Mataupu 81

O Taumafaiga Atili e Fasioti Iesu

TALU ai ona o le taimi lea o le tau mālūlū, na femaliuai ai Iesu i le vaipanoa sa taʻua o le faapaologa o Solomona. E i tafatafa o le malumalu. O inā sa vagavagaia ai o ia e tagata Iutaia ma faapea atu: “E faaletonu ea o matou manatu i a te oe seia afea? Afai o oe o le Keriso, ia matuā taʻutino mai i a te i matou.”

Na tali atu Iesu: “Ua uma ona ou taʻu atu i a te outou, a ua outou lē talitonu mai lava.” Sa leʻi taʻu saʻo atu e Iesu i a te i latou e faapea o ia o le Keriso, e pei ona ia taʻu atu i le fafine Samaria i le vaieli. Peitai, o le mea moni, sa ia faailoaina atu o ia, ina ua ia faamatalaina atu i a te i latou e faapea, o ia sa afio ifo mai luga ma sa iai o ia a o leʻi iai se Aperaamo.

Peitai, sa manao Iesu ina ia faia e tagata lava latou se faaiuga e iloa ai o ia o le Keriso, e ala i le faatusatusaina o ana galuega ma mea na valoia mai e le Tusi Paia, o le a faataunuuina e le Keriso. O le mea lena na ia faatonuina ai ona soʻo i le amataga ina ia aua neʻi taʻuina atu i se tasi, o ia o le Keriso. Ma o le mafuaaga foi lena na faaauau ai ona ia faapea atu i nei tagata tetee o Iutaia e faapea: “O galuega ou te faia i le suafa o loʻu Tamā, e molimau mai ia i a te aʻu. A ua outou lē talitonu mai lava.”

Aisea sa latou lē talitonu ai? Pe ona o le lē lava ea o faamaoniga e iloa ai o Iesu o le Keriso? E leai, ae ona o le mafuaaga na taʻu atu e Iesu i a te i latou e faapea: “E lē ni aʻu mamoe outou. O aʻu mamoe e faalogo mai i loʻu leo, ua ou iloa i latou, ua latou mulimuli mai foi i a te aʻu. Ou te avatu foi le ola e faavavau i a te i latou, e lē fano lava i latou e oo i le faavavau, e lē mafai lava e se tasi ona fao i a te i latou ai loʻu lima. O mea ua foaiina mai e loʻu Tamā i a te aʻu, e sili mamao atu i isi mea uma; e lē mafai e se tasi ona faoa i latou mai le lima o loʻu Tamā.”

Ona faamatala atu lea e Iesu le la faiā vavalalata ma lona Tamā, e faapea: “O aʻu nei ma le Tamā, e tasi lava i maʻua.” Talu ai ona sa iai Iesu i le lalolagi, a o lona Tamā o loo i le lagi, e manino mai ai sa lē fetalai atu o ia e faapea e tasi o ia ma lona Tamā i le tino. Na i lo lea, o lona uiga, e tasi i laua i fuafuaga, pe autasi i laua.

I le feitai i upu a Iesu, na fetagofi ai Iutaia i maa ina ia fasiotia ai o ia, e pei lava ona latou faia i se taimi muamua atu, i le Tausamiga o Falefetafai, po o Faleapitaga. I le faafetaiaia ma le lototele o ē na mulimuli ane o latou fasiotia o ia, na fetalai atu ai Iesu: “E tele galuega lelei ua ou faaalia i a te outou mai loʻu Tamā. O lē fea o ia galuega tou te fetogi mai ai i a te aʻu?”

Ua latou tali ane: “E lē se galuega lelei matou te fetogi ai i a te oe, a o le upu leaga; auā o oe o le tagata, a ua e fai oe ma atua.” Talu ai sa leʻi fetalai atu lava Iesu e faapea o ia o se atua, aisea na fai ane ai faapena tagata Iutaia?

E foliga mai, ona sa iai i a Iesu lava ia le mana lea sa latou talitonu e na o le Atua lava e tatau ona iai. Mo se faaaoaoga, na seʻi faatoʻā uma lava ona ia fetalai atu e uiga i “mamoe,” “Ou te avatu foi le ola e faavavau i a te i latou,” o se mea e lē mafai e se tagata ona faia. Peitai, sa galo i tagata Iutaia le mea moni, na faailoa atu e Iesu lona mauaina o lena pule mai lona Tamā.

O le mea e iloa ai sa fetalai atu Iesu e sili le Atua i a te ia, o loo faaalia lea i le mea e sosoo ai, ina ua ia fesili atu: “E leʻi tusia ea i la outou Tulafono [i le Salamo 82:6], na ou fai atu: “O atua outou”? Afai na taʻua e ia o ‘atua’ i latou o ē sa iai le afioga a le Atua, . . . tou te fai mai ea i a te aʻu, lē ua faapaiaina ma auina mai e le Tamā i le lalolagi, ‘Ua e upu leaga,’ auā ua ou fai atu, O aʻu nei o le Atalii o le Atua?”

Talu ai ona o loo taʻua foi e le Tusi Paia faamasino lē tonu faaletagata o ni “atua,” o le ā se sese sa maua e nei tagata Iutaia i a Iesu i lona fetalai atu, “O aʻu nei o le Atalii o le Atua”? Na faaopoopo atu Iesu: “Afai ou te lē faia galuega a loʻu Tamā, aua tou te talitonu mai i a te aʻu. Ae afai ou te faia, e ui lava ina outou lē talitonu mai i a te aʻu, ia outou talitonu i galuega; ina ia iloa e outou, ma ia talitonu, o i totonu i a te aʻu le Tamā, o aʻu foi o i totonu i a te ia.”

Ina ua fetalai atu Iesu i na upu, sa taumafai tagata Iutaia e puʻe i a te ia. Peitai sa sola ese o ia, e pei ona sa ia faia muamua i le Tausamiga o Falefetafai. Na ia tuua Ierusalema ae malaga atu i le Vaitafe o Ioritana i le mea na amata ai le papatisoga a Ioane pe a ma le fa tausaga ua mavae. E foliga mai e lē mamao ese lena nofoaga mai le matafaga i saute o le Sami o Kalilaia, e tusa lea ma se malaga e lua aso po o le sili atu foi mai Ierusalema.

E toatele tagata sa ō atu i a Iesu i lea mea ma faapea atu: “E leai lava se faailoga na faia e Ioane; a o mea uma na fai mai ai Ioane e uiga i a te ia lenei, ua moni uma lava.” Ma e toatele na faatuatua ai i a Iesu i inā. Ioane 10:22-42; 4:26; 8:23, 58; Mataio 16:20.

▪ I le ā le auala sa manao Iesu ia iloa ai e tagata o ia o le Keriso?

▪ Sa faapefea ona tasi Iesu ma lona Tamā?

▪ Aisea atonu na fai atu ai tagata Iutaia ua faia e Iesu ia lava ma atua?

▪ Sa faaalia faapefea i fetalaiga na sii mai e Iesu i le Salamo, na te leʻi faapea atu e tutusa o ia ma le Atua?