Mataupu 47

O Loimata na Liua i le Fiafia Tele

I NA ua vaai atu Iairo ua faamaloloina le fafine na iai le puna toto, o le mea mautinoa sa faateleina ai lona talitonu i le mana fai vavega o Iesu. I le taeao o lena lava aso, na talosaga atu ai Iairo i a Iesu ina ia maliu ane e fesoasoani i lona afafine pele e 12 ona tausaga, o lē sa toeitiiti lava oti. Peitai, o lea ua tupu le mea sa sili ona mataʻu i ai Iairo. A o fetalai atu pea Iesu i le fafine, ae taunuu ane loa ni tamaloloa ma taʻu lemu atu i a Iairo: “Ua oti lou afafine! Se ā le mea e te toe faalavelave ai i le aʻoaʻo?”

Pagā se tala faanoanoa! Seʻi manatu: O le tamaloa lenei, o sē sa faaaloalogia tele e le nuu, a o lea ua matuā lē mafesoasoania lava ina ua ia faalogo ua oti lona afafine. Peitai, sa lagona atu e Iesu le talanoaga. O lea, na ia faliu atu ai i a Iairo ma faalototele atu i ai e faapea: “Aua e te mataʻu; tau lava ina e faatuatua.”

Ona maliu ane ai lea o Iesu, faatasi ma lenei tamaloa faanoanoa i lona fale. Ina ua latou taunuu ane, o loo pa ai le lauaitu ma le taufaitagitui. O loo faapotopoto ai le motu o tagata, ma o loo taufaitagiauē i latou ona o le faanoanoa. Ua maliu atu Iesu i totonu ma fesili atu: “Se ā le mea ua outou pisapisaō ai, ma outou fetagisi? E lē o oti le teine, ua na ona moe.”

Ua faalogo ane i ai tagata, ona latou toē ai lea ma aamu i a Iesu, auā na latou iloa ua oti moni lava le teine. Peitai, na fetalai atu Iesu, ua na ona moe o ia. I le faaaogāina o lona mana na tuuina mai e le Atua, na ia faaalia ai e faigofie lava ona toe faatutuina aʻe tagata mai le oti, e pei lava o loo fafagu mai i latou mai se moe gase.

Sa auina uma loa i fafo e Iesu tagata seʻi vaganā ai Peteru, Iakopo, Ioane, ma mātua o le teine ua oti. Ona ave ai lea e ia o i latou nei e toalima i le potu o loo taoto ai le teine. Ua tago foi Iesu i le lima o le teine, ma fetalai atu i ai: “Talita kumi,” o lona uiga pe a faamatalaina: “Funa e, ou te fai atu i a te oe, inā tulai ia.” Ona tulai loa lea o le teine ua savali! Na segia foi mauli o mātua o le teine i lenei vaaiga, ma ua fiafia tele ai.

Ina ua uma ona faatonu atu e avane se meaai ma le teine, ona vavao atu lea e Iesu i a Iairo ma lana avā ina ia aua neʻi taʻuina atu i se tasi le mea na tupu. Peitai, e ui i lena fetalaiga a Iesu, ae na salalau atu lava le tala i lena itumalo atoa. O le toalua ai lea o ē na faatutuina mai e Iesu. Mataio 9:18-26; Mareko 5:35-43; Luka 8:41-56.

▪ O le ā le tala na maua e Iairo, ma na faalototeleina faapefea o ia e Iesu?

▪ O le ā le tulaga na iai ina ua latou taunuu ane i le fale o Iairo?

▪ Aisea na faapea atu ai Iesu ua na ona moe o le teine?

▪ O ai tagata e toalima sa faatasi ma Iesu, na molimauina le toetu?