Mataupu 129

O Isi Faailoaina mai Atili

SA MAFATIA pea loto o le au soʻo. Sa latou lē iloa le uiga o le gaogao o le tuugamau, ma sa latou lē talitonu foi i le lipoti a fafine. O lea, mulimuli ane i le Aso Sa, ona tuua lea e Kaleopa ma se isi soʻo Ierusalema e ō atu i Emau, e tusa ma le fitu maila [po o le 11 kilomita] le mamao.

I le ala, a o la talatalanoa i mea na tutupu i le aso, ae faatasi atu loa se tagata ese i a i laua. Na ia fesili atu: “O ā ea ia upu ua oulua felafolafoai ai, a o oulua savavali?”

Na tutū ia soʻo, ua mata faanoanoa, ona tali atu lea o Kaleopa: “Pe na o oe ea lē āumau i Ierusalema ma le lē iloa o mea ua tutupu ai i ona po nei?” Na toe fesili atu le tagata ese: “O ā mea?”

Sa la tali mai: “O mea e uiga i a Iesu le Nasareta. Na tuuina atu o ia e le au faitaulaga sili ma o tatou faipule, ia faasalaina o ia ia oti ma faasatauroina o ia. Ae sa matou faamoemoe lava o ia o le a togiolaina Isaraelu.”

Ona faamatala atu lea e Kaleopa ma lana uō, mea ofoofogia na tutupu i lea aso—o se tala e uiga i le vaaiga ofoofogia i ni agelu ma le tuugamau na gaogao—ae na taʻutino atu lo la lē malamalama i le uiga o na mea. Ona matuā aʻoaʻi atu lea o le tagata ese: “O tagata vālea, ma loto faigata ona talitonu i mea uma ua fai mai ai le au perofeta. E lē tatau ea ona tiga o le Keriso i mea faapena, i le oo ai o ia i lona mamalu?” Ona ia faamatala atu lea i a i laua fuaitau mai tusitusiga paia e faatatau i le Keriso.

Mulimuli ane ua latou latalata atu i Emau, ma e foliga mai o le a malagaloa le tagata ese. I le mananao e fia faalogo i nisi mea e tele, na pulunaunau atu ai ia soʻo: “Tatou nonofo ma i maʻua nei, auā ua taugagaifo le la, ua lata i le afiafi.” O lea na nofo ai o ia mo se taumafataga. A o ia fai le tatalo ma tofitofi le areto ma tuu atu i a i laua, ona la iloa ai lea o Iesu moni lava lea sa liua i se tino tagata. Ae mou ese loa o ia.

O lea la na la malamalama ai i le mafuaaga sa tele ai mea na silafia e le tagata ese! Na la fesili: “E leʻi mu ea o ta loto i totonu i a i taʻua, ina ua fetalai o ia i a te i taʻua i le ala, ina ua faamatala mai foi e ia o Tusi i a te i taʻua?” E aunoa ma le toe faatali, sa la tutū loa i luga ma toe foi faanatinati atu i Ierusalema, o inā na la maua ai le au aposetolo ma ē sa faapotopoto faatasi ai ma i latou. A o leʻi fai atu e Kaleopa ma lana uō se upu, ae na lipoti atu ma le fiafia e isi: “E moni, ua toe tu le Alii, ua faaali foi o ia i a Simona.” Ona faamatala atu lea e na soʻo e toalua le auala na faaali atu ai foi Iesu i a te i laʻua. O lona faafā ai lea ona faaali Iesu i lea aso i tagata eseese o lona au soʻo.

