Mataupu 1

O Feau Mai le Lagi

O LE Tusi Paia atoa, ua pei o se feau mai le lagi, ua saunia e lo tatou Tamā faalelagi mo le faatonuina o i tatou. Ae peitai, e lua ni feau faapitoa na aumaia e tusa ma le 2,000 tausaga ua mavae, e ala mai i se agelu “o lē tu i luma o le Atua.” O lona suafa o Kaperielu. Seʻi o tatou suesueina la mea na tutupu i nei asiasiga tāua e lua i le lalolagi.

O le tausaga lea e 3 T.L.M. Sa nofo ai le faitaulaga a Ieova o Sakaria, i maupuepue o Iutaia atonu e lē mamao ese mai Ierusalema. Ua matua o ia, faapena foi ma lana avā o Elisapeta. Ma e leai sa la fanau. Ua oo nei la i le taimi e faia ai le auaunaga faaositaulaga a Sakaria i le malumalu o le Atua i Ierusalema. Ae faafuasei ona faailoa ane i ai Kaperielu i le itu taumatau o le fata e faamu ai mea manogi.

Sa matuā atuatuvale Sakaria. Peitai na faatoafilemu e Kaperielu lona mataʻu ma faapea atu: “Sakaria e, aua e te mataʻu, auā ua faafofogaina lau tatalo, ma o le a fanau e lau avā o Elisapeta sou atalii, e te faaigoa i a te ia o Ioane.” Na folafola atu foi e Kaperielu faapea o le a avea Ioane o sē “e sili i luma o Ieova” ma o le a ia “sauniunia se nuu ua faatatauina mo Ieova.”

Peitai sa leʻi talitonu i ai Sakaria. Sa foliga mai e matuā faigata lava i a i laua ma Elisapeta ona toe maua se tamaitiiti, ona ua la matutua. Na faapea atu loa Kaperielu i a te ia: “E gūgū oe, e te lē magagana seia oo i le aso e fai ai nei mea, auā ua e lē talitonu mai i aʻu upu.”

I lena lava taimi, o loo tau manatunatu ai tagata o loo i fafo pe aisea ua nofonofo umi ai Sakaria i totonu o le malumalu. Mulimuli ane ina ua sau o ia i fafo, sa lē magagana o ia a ua na ona fai atu o taga i ona lima, ma ua latou iloa ai na ia vaaia se mea uigaese.

Ina ua maeʻa le taimi o le auaunaga a Sakaria i le malumalu, sa toe foi atu loa o ia i lona aiga. E leʻi leva mulimuli ane, ae tupu moni loa—ua to Elisapeta! A o ia faatalitali mo le fanau mai o lana tama, sa nofo pea Elisapeta i le fale mo masina e lima.

Mulimuli ane, sa toe faaali mai foi Kaperielu. Ma o ai na ia tautala atu i ai? O se tamaitai talavou e leʻi nofotane, o Maria lona igoa, mai le aai o Nasareta. O le ā le feau na ia aumaia i lena taimi? Seʻi faafofoga! Na fai atu Kaperielu i a Maria: “Ua alofaina mai oe e le Atua. Faauta foi, o le a to oe, ma e fanauina se tama tane, e te faaigoa i a te ia o Iesu.” Sa faaopoopo atu Kaperielu: “E sili o ia, e taʻua foi o le Alo o le Silisili Ese; . . . e fai o ia ma tupu i le aiga o Iakopo e faavavau; o lona malo foi e leai sona gataaga.”

E mafai ona tatou mautinoa sa manatu Kaperielu o se faaeaga le aumaia o nei feau. Ma a o tatou faitau atili e uiga i a Ioane ma Iesu, o le a tatou iloa manino ai le pogai o le tāua tele o nei feau mai le lagi. 2 Timoteo 3:16; Luka 1:5-33.

▪ O ā feau tāua e lua na aumaia mai le lagi?

▪ O ai na aumaia nei feau, ma o ai sa tuuina atu i ai?

▪ Aisea sa matuā faigata ai ona talitonuina nei feau?