O le a Faamae‘a e Iesu Mea Uma e Finagalo ai le Atua
Mataupu 133
O le a Faamaeʻa e Iesu Mea Uma e Finagalo ai le Atua
PE A aveesea e le Tupu Taʻutaʻua o Iesu Keriso Satani ma lana lalolagi amioletonu, maeu se pogai mo le olioli o le a iai! O le a amata ai loa le Pulega filemu a Iesu i le Afe Tausaga!
I lalo o le taʻitaʻiga a Iesu ma ana tupu lagolago, o le a faamamāina ai e i latou o ē o le a faasaoina mai i a Amaketo faatafunaga na totoe mai lena taua amiotonu. O le a faapena foi ona fanauina e i latou o le a faasaoina i le lalolagi ni fanau mo se taimi, ma o i latou nei o le a faia se sao i le galuega fiafia o le galueaiina, o le laueleele e avea o se faatoaga matagofie e pei o se paka.
Mulimuli ane, o le a toe aumaia ai e Iesu le faitau miliona, mai i o latou tuugamau ina ia olioli i lenei Parataiso matagofie. O le a ia faia lenei mea i le faataunuuina o lana lava faamaoniga: “E oo mai le aso . . . o i latou uma ua i tuugamau . . . latou te ō mai ai.”
E aofia ai i a i latou e toe faatutūina e Iesu, lē sa avea muamua ma pagota o lē na oti i le satauro i tafatafa o Iesu. Ia manatua na folafola atu e Iesu i a te ia: “E moni ou te fai atu i a te oe i le asō, o le a ta faatasi ma oe i le Parataiso.” O le a lē aveina aʻe lena tamaloa i le lagi e avea o se tupu e pule faatasi ma Iesu, o le a lē toe avea foi Iesu o se tagata, ma soifua ai i le lalolagi Parataiso faatasi ma ia. Na i lo lea, o le faatasi o Iesu ma le pagota, o le a faia i se uiga faapea o le a Ia toe faatuina mai le pagota i le ola i le Parataiso ma o le a ia silasila i ai ua tausia ona manaