O Iesu ma se Pule Talavou Mauoa
Mataupu 96
O Iesu ma se Pule Talavou Mauoa
A O MALAGA atu pea Iesu i le itumalo o Perea agaʻi i Ierusalema, sa tamoe ane se taulealea ma tootuli ifo i ona vae i ona luma. Na taʻua lea tagata o se pule, ona atonu sa ia umia se tofiga maualuga i le sunako i lo latou nuu, pe atonu foi o ia o se sui o le ʻau Saniterini. Sa matuā mauoa foi o ia. Sa ia fesili atu: “Le Aʻoaʻo lelei e, o le ā se mea e tatau ona ou faia ina ia maua ai le ola e faavavau?”
Na tali ane Iesu: “Se ā le mea ua e taʻua ai aʻu e lelei? E leai se tasi e lelei, ua na o le toatasi, o le Atua lea.” E foliga mai, sa faaaogā e le taulealea le upu “lelei” e avea o se tofi, o lea na faailoa atu ai e Iesu i a te ia e faapea, ua na o le Atua e tatau i ai lena taʻu.
Sa fetalai atili ane Iesu: “Afai la e te fia oo i le ola, ia e tausi e lē aunoa poloaiga.”
A ua fesili atu le tamaloa: “O lē fea poloaiga?”
I le taʻuina atu o poloaiga e lima o Tulafono e Sefulu, na fetalai atu ai Iesu e faapea: “Aua e te fasioti tagata, Aua e te mulilua, Aua e te gaoi, Aua e te molimau pepelo, Ia e āva i lou tamā ma lou tinā.” Ma i le faaopoopo atu o se poloaiga e sili ona tāua, na fetalai atu ai Iesu: “Ia e alofa atu i lē lua te tuaoi e pei o oe lava i a te oe.”
Na tali atu ma le loto faamaoni le taulealea e faapea: “Ua ou tausia na mea uma talu ina o oʻu tamaitiiti. Se ā se isi mea ou te leʻi faia?”
Ina ua ia faafofoga ane i le augani atu ma le naunautai a le tamaloa, na alofa ai Iesu i a te ia. Ae na silafia e Iesu le pupū tele o le tamaloa i mea faitino, o lea na ia taʻu atu ai loa le mea sa ia manaomia e faapea: “E tasi lava le mea e te leʻi faia: Ia e alu, ma faatau atu au mea o i a te oe ma avatu i ē matitiva, ona e maua ai lea o oa i le lagi, i le e sau ai ma mulimuli mai i a te aʻu.”
E lē taumatea le silasila ane ma le alofa mutimutivale Iesu, a o tulai aʻe le taulealea ma alu ese atu ma le matuā faanoanoa. Na faatauasoina e ana oa lana vaai i le tāua o oa moni. Ona faanoanoa lea o Iesu ma faapea atu: “Pagā le faigata ona ulu atu i le malo o le Atua, o i latou e tele tupe!”
Sa maofa lava le ʻau soʻo i upu a Iesu. Ae sa sili atu foi ona faateia i latou ina ua ia faamatalaina atu se tulafono masani e faapea: “O le mea moni, e faigofie atu ona ofi o le kamela i le pu o le au; na i lo le sao atu o le tagata mauoa i le malo o le Atua.”
Ona o le fia iloa, na fesili atu ai le ʻau soʻo: “O ai moni lava e mafai ona faaolaina?”
Na silasila totoʻa atu Iesu i a te i latou, ma faapea atu: “E lē mafaia e tagata lenei mea, ae e mafaia mea uma e le Atua.”
I le matauina o lo latou faia o se filifiliga e ese mai le filifiliga a le pule talavou mauoa, na fai atu ai Peteru: “Faauta! Ua matou tuua mea uma, ae mulimuli atu i a te oe.” O lea na ia fesili atu ai: “Se ā foi se mea matou te maua?”
Ua folafola atu e Iesu: “I le toe fuataiga, pe a tietie le Atalii o le tagata i lona nofoalii mamalu, o outou o ē mulimuli mai i a te aʻu, o le a outou tietie foi i nofoālii e sefulu ma le lua, e faamasino atu i ituaiga e sefulu ma le lua o Isaraelu.” Ioe, na faaalia ai e Iesu, o le a toe fuataiina ai le tulaga o mea i luga o le lalolagi, ina ia pei o le tulaga sa iai i le faatoaga o Etena. Ma o le a maua ai e Peteru ma isi soʻo le taui o le pule faatasi ma Keriso i luga o lena Parataiso i le lalolagi aoao. E mautinoa, o lena taui sili, ua alagatatau i ai so o se faataulagaina!
Peitai, e maua foi taui i le taimi nei, e pei ona faapea mai ma le mautinoa Iesu: “Ai se tasi ua ia tuua fale po o tuagane, tuafāfine po o tamā ma tinā po o fanau, po o fanua ona o aʻu ma le tala lelei, o le a ia maua e taiselau i le taimi nei, o fale ma tuagane ma tuafāfine ma tinā ma fanau ma fanua, faatasi ai ma sauaga, atoa ma le ola e faavavau i le faiga o mea o loo sau.”
E pei ona folafola mai e Iesu, so o se mea lava o le lalolagi e ō atu i ai ona soʻo, o le a latou maua ai ma uso Kerisiano ni faiā vavalalata e sili atu ona tautele na i lo o a latou faiā ma sui faaletino o se aiga. E manino sa leʻi maua e le pule talavou mauoa lena taui, atoa ma le ola e faavavau i le Malo faalelagi o le Atua.
Mulimuli ane, sa faaopoopo atu Iesu: “Peitai, e toatele ē muamua o le a avea ma ē mulimuli, o ē mulimuli foi o le a avea ma ē muamua.” O le ā le uiga o lana fetalaiga?
O lona uiga, e toatele tagata o loo “muamua” i le mauaina o faaeaga faalelotu, e pei o le pule talavou mauoa, o le a lē ulu atu i le Malo. O le a avea i latou ma ē “mulimuli.” Ae o le toatele, e aofia ai soʻo loto maulalo o Iesu, o ē sa vaai faatauvaa i ai le ʻau Faresaio faafiaamiotonu, o ni ē “mulimuli”—e pei o ni tagata o le eleele, po o ‛am ha·’aʹrets—o le a avea ma ē “muamua.” O le avea o i latou ma ē “muamua” o lona uiga, o le a latou maua le faaeaga o le avea ma pule lagolago faatasi ma Keriso i le Malo. Mareko 10:17-31; Mataio 19:16-30; Luka 18:18-30.
▪ E foliga mai, o le ā le ituaiga pule sa iai le tagata talavou mauoa?
▪ Aisea na teena ai e Iesu le taʻua o ia e lelei?
▪ E faapefea i le mea na tupu i le pule talavou ona faaalia ai le matautia o le avea ma mauoa?
▪ O ā taui na folafola atu e Iesu i ona soʻo?
▪ E faapefea ona avea ē muamua ma ē mulimuli, ae avea ē mulimuli ma ē muamua?