Mataupu 95

O Lesona i Talaga Faaipoipoga ma le Alofa i Tamaiti

UA AGAʻI atu Iesu ma ona soʻo i Ierusalema ina ia auai i le Paseka o le 33 T.A. Na latou sopoia atu le vaitafe o Ioritana ma ui ane ai i le auala i le itumalo o Perea. I ni nai vaiaso muamua atu, sa iai Iesu i Perea, ae na valaauina o ia i Iutaia ona o le maʻi o lana uō o Lasalo. Ina o iai i Perea, na fetalai atu ai Iesu i le ʻau Faresaio e uiga i tatalaga faaipoipoga, a o lea, ua latou toe lagā foi le mataupu.

Na iai i le ʻau Faresaio manatu ma aʻoaʻoga eseese e uiga i tatalaga faaipoipoga. E tusa ai ma le tala a Mose, e mafai ona faatea se fafine ona “ua iloa i a te ia se mea leaga.” Sa talitonu nisi e faapea, o lena mea sa faasino i na o amioga lē mamā. Ae sa manatu isi e faapea, o “se mea leaga” e aofia ai nai masei e sili ona laiti. O lea, ina ia tofotofoina Iesu, na fesili ane ai le ʻau Faresaio e faapea: “Pe faasa ea i se tasi ona faatea o lana avā i so o se mafuaaga?” Na latou mautinoa, so o se mea lava e fai atu ai Iesu o le a aafia ai o ia i se faafitauli ma le ʻau Faresaio o ē sa ese o latou manatu.

Sa taulimaina ma le atamai e Iesu le fesili, i lona lē tāpā lea o ni manatu faaletagata, ae faasino atu i tuā i le uluai fuafuaga o le faaipoipoga. Na ia fesili atu: “Tou te leʻi faitaulia ea, o lē na foafoaina i laua i le amataga na ia faia i laua o le tane ma le fafine ma fetalai atu, ‘O le mea lea e tuua ai e le tane lona tamā ma lona tinā ae faatasi ma lana avā, ona avea ai lea o i laua ma tino e tasi? O lea, e lē toe toalua ai i laua, ae ua tino e tasi. O lenei, o ē ua faatasia e le Atua aua neʻi faateaeseina e se tagata.”

Na faaalia ai e Iesu, o le uluai fuafuaga a le Atua mo paaga faaipoipo e tatau ona nonofo faatasi, ae e lē o le tatalaina o faaipoipoga. Na tali ane le ʻau Faresaio, afai o lea le tulaga, “se ā foi le mea na poloai mai ai Mose e avatu se tusi faatea ina ia tatalaina ai le faaipoipoga?”

Na tali atu Iesu: “Ona o o outou loto ina maaa na tuu mai ai e Mose e faatea i a outou avā, ae e leʻi faapena talu mai le amataga.” Ioe, ina ua faavaeina e le Atua le faatulagaga moni mo le faaipoipoga i le faatoaga o Etena, na te leʻi faia ai se fuafuaga mo le tatalaina o le faaipoipoga.

Ona fetalai atili atu lea o Iesu i le ʻau Faresaio: “Ou te fai atu i a te outou, ai sē faateʻa i lana avā ae leʻi mulilua ia, [mai le upu faa-Eleni, por·neiʹa], ma faaipoipo atu i se isi, ua mulilua ia.” Na ia faaalia ai i inā e faapea o le por·neiʹa, po o se feusuaiga matagā faaleituaiga, e na o le pau lea o le faavae ua faatagaina e le Atua mo se talaga faaipoipoga.

I le iloaina faapea e ao ona avea le faaipoipoga o se faatasiga tumau ma ua na o lea le faavae e tatala ai, na uunaia ai le ʻau soʻo e faapea atu: “Afai e faapea le tu a le tane ma lana avā, e lē tatau la ona faaipoipo.” E leai se faaletonu, o lē o loo faamoemoe e faaipoipo, e ao ona mafaufau mamafa i le faatumauina o le fusi o le faaipoipoga!

Ona talanoa atu lea o Iesu e uiga i le nofofua. Fai mai a ia, ua fananau mai nisi tama o ni eunuka, e lē mafai ona faaipoipo ona e leai ni o latou faalogona tau feusuaiga. O isi ua faaeunukaina e tagata e ala i le faaleagaina o o latou totoga sa. O le manatu mulimuli, ua puleaina e nisi le faanaunauga e faaipoipo ma olioli ai i faiā tau feusuaiga, ina ia mafai ai ona tuutoina atu atoatoa i latou i mataupu o le Malo i le lagi. Na fetalai faaiu atu e Iesu: “O lē e mafai ona talia le [nofo fua] inā faia ia faapea.”

Ona avane lea e tagata o tamaiti i a Iesu. Peitai sa otegia e le au soʻo tamaiti ma taumafai e tutuli ese i latou, e lē taumate sa mananao e puipui Iesu mai le soona faalavelave i ai. Ae na fetalai atu Iesu: “Inā tuu maia o tamaiti e ō mai i a te aʻu; aua le vavao i a te i latou, auā o le Malo o le Atua, e mo ē e pei o i latou nei. E moni ou te fai atu i a te outou, o sē lē talia le Malo o le Atua e pei o se tamaitiiti, e lē mafai lava ona sao atu i ai.”

Maeu ni lesona lelei na saunia i inā e Iesu! Ina ia maua le Malo o le Atua, e tatau ona tatou faataitai i uiga loto maulalo, ma le aʻoaʻogofie o tamaiti. Peitai, ua faaalia foi i le faaaoaoga a Iesu le matuā tāua, ae maise lava i mātua, ona faaalu o se taimi ma a latou fanau. O lea na faaalia ai e Iesu lona alofa mo tamaiti, i lona tago atu ma sii mai i latou ma faamanuia i a i latou. Mataio 19:1-15; Teuteronome 24:1; Luka 16:18; Mareko 10:1-16; Luka 18:15-17.

▪ O ā manatu eseese sa iai i le ʻau Faresaio e uiga i tatalaga faaipoipoga, ma sa faapefea ona latou tofotofoina Iesu?

▪ Sa faapefea ona feagai Iesu ma taumafaiga a le ʻau Faresaio e tofotofo i a te ia, ma o le ā le faavae e tasi na ia taʻua mo se tatalaga faaipoipoga?

▪ Aisea na fai atu ai soʻo o Iesu e lē tatau ona faaipoipo, ma o le ā le fautuaga na avatu e Iesu?

▪ O le ā ua aʻoaʻoina ai i tatou e Iesu e ala i ana feutagaiga ma tamaiti?