Mataupu 74

O Fautuaga i a Mareta, ma Faatonuga i le Tatalo

I LE gasologa o le faiva a Iesu i Iutaia, na alu atu ai o ia i le nuu o Petania. O i inā sa nonofo ai Mareta ma Maria, atoa ma lo la tuagane o Lasalo. Atonu sa muai feiloai Iesu ma i latou ia e toatolu i lana faiva ma o lea sa avea ai o ia ma a latou uō mamae. E tusa foi pe latou te leʻi feiloai, sa maliu atu Iesu i le aiga o Mareta ma sa talileleia ai o ia.

Sa naunau Mareta e saunia mo Iesu mea e aupito sili ona lelei sa i a te ia. O le mea moni, o se matuā faaeaga lava le asiasi atu o le Mesia folafolaina i le aiga o se tasi! O lea sa pisi ai Mareta i le sauniunia o se taumafataga tele ma faamautinoa ua tapena uma isi fuafuaga mo le faafiafiaina ma le sologa lelei o le nofo ai o Iesu.

I le isi itu, sa saofai pea Maria le uso o Mareta i tafatafa o aao o Iesu, ma faalogologo i a te ia. Ina ua mavae sina taimi, ona alu ane lea o Mareta ma faapea atu i a Iesu: “Le Alii e, e te lē manatu mai ea, ina ua tuu mai e loʻu uso i a te aʻu e sauni toatasi? Ia e fetalai ane i a te ia, ina ia fesoasoani mai i a te aʻu.”

Peitai, sa leai se upu a Iesu i a Maria. Na i lo lea, na ia fautuaina Mareta ona o lona soona popole i mea faitino. Sa ia fautua atu ma le agalelei: “Mareta e, Mareta e, ua e popole ma ua pupū lou loto i mea e tele. Ae a maua lava ni mea itiiti po o se mea e tasi ua lava lea.” O le uiga o le fetalaiga a Iesu, e lē manaomia ona faaaluina se taimi tele i le sauniunia o ni meaai se tele mo se taumafataga. A maua lava ni mea itiiti po o se ipu meaai e tasi, ua lava ma totoe lena.

Sa lelei faanaunauga o Mareta; ma sa ia manao ina ia avea o ia o se talimalo lelei. Ae, ona o lona popole i le saunia o mea faitino, sa ia misia ai le avanoa na te mauaina ai faatonuga mai le Alo totino o le Atua! O lea na fetalai faaiu atu ai Iesu: “Ua filifilia foi e Maria le mea lelei, e lē aveeseina i a te ia.”

Mulimuli ane, i se isi taimi, na fesili ane ai se soʻo i a Iesu: “Le Alii e, ia e aʻoaʻo mai i a te i matou e tatalo, faapei o Ioane foi ona aʻoaʻo i ona soʻo.” Atonu sa leʻi auai lenei soʻo i le pe ā o le tausaga ma le ʻafa ua mavae, ina ua taʻuina atu e Iesu le tatalo faaaoao i lana Lauga i luga o le Mauga. O lea na toe taʻu atu ai e Iesu ana faatonuga, peitai sa ia faailoa atu ai foi ma se tala faatusa e faamamafa ai le manaomia ona maumauai i le tatalo.

Na fetalai atu Iesu: “O ai so outou e ana le uō, e alu atu i a te ia i le tulua o po, ma fai atu i a te ia, ‘Sole seʻi aumai ni areto se tolu ma aʻu, ae toe taui atu; auā ua sau laʻu uō i a te aʻu i lana malaga ae leai ni aʻu mea e laulau atu i ai? Ona tali mai lea o lē o loo i totonu o le fale e faapea, ‘Aua e te faasoesa mai i a te aʻu. Ua uma ona tapuni o le faitotoa, ua matou taooto foi ma laʻu fanau, ou te lē mafai ona tulai e avatu se mea ma oe. Ou te fai atu i a te outou, e ui lava ina lē tulai o ia ma avatu se mea i a te ia ona o ia o lana uō, ae mautinoa e tulai o ia, ma avatu mea uma e manao ai o ia, ona o lana faatauanau ane.”

I lenei faatusatusaga, sa leʻi faatatauina ai le fetalaiga a Iesu e faapea, e lē finagalo Ieova le Atua e tali mai i olega, e pei o le uō na taʻua i lana tala. E leai, peitai na faaalia ai e faapea, afai e tali mai se uō musuā ona o le faatauanau atu pea, maeu la le sili atu ona tali mai o lo tatou Tamā alofa o loo i le lagi! O lea sa faaauau ai ona fetalai atu Iesu: “Ou te fai atu foi aʻu i a te outou, Ia outou ole atu pea, ona foaiina mai ai lea i a te outou; ia outou saili pea, ona outou maua ai lea, ia outou tuʻituʻi atu pea, ona toina mai ai lea i a te outou. Auā ai sē ole atu, e foaiina mai i a te ia; o lē saili e maua e ia, o lē tuʻituʻi atu foi, e toina mai i a te ia.”

Ona faamatala atu lea e Iesu o se tala e faatatau i tamā faaletagata, o ē agasala toe lē lelei atoatoa e faapea: “O ai se tamā i a te outou, pe a ole mai lona atalii i se iʻa, e avatu ea i a te ia se gata ae lē o se iʻa? Pe a ole mai i se fuamoa, pe e avatu ea i a te ia se akarava? O lenei, e ui ina leaga outou, a ua outou iloa ona avatu o mea lelei ma a outou fanau; pe e lē sili ea la ona foaiina mai e lo outou Tamā o i le lagi le agaga paia i a i latou o ē ole atu ai i a te ia.” Ioe, maeu se faalaeiauga e uunaia ai na saunia e Iesu, o le maumauai lea i le tatalo. Luka 10:38–11:13.

▪ Aisea na faia ai e Mareta le tele o sauniuniga mo Iesu?

▪ O le ā na faia e Maria, ma aisea na tauleleia ai o ia e Iesu na i lo o Mareta?

▪ O le ā na uunaia ai Iesu e toe taʻu atu ana faatonuga e uiga i le tatalo?

▪ Na faataitaia faapefea e Iesu le manaomia o le maumauai i le tatalo?