O Malaga i Ierusalema
Mataupu 10
O Malaga i Ierusalema
UA OO i le tau e totogo ai mea. Ma o le taimi lea i tausaga taitasi e tatau ai ona malaga atu le aiga o Iosefa ma a latou uo ma auaiga, e ō atu i Ierusalema mo le faamanatuina o le Paseka. Sa latou fiafia e pei ona masani ai, a o alu la latou malaga e tusa ma le 65 maila [po o le 100 kilomita] le mamao. O le taimi lena ua 12 tausaga o Iesu, ma sa ia faamoemoe ma naunau faapitoa i le tausamiga.
I manatu o Iesu ma lona aiga, sa lē na o le tasi le aso e faia ai le Paseka. Sa latou toe nonofo ai foi mo le Tausamiga o Areto e Lē Faafefeteina mo isi aso e fitu, lea sa latou manatu i ai o se vaega o le vaitaimi mo le Paseka. O le iuga la, e tusa ma le lua vaiaso le umi o la latou malaga mai lo latou nuu o Nasareta, e aofia ai ma le nonofo i Ierusalema. Ae i lena tausaga, ona o se mea na aafia ai Iesu, sa fai ai sina umi teisi.
Na aliai mai le faafitauli ina ua toe taliu le malaga mai Ierusalema. Sa manatu Iosefa ma Maria faapea ai o iai Iesu i o latou aiga ma uo ia na latou malaga faatasi. Ae sa leʻi vaaia o ia ina ua latou malōlō i le po, ma sa la ō atu ai loa e saili i a te ia i la latou au malaga. Sa leʻi maua o ia. O lea na toe foi atu ai Iosefa ma Maria i tuā i Ierusalema e suʻe o ia.
Na atoa le aso o la saili, ae leʻi maua. La te leʻi maua foi o ia i le aso lona lua. Mulimuli ane, i le aso lona tolu, ona la ō atu ai lea i le malumalu. I inā i se tasi o potu o le malumalu, na la vaaia ai Iesu o nofo mai i le lotolotoi o aʻoaʻo Iutaia, o loo faalogologo ma tuufesili i a i latou.
Ona fai atu lea o Maria: “Laʻu tama e, se ā le mea ua e faapea mai ai i a te i maʻua? Faauta, o i maʻua ma lou tamā sa ma saili lava i a te oe ma le tiga.”
Na maofa Iesu ona o lo la lē iloa o le mea e maua i ai o ia. Ua ia faapea atu: “Se ā le mea na oulua saili mai ai i a te aʻu? Lua te lē iloa ea e tatau ona ou iai i le fale o loʻu Tamā?”
Sa leʻi malamalama Iesu i le pogai na lē iloa ai e ona mātua lenei mea. Ona toe foi atu ai lea o Iesu ma ona mātua i lo latou aiga ma usiusitai atu pea i a te i laua. Ua faasolo ina tuputupu aʻe lona poto ma lona tino ma ua alofagia o ia e le Atua, atoa ma tagata. Ioe, talu mai lava lona tamaitiiti, sa faataatia ai e Iesu se faaaoaoga lelei e lē gata i le sailia o manaoga faaleagaga ae i le faaalia foi o le faaaloalo i ona mātua. Luka 2:40-52; 22:7.
▪ O le ā le malaga sa faia pea e Iesu ma lona aiga i le tau e totogo ai mea, ma o le ā le umi?
▪ O le ā na tupu i la latou malaga na alu, a o 12 tausaga o Iesu?
▪ O le ā le faaaoaoga ua faataatia e Iesu mo talavou i aso nei?