Mataupu 14

O Uluai Soʻo o Iesu

INA ua mavae aso e 40 i le vaomatua, ona toe foi ane lea o Iesu i a Ioane o lē na papatisoina o ia. E faalatalata ane o ia, a ua faasino atu Ioane i a te ia ma faapea atu i ē sa faatasi ai: “Faauta, i le Tamai Mamoe a le Atua, na te aveesea le agasala a le lalolagi. O ia lea na ou fai atu ai, o loo mulimuli mai le tagata, e sili o ia i a te aʻu, auā o ia na muamua i a te aʻu.” E ui ina matua Ioane i lona tauusoga o Iesu, ae na iloa e Ioane sa muamua ona soifua Iesu i a te ia, o se peresona agaga i le lagi.

E ui i lea, i ni vaiaso muamua atu, ina ua maliu ane Iesu mo lona papatisoga, e foliga sa leʻi iloa lelei e Ioane o le a avea Iesu ma Mesia. Sa tautino mai e Ioane: “E ui ina ou te leʻi iloa o ia; ae peitai ina ia faaalia o ia i a Isaraelu, o le mea lea na ou sau ai e papatiso atu i le vai.”

Sa faamatala atili atu e Ioane i lana au faalogologo le mea na tupu ina ua ia papatisoina Iesu e faapea: “Na ou iloa le agaga ua afio ifo mai le lagi e peiseai se lupe, ua nofo i ona luga. E ui ina ou te leʻi iloa o ia, peitai o ia Lē na auina mai aʻu e papatiso atu i le vai, na fetalai mai o ia i a te aʻu, ‘O lē e te iloa ai le agaga ua afio ifo ma nofo i ona luga, o ia lava lea na te papatiso atu i le agaga paia.’ Na ou vaaia foi ma ou molimau o ia lava le Alo o le Atua.”

I le aso na sosoo ai a o tutū Ioane ma ona soʻo e toalua. Sa ia toe faapea atu ai foi a o faalatalata mai Iesu: “Faauta i le Tamai Mamoe a le Atua!” Ona mulimuli atu ai lea o nei soʻo e toalua o Ioane le Papatiso i a Iesu. O le tasi o i laua o Aneterea, a o le isi e mautinoa lava o le tagata lea na ia tusia lenei tala, o lē sa igoa foi i a Ioane. O Ioane lenei, atonu o ia foi o se tauusoga o Iesu, auā e foliga mai o ia o se tama a Salome, le uso o Maria.

Ina ua ia faliu atu ma iloa ai o loo mulimuli ane i a te ia o Aneterea ma Ioane, sa fesili atu Iesu: “Se ā ea la oulua feau?”

Ua fai mai i laua, “Rapi e, o fea e te mau ai?”

A ua tali atu Iesu: “Ō mai ia, inā matamata.”

O le taimi lea e tusa o le fa i le afiafi, ma sa nonofo pea Aneterea ma Ioane faatasi ma Iesu i lena aso atoa. Mulimuli ane sa matuā fiafia tele Aneterea, ma faanatinati atu ai loa e saili i lona uso e igoa i a Peteru. Ua ia fai atu i a te ia: “Ua ma maua le Mesia.” Ona ia avatu lea o Peteru i a Iesu. Atonu o le taimi foi lena na maua ai e Ioane lona uso o Iakopo ma avatu ai o ia i a Iesu; e ui i lea, ona o lana lava masani, sa leʻi tusia ai e Ioane lenei faamatalaga e uiga i a te ia i lana tusi o le Evagelia.

I le aso na sosoo ai, sa maua ai e Iesu Filipo, o lē e sau mai Petesaita, o le nuu foi lena o Aneterea ma Peteru. Ua ia valaaulia o ia: “Inā mulimuli mai ia i a te aʻu.”

E leʻi umi, ae maua e Filipo Natanielu o lē na igoa i a Patolomaio, ma ua ia fai atu i ai: “Ua matou maua o ia lē ua tusia e Mose i le tulafono, atoa ma le au perofeta, o Iesu lea o le atalii o Iosefa, o le Nasareta.” Sa masalosalo Natanielu. Ua ia fesili atu: “E mafai ea ona tupu o se mea lelei mai Nasareta?”

Sa tauanau atu Filipo e faapea: “Inā sau ia e matamata.” A o la agai mai i a Iesu, na fetalai atu Iesu e faatatau i a Natanielu: “Faauta, o le Isaraelu moni, o lē e leai sona pepelo.”

Sa fesili ane Natanielu: “Na faapefea ona e silafia o aʻu?”

A ua tali atu Iesu: “Na ou iloa oe i lalo o le mati, a o leʻi valaau atu Filipo i a te oe.”

Sa ofo Natanielu. Ua ia tali atu e faapea: “Rapi e [o lona uiga le Aʻoaʻo e], o oe lava o le Alo o le Atua, o oe lava le Tupu o Isaraelu.”

Na fesili atu Iesu: “Ua e talitonu ea, ina ua ou fai atu i a te oe, na ou iloa oe i lalo o le mati? O le a e vaaia mea e silisili atu i lo nei mea.” Ua ia folafola atu foi: “E moni, e moni ou te fai atu i a te outou, e vaaia e outou le lagi ua avanoa; o agelu foi a le Atua e ō aʻe ma ō ifo i le Atalii o le tagata.”

E leʻi leva talu ona mavae o lenei mea, ae tuua loa e Iesu ma ona soʻo fou le vanu o Ioritana, ae faimalaga atu i Kalilaia. Ioane 1:29-51.

▪ O ai uluai soʻo o Iesu?

▪ Na faapefea ona faafeiloai atu Peteru, atonu foi ma Iakopo, i a Iesu?

▪ O le ā na faatalitonuina ai Natanielu, o Iesu o le Alo o le Atua?