Mataupu 63

O Fautuaga Atili e Faasaʻo Ai

A O IAI pea Iesu ma ona soʻo i le fale i Kapanaumi, sa talanoaina ai se isi mea e ese mai le finauga a le au aposetolo po o ai o i latou e sili. O lenei mea, atonu sa tupu ina ua latou taliu ane i Kapanaumi, ae o le taimi lea sa leʻi auai Iesu. Na taʻu atu e le aposetolo o Ioane: “Sa matou iloa se tasi tamaloa o tutuli temoni i lou suafa ma na matou taumafai e vaoia o ia, auā sa lē mulimuli mai o ia i a te i tatou.”

E foliga mai, sa manatu Ioane i le au aposetolo, o i latou o se vaega ua tofia faapitoa e faia faamalologa. O lea, na ia manatu ai, sa lē tonu ona faia e lena tamaloa o vavega, ona e lē o ia o se tasi o i latou.

Peitai na fautua atu Iesu: “Aua le vaoia o ia; auā e leai se tagata na te faia se vavega i loʻu nei igoa, na te mafaia ona vave tautala i se upu leaga i a te aʻu. Auā o lē e lē au ese i a te i tatou, e au faatasi lea ma i tatou. O sē na te avatu foi se ipu vai i a te outou i loʻu nei igoa ona e ō Keriso outou, e moni, ou te fai atu i a te outou, e lē māumau i a te ia lona taui.”

Sa lē tau manaomia ona mulimuli totino atu lenei tagata i a Iesu ina ia iai pea i ona tafatafa. O le taimi lena e leʻi faavaeina le faapotopotoga Kerisiano, o lea, sa leʻi avea lona lē mulimuli atu i le au aposetolo ma itu e faapea ai o loo auai o ia i se isi faapotopotoga ese. Sa faatuatua moni lava le tamaloa i le suafa o Iesu, ma faapea ona taulau ai i le tutulia o temoni. Na ia faia se mea e tutusa lelei ma le fetalaiga a Iesu e faapea, sa tatau i ai se taui. Ona o le faia o lena mea, na faaalia ai e Iesu, o le a lē māumau lona taui.

Ae faapefea pe ana tausuai le tamaloa i upu ma gaoioiga a le au aposetolo? E ono matuā matuia lena mea! Na faailoa atu e Iesu: “Ai sē na te faatausuaiina se tasi o i latou nei e faatauvaa o ē talitonu, e lelei i lea tagata pe a nonoa se maaolo tele i lona ua, ma lafoina o ia i le moana.”

Na taʻua e Iesu, e ao i ona soʻo ona aveesea mai o latou olaga, so o se mea e pele i a te i latou e pei o le lima, le vae, po o le mata e ono faapogaia ai ona tausuai i latou. E sili pe a aveesea na mea e pele i a te i latou, ae sao atu ai i le Malo o le Atua, na i lo o le taofi mau i ai ae lafoina i Kena (o se faatafuga o otaota e latalata i Ierusalema), lea sa faatusaina i ai le faaumatiaga e faavavau.

Na lapatai atu foi Iesu: “Ia outou, neʻi tou faaleaogāina se tasi o i latou nei e faatauvaa; auā ou te fai atu i a te outou, e lē aunoa ona vaavaai a latou agelu i le lagi i fofoga o loʻu Tamā o i le lagi.” Ona ia faataitaia lea o le tautele o “ē faatauvaa,” e ala i lona taʻuina atu o se tagata na iai mamoe e selau ae na leiloa le tasi. Fai mai Iesu, sa tuua e le tagata mamoe e 99 ae saili mo le mamoe na leiloa, ma ina ua ia maua, sa sili atu lona olioli ona o lea, na i lo o le 99. Na fetalai faaiu atu Iesu: “E faapena foi, e lē finagalo loʻu Tamā o i le lagi, ina ia fano se tasi o i latou nei e faatauvaa.”

Atonu ina ua ia manatuaina le finauga a lona au aposetolo, na timai atu ai Iesu: “Ia i a te outou le masima, ma ia outou tausia le filemu.” O meaai e magalogalo, e sili atu ona susua i le taumafa pe a faamasima. O lea, o le masima faafaatusa e faigofie ai ona talia le mea e fai atu ai se tasi. O le iai o se masima faapena, o le a fesoasoani lea e faatumauina ai le filemu.

Ae ona o le lē lelei atoatoa faaletagata, e tutupu ai finauga matuia i nisi taimi. Na saunia foi e Iesu ni taiala mo le taulimaina o na finauga. Sa fetalai atu Iesu: “Afai e agaleaga mai lou uso i a te oe, ia e alu e faalelei ma ia, tau lava o oe ma ia. Afai e faalogo mai o ia i a te oe, ua e maua lou uso.” Na fautua atu Iesu, ae afai e lē faalogo mai o ia, “lua te ō ma se tasi, po o se toalua, ina ia faamaonia ai upu uma i le mau a le toalua po o le toatolu.”

O le taumafaiga mulimuli lava na fetalai atu ai Iesu, o le avatu o le mataupu “i le faapotopotoga,” o lona uiga, i ovasia o loo iai lea avega tauave i le faapotopotoga o ē e mafai ona faia se iuga faafaamasinoga. Na faaiu atu e Iesu: “Afai e lē faalogo lava le tagata agasala i la latou faaiuga, ia avea o ia i a te oe e pei o se tagata o nuu ese, po o se ao lafoga.”

I le faia o sea faaiuga, e manaomia ai i ovasia ona pipii mau atu i faatonuga o loo i le Afioga a Ieova. Ma pe a latou iloa ua agasala se tagata ma ua tatau ona faasalaina, ua ‘uma la ona fusifusia i le lagi’ le faamasinoga. Ma pe a latou “tatalaina i le lalolagi,” o lona uiga, pe a iloa o loo taʻumamāina se tasi, ua uma foi la ona “tatalaina i le lagi.” E tusa ai ma na faaiuga faafaamasinoga, na fetalai atu Iesu, “o le mea e faapotopoto ai se toalua po o se toatolu i loʻu igoa, ou te iai faatasi ma i latou.” Mataio 18:6-20; Mareko 9:38-50; Luka 9:49, 50.

▪ I aso o Iesu, aisea sa lē tau manaomia ai ona ō faatasi ma ia?

▪ O le ā le matuia o le faatausuaiina o sē faatauvaa, ma sa faapefea ona faataitaia e Iesu le tāua o na tagata faatauvaa?

▪ O le ā atonu na mafua ai le faalaeiauga a Iesu mo aposetolo ina ia iai i a i latou le masima?

▪ O le ā sa faatatau i ai le ‘fusifusia’ ma le ‘tatalaina’?