O Nisi Foi Vavega i Kapanaumi
Mataupu 23
O Nisi Foi Vavega i Kapanaumi
I LE Sapati ina ua mavae ona valaauina e Iesu ona uluai soʻo e toafā—o Peteru, Aneterea, Iakopo ma Ioane—ona latou ō atu uma ai i se sunako i Kapanaumi. I inā ua amata ai ona aʻoaʻo atu Iesu, ma ua taufaiofo tagata ona sa ia aʻoaʻo atu i a te i latou e pei o sē o iai le pule ae e lē pei o tusiupu.
I lena Sapati, sa auai se tamaloa na uluitinoina e temoni. Ina ua mavae sina taimi, ona ia alaga atu lea ma le leotele e faapea: “Iesu e, le Nasareta, se ā lau na i a te i matou? Ua e maliu mai ea e faafano i a te i matou? Ua ou iloa lelei oe, o Lē Paia a le Atua.”
O le mea moni, o le temoni lea na pulea le tamaloa, o se tasi o agelu a Satani. Ua fetalai atu Iesu, ma aʻoaʻi atu i le temoni e faapea: “Inā filemu ia, ma e alu i fafo nai i a te ia!”
Ona faatafiti lea e le temoni o le tamaloa, ma alaga ma le leotele. A ua sau i fafo e aunoa ma se afaina ai o le tamaloa. Na taufaiofo i latou uma sa iai! Ua latou fesili ane foi, “Pe se ā lenei mea? Ua ia fetalai atu ma le pule i agaga leaga, ona latou usiusitai lava lea i a te ia.” Sa salalau atu foi le tala e uiga i lenei mea i nuu uma sa siomia ai.
Ina ua tuua le sunako, ona ō atu lea o Iesu ma ona soʻo i le fale o Simona, po o Peteru. O i inā o loo maʻi tigaina ai le tinā o le avā a Peteru i le maʻi vevela. Ua latou aioi atu i a te ia, ‘Faamolemole seʻi fesoasoani atu i a te ia.’ O lea, na sōsō ane ai Iesu, ma tago ifo i lona lima ua faatū i a te ia. Ona teʻa loa lea o lona maʻi ae amata ona ia saunia se taumafataga mo i latou!
Mulimuli ane, ina ua goto le la, ona lolofi mai ai lea o tagata i le fale o Peteru ma o latou tagata mamai. E leʻi umi ae potopoto ane le aai atoa i le faitotoa! Ona faamaloloina lea e Iesu o o latou tagata mamai uma, e tusa lava po o le ā le ituaiga o maʻi sa maua ai i latou. Na ia tuusaunoa foi i latou na uluitinoina e temoni. A o ō ese nei temoni, sa latou alalaga ane e faapea: “O oe o le Alo o le Atua.” Peitai, sa aoaia i latou e Iesu ma faasaina ona latou toe tautatala, auā sa latou iloaina o ia o le Keriso. Mareko 1:21-34; Luka 4:31-41; Mataio 8:14-17.
▪ O le ā le mea na tupu i le sunako i le Sapati ina ua mavae ona valaauina e Iesu ona soʻo e toafā?
▪ O fea sa maliu atu i ai Iesu ina ua tuua le sunako, ma o le ā le vavega sa ia faia i inā?
▪ O le ā le mea na tupu mulimuli ane i lena lava afiafi?