Mataupu 58

O Areto ma le Mea Faafefete

NA LOLOFI ane le motu o tagata e toatele i a Iesu i Tekapoli. E toatele sa ō ane mamao lava i lenei vaega na nonofo ai le anoanoai o tagata o Nuuese, ina ia faalogologo i a te ia ma faamaloloina o latou maʻi tiga. Sa latou ō ane ma avane ni ato tetele, e masani ona ave ai o latou faaoso pe a latou sopoia atu laufanua o Nuuese.

Peitai, mulimuli ane, sa valaau atu Iesu i ona soʻo ma faapea atu i ai: “Ua ou alofa atu i le motu o tagata, auā o le aso tolu lenei o latou nonofo pea ma aʻu ma e leai foi ni ā latou meaai; afai foi ou te tuuina atu i latou e ō i o latou aiga o matelaina, e lailoa i latou i le ala. Auā e mamao mea na ō mai ai nisi o i latou.”

Na fesili atu le au soʻo: “O fea o lenei nofoaga tuese tatou te maua ai ni areto e fafaga ai nei tagata?”

Ua fetalai atu Iesu: “E fia ea ni a outou areto?”

Na faapea ane i latou: “E fitu, ma nai tamai iʻa.”

Ina ua uma ona faatonuina tagata e saofafai i le eleele, sa tago loa Iesu i areto ma iʻa, ua faafetai i le Atua, ona tofitofiina lea ma tuuina atu i ona soʻo. Ua latou tufatufa atu foi i tagata, o ē na aai uma ai lava seia oo ina maoona. Mulimuli ane, ina ua aoaoina toega meaai, e fitu ato tetele na tutumu ai, e ui lava ina e toʻa 4,000 tane, o fafine, atoa ma tamaiti na aai ai!

Ona faataape ai lea e Iesu o le motu o tagata, a ua feosofi o ia ma ona soʻo i le vaa, ma malaga atu ai i le itu i sasae o le Sami o Kalilaia. O i inā sa taumafai ai Faresaio faatasi ma ni sui o le lotu mavae a le au Satukaio i lena taimi e faaosooso i a Iesu, e ala i le fai atu na te faia se vavega mai le lagi.

Ina ua ia silafia a latou taumafaiga e faaosooso i a te ia, na tali atu ai Iesu e faapea: “A oo i le afiafi ua outou fai ane, ‘E laofie; auā ua mūmū mai le lagi.’ O le taeao foi ua outou fai ane, ‘E uaga le asō, auā ua mūmū ma ua faamalumalu ifo le lagi.’ Ua outou iloa ona matauina o faailoga o le lagi, a o faailoga o taimi tou te lē mafaia ona faamatalaina.”

O le mea lena na taʻua ai i latou e Iesu o se tupulaga amioleaga ma le mulilulua, na ia lapataia foi i latou e faapea, e pei lava ona ia muai taʻu atu i le au Faresaio, e leai se faailoga e tuuina atu i a te i latou, na o le faailoga o Iona. Sa latou tuua loa lena nofoaga, a ua ō atu o ia ma ona soʻo i le vaa ma agaʻi atu i Petesaita i le talafatai i mātū i sasae o le Sami o Kalilaia. A o latou ō, na iloa ai e le au soʻo e na o le tasi le potoi areto o loo i a te i latou, a ua galo ona latou aumaia isi areto.

I lona manatuaina o la latou fetaiaiga ma le au Faresaio ma Satukaio o ē sa lagolagoina Herota, na apoapoai atu ai Iesu: “Ia outou, ia matuā ʻalo ese i le mea faafefete a le au Faresaio ma le mea faafefete a Herota.” Ona o lona taʻua o le mea faafefete na manatu ai le au soʻo, o loo faatatau e Iesu i le galo ona latou aumaia o areto, o lea na latou fefinauai ai e uiga i le mataupu. Ina ua ia matauina lo latou lē malamalama, na fetalai atu ai Iesu: “Aisea ua outou fefinauai ai ina ua lē aumaia e outou o areto?”

Na seʻi faatoʻā mavae atu lava ona saunia faavavega e Iesu o areto mo le faitauafe o tagata, ma e tusa o le tasi i le lua aso ua tuanai sa ia faia ai foi lenei vavega mulimuli. Sa ao lava ona latou iloa e lē o manatu o ia i le lē lava o areto faaletino. O lea na ia faamanatu atu ai i a te i latou: “Tou te lē manatua ea, ina ua ou vaevaeina areto e lima mo tagata e toalimagaafe, e fia ato na outou fueʻa?”

Sa latou tali ane: “E sefululua.”

“Ina ua ou vaevaeina areto e fitu mo tagata e toafagaafe, e fia ato na outou fueʻa?”

Na latou tali ane: “E fitu.”

Ona fesili atu lea o Iesu: “Tou te leʻi au iloa ea la lona uiga? E lē o le areto na ou fai atu ai i a te outou, ia matuā ʻalo ese ai? A o le mea faafefete a le au Faresaio ma le au Satukaio.”

I le iʻuga, sa malamalama le au soʻo i le manatu. O le fefete, o se mea e faafefete ai le areto po o le falaoa, ma o se upu sa faaaogāina e faaatagia ai le iuvale. O lea na malamalama ai le au soʻo e faapea, sa faaaogāina e Iesu se tala faatusa e lapataia ai i latou ina ia puipui mai “aʻoaʻoga a le au Faresaio ma le au Satukaio,” o aʻoaʻoga na sa iai ona iuga iuvale. Mareko 8:1-21; Mataio 15:32–16:12.

▪ Aisea na ave ai e tagata ni ato tetele mo a latou faaoso?

▪ O ā malaga i vaa na faia e Iesu ina ua tuua Tekapoli?

▪ O le ā le malamalamaga sese sa iai i le au soʻo e faatatau i le faamatalaga a Iesu e uiga i le mea faafefete?

▪ O le ā sa uiga i ai le fetalaiga a Iesu e faatatau i le “mea faafefete a le au Faresaio ma le au Satukaio”?