Mataupu 68

O Isi Aʻoaʻoga i le Aso Lona Fitu

SA FAAGASOLO pea le aso faaiu, le aso lona fitu lea o le Tausamiga o Faleapitaga. Na aʻoaʻo atu Iesu i le vaega o le malumalu lea sa taʻua o le “mea e teu ai oloa.” O lena vaega sa i le itu o le malumalu e taʻua o le Lotoā o Fafine, lea sa iai pusa e tuu ai e tagata a latou meaalofa.

I po uma o le tausamiga, sa faapitoa ai lava ona faamalamalamaina lena itu o le malumalu. E fa tuugalamepa uumi sa faatutū ai i inā, e tofu ma pesini lapopoa taʻi fa e tutumu i suauu. Sa lava ma totoe le malamalama mai nei lamepa, na mumū aʻe ai le suauu mai pesini e 16, ina ia faamalamalamaina ai vaega uma o le fale i le po. Atonu la na avea le fetalaiga a Iesu i lena taimi, o se mea e faamanatu atu ai i lana au faalogologo lenei faaaliga. Na folafola atu e Iesu: “O aʻu nei o le malamalama o le lalolagi. O lē mulimuli mai i a te aʻu, e lē savali o ia i le pouliuli, ae i a te ia le malamalama o le ola.”

Sa tetee ane le au Faresaio e faapea: “Ua e molimau oe i a te oe; e lē faamaoni lau mau.”

I lana tali, na fetalai atu ai Iesu: “E ui lava ina ou molimau aʻu i a te aʻu, ae faamaoni lava laʻu mau, auā ua ou iloa le mea na ou sau ai, ma le mea ou te alu i ai. A ua outou lē iloa le mea na ou sau ai, ma le mea ou te alu i ai.” Na ia faaopoopo atu: “O aʻu nei lē molimau i a te aʻu, o loo molimau foi i a te aʻu le Tamā ua auina mai aʻu.”

Sa fesili ane le au Faresaio i lo latou fia iloa: “O ifea lou Tamā?”

A ua tali atu Iesu: “E lē iloa e outou o aʻu, po o loʻu Tamā. Ana iloa e outou o aʻu, po ua iloa foi e outou o loʻu Tamā.” E ui lava ina sa mananao pea le au Faresaio e pue i a Iesu, ae e leai se tasi na paʻi atu i a te ia.

Na toe fetalai atu Iesu: “O le a ou alu ese . . . E lē mafai e outou ona ō i le mea ou te alu i ai.”

O le mea lea na tau manatu ai tagata Iutaia e faapea: “E fasioti ea o ia i a te ia? Ina ua faapea mai o ia, ‘E lē mafai e outou ona ō i le mea ou te alu i ai.’”

A ua faamatala atu e Iesu: “O outou o lalo nei, o aʻu mai lugā. O outou e ō le lalolagi nei, e lē so le lalolagi aʻu.” Ua ia faaopoopo atu foi: “Auā a outou lē talitonu, o aʻu lenei o ia, ona oti ai lea o outou i a outou agasala.”

O le mea mautinoa, sa faasino atu e Iesu i lona soifuaga a o leʻi avea ma tagata, atoa ma lona avea ma Mesia folafolaina, po o le Keriso. Peitai, sa latou fesili ane ma le matuā manatu faatauvaa e faapea: “O ai ea oe?”

I le faafetaiaia o la latou teteega, na tali atu ai Iesu: “Aisea ua ou tautala atu ai i a te outou?” Peitai sa ia toe faapea atu: “O ia ua auina mai aʻu e moni lava o ia. O mea ua ou faalogo ai i a te ia, o mea ia ou te fai atu ai i le lalolagi.” Sa faaauau ona fetalai atu Iesu: “Pe a siitia i luga e outou le Atalii o le tagata, ona iloa lea e outou o aʻu lenei o ia; ou te lē fai fua foi se mea; ae peitai, faapei ona aʻoaʻo mai e loʻu Tamā i a te aʻu, o mea ia ou te tautala atu ai. O ia foi na auina mai aʻu o loo i a te aʻu ia; e lē tuua toatasi aʻu e le Tamā, auā ou te faia pea lava mea e lelei i a te ia.”

Ina ua fetalai atu Iesu i na mea, e toatele sa faatuatua i a te ia. Sa ia fetalai atu foi i a te i latou na: “Afai tou te tumau pea i laʻu mataupu, o oʻu soʻo moni outou. E iloa foi e outou le mea moni, e tuu saoloto foi outou e le upu moni.”

Na tali ane i latou sa tetee i a te ia: “O i matou nei o le fanau a Aperaamo, e leʻi fai lava i matou ma pologa a se tasi. Pe faapefea ona e fai mai, ‘E tuu saoloto outou’?”

E ui ina sa masani ona pulea Iutaia e tagata ese, ae sa latou lē mananao e taʻu se tagata faapena o se matai. Sa latou mumusu e taʻua i latou o pologa. Peitai na faasino atu e Iesu, o i latou moni lava o pologa. I le ā le itu? Na fetalai atu Iesu: “E moni, e moni, ou te fai atu i a te outou, o sē faia le agasala, o le pologa lea a le agasala.”

O le teena faapea o lo o latou nonofo pologa i le agasala, na tuua ai Iutaia i se tulaga lamatia. Na faamatala atu e Iesu: “O le pologa foi, e lē tumau pea ia i le aiga. A o le atalii, e tumau pea lava ia.” Ona o le pologa e leai ni ona aiā i se tofi, atonu e lamatia ai o ia i le ono tuliesea i so o se taimi. E na o le atalii moni lava na fanau mai po o se tamafai a le aiga e tumau ai “pea,” o lona uiga, e tusa lava po o le ā le umi e ola ai o ia.

Na fetalai atili atu Iesu: “O lenei, pe a tuu saoloto outou e le Atalii, ona saoloto faamaoni ai lea o outou.” O lea la, o le upu moni e tuu saolotoina ai tagata, o le upu moni lea e uiga i le Atalii, o Iesu Keriso. E na o le taulaga togiola lava i lona ola lelei atoatoa faaletagata, e mafai ai e so o se tasi ona saoloto mai le agasala e iu i le oti. Ioane 8:12-36.

▪ O fea sa aʻoaʻo atu ai Iesu i le aso lona fitu? O le ā na tupu i inā i le po, ma sa faapefea ona fesootai lena mea ma le aʻoaʻoga a Iesu?

▪ O le ā na fetalai atu ai Iesu e uiga i lona amataga, ma o le ā ua faaalia e lena mea e uiga i a te ia?

▪ I le ā le auala na avea ai Iutaia ma pologa, ae o le ā le upu moni o le a faasaolotoina ai i latou?