Ona faafuaseʻi lea ona faaali atu Iesu, ma o lona lima ai lea. E ui lava sa loka faitotoa o le fale na iai le au soʻo ona o lo latou fefefe i tagata Iutaia, ae sa ia ulufale atu ma tu i lo latou lotolotoi ma fetalai atu: “Ia outou manuia.” Sa matuā fefefe i latou, fa te i latou o le agaga ua latou vaaia. O lea, i le faamatala atu faapea e lē o ia o se agaga, na fetalai atu ai Iesu: “Se ā le mea ua outou atuatuvale ai? Se ā foi e tutupu ai masalo i o outou loto? Ia outou vaavaai mai i oʻu lima ma oʻu vae, auā o aʻu lava lenei; ia outou tagotago mai i a te aʻu, ma ia vaavaai mai, auā o le agaga e leai sona aano ma ni ivi, pei o aʻu nei ua outou vaavaai i ai.” Ae na tumau pea lo latou lē fia talitonu.

Ina ia fesoasoani i a i latou e iloa o ia moni lava o Iesu, na ia fesili atu ai: “O i inā ea ni a outou mea e ʻai?” Ina ua uma ona talia se fasi iʻa tunu ma taumafa ai, ona ia faapea atu lea: “O upu ia na ou fai atu ai i a te outou, ina o oʻu i a te outou [a ou te leʻi maliu]; e tatau ona taunuu o mea uma ua tusia i a te aʻu i le tulafono a Mose, ma le au Perofeta, ma Salamo.”

I le faaauauina o le mea, atonu sa avea ma se suesuega faale-Tusi Paia ma i latou, na aʻoaʻo atu Iesu: “Ua faapea ona tusia, e faapea foi ona tatau ina tiga o le Keriso, ma toe tu nai ē ua oti i le aso tolu; ina ia talaʻiina foi le salamō ma le faamagaloina o agasala i nuu uma i lona igoa—e amata mai i Ierusalema. O molimau foi outou i nei mea.”

Sa iai se mafuaaga na lē auai ai Toma i lena sauniga matuā tāua i le afiafi o le Aso Sa. O lea, i aso na mulimuli mai ai, na taʻu atu ai ma le olioli e isi i a te ia: “Ua matou iloa atu le Alii.”

Na tetee atu Toma: “Afai ou te lē vaai atu i ona lima, i mea na tutuʻi ai fao, ma tuu loʻu tamatamai lima i mea na tutuʻi ai fao, ma tuu loʻu lima i lona itu, ou te lē talia lava.”

Ia, i le valu aso mulimuli ane, na toe faapotopoto ai foi le au soʻo i totonu o le fale. O le taimi lea na faatasi ai Toma ma i latou. E ui lava sa loka faitotoa, ae sa toe tulai atu foi Iesu i totonu o la latou faapotopotoga ma faapea atu: “Ia outou manuia.” Ona ia faliu atu lea i a Toma, ma ia valaaulia o ia: “Aumai ia lou tamatamai lima i inei, vaai mai foi i oʻu lima; aumai ia foi lou lima ma tuu mai i loʻu itu; aua foi e te masalosalovale, a ia e talitonu.”

Na alaga Toma: “Loʻu Alii e, ma loʻu Atua e.”

Na fesili atu Iesu: “Ua e talitonu ea auā ua e vaai mai i a te aʻu? Amuia o ē lē vāai mai, ae talitonu mai pea.” Luka 24:11, 13-48; Ioane 20:19-29.

▪ O ā fesili na faia e le tagata ese i soʻo e toalua i le auala i Emau?

▪ O le ā na fai atu ai le tagata ese sa faapogaia ai le mu o loto o soʻo?

▪ Na faapefea ona iloa e le au soʻo po o ai lea tagata ese?

▪ Ina ua foi atu Kaleopa ma lana uō i Ierusalema, o le ā le tala fiafia na la faalogo i ai?

▪ O le ā le faaaliga lona lima na faia e Iesu i lona au soʻo, ma o le ā le mea na tupu i lea taimi?

▪ O le ā sa tupu i le valu aso mulimuli ane ina ua uma le faaalia ane lona lima o Iesu, ma sa faapefea ona faatalitonuina Toma faapea ua toe soifua mai Iesu?