O Iesu ma le Au Makoi
Mataupu 7
O Iesu ma le Au Makoi
SA IAI ni tagata na ō ane mai Sasae. O i latou ia o le au makoi—o ni tagata e faapea latou te faamatalaina le tulaga o fetu. A o iai i latou i o latou aiga i Sasae, sa latou vaaia se fetu fou, ma latou mulimuli atu ai mo le faitau selau o maila i Ierusalema.
Ina ua taunuu ane le au makoi i Ierusalema, sa latou fesili atu: “O fea o iai lē ua fanau mai o le tupu o tagata Iutaia? Auā na matou vaaia lona fetu a o matou iai i Sasae, ma ua matou ō mai ai e ifo atu i a te ia.”
Ina ua faalogo i ai le tupu o Herota i Ierusalema, sa toatamai tele o ia. O lea na ia taloina ai ositaulaga sili ma fesili atu i ai po o fea o fanau ai le Keriso. Ua latou tali ane e faavae i le Tusi Paia: “O Peteleema.” Ona aami lea e Herota o le au makoi ma ua fai atu i a i latou: “Ō atu ia outou, i nā matuā saili i le tamaitiiti, ma pe a outou maua o ia, ia outou faailoa mai ia te aʻu, o aʻu foi ou te alu atu e ifo ia te ia.” Ae o le mea moni, sa manao Herota e suʻe le tamaitiiti ina ia fasioti!
Na tupu se mea uigaese ina ua latou ō. O le fetu lea na latou iloa a o latou iai i Sasae, ua muamua atu i a te i latou. E manino lava, e lē o se fetu lenei e masani ai, ae o se fetu na aumaia faapitoa e taitaiina ai i latou. Sa mulimuli atu ai pea le au makoi seia oo ina tu tonu le fetu i luga o le fale o loo iai Maria ma Iosefa.
Ina ua ulu atu le au makoi i le fale, sa latou maua ai Maria ma lana tama, o Iesu. Ua latou ifo atu foi i a te ia. Ma ua latou ave aʻe mai a latou taga o meaalofa o le auro, o le pulu lipano ma le pulu muro. Mulimuli ane, ina ua latalata ona latou toe foi atu e taʻu i a Herota le mea o iai le tama, sa lapataia i latou e le Atua e ala i se miti, ina ia aua neʻi o latou faia lena mea. O lea na latou ō atu ai i lo latou nuu i se isi ala.
O ai e te manatu na aumaia le fetu lea na fegasoloai i le lagi ina ia taitaia le au makoi? Manatua, sa leʻi taitaiina saʻo i latou e le fetu i a Iesu i Peteleema. Na i lo lea, sa taitaiina i latou i Ierusalema, lea na latou feiloai ai ma le tupu o Herota, o lē na manao e fasioti i a Iesu. Ma semanu o le mea lena na te faia pe ana lē lapataia e le Atua le au makoi ina ia aua neʻi o latou taʻuina i a Herota le mea sa iai Iesu. Sa manao le fili o le Atua, o Satani le Tiapolo, e fasiotia Iesu, ma na ia faaaogāina ai lena fetu i se taumafaiga e faataunuuina ai lana fuafuaga. Mataio 2:1-12; Mika 5:2.
▪ O le ā e faaalia ai o le fetu na iloa e le au makoi e lē o se fetu masani?
▪ O fea sa iai Iesu ina ua maua o ia e le au makoi?
▪ E faapefea ona tatou iloa o Satani na aumaia le fetu e taitaiina ai le au makoi?