a te oe lea mea; e lē oo lena mea i a te oe.” Na faliu ese Iesu ma tali ane i ai: “Satani e, ina alu ese ia oe i oʻu tua! Ua fai oe ma mea ou te tausuai ai, auā e lē o manatu o le Atua ua e manatu i ai, a o manatu o tagata.”
E manino lava, sa iai nisi e ese mai le au aposetolo na faimalaga faatasi ma Iesu, o lea na ia valaauina ai i latou ina ia ō ane i a te ia seʻi faamalamalama atu i ai, e lē faigofie ona avea se tasi mona soʻo. Ua ia fetalai atu: “Ai sē tasi e fia mulimuli mai i a te aʻu, aua neʻi usiusitai o ia i a te ia, a ia ave e ia lona satauro, ma mulimuli mai pea i a te aʻu. Auā ai sē fia faasaogalemuina lona ola, e māumau ai i a te ia; a o lē faamāumau lona ola ona o aʻu ma le tala lelei, e faasaoina e ia.”
Ioe, ina ia taʻuaogāina i latou i lona finagalo malie, sa tatau la i soʻo o Iesu ona loto tetele ma ia faataulagaina i latou lava. Na ia fetalai atu: “Auā ai sē mā i a te aʻu ma aʻu upu i lenei tupulaga mulilulua ma le agasala, e mā foi i a te ia le Atalii o le tagata, pe a sau o ia faatasi ma le au agelu paia i le mamalu o lona Tamā.” Mareko 8:22-38; Mataio 16:13-28; Luka 9:18-27.
▪ Aisea na manatu mamafa ai Iesu i ona soʻo?
▪ O ā manatu sa iai i tagata e uiga i a Iesu?
▪ O ā ki na tuuina atu i a Peteru, ma sa faapefea ona faaaogāina?
▪ O le ā le faasaʻoga na maua e Peteru, ma aisea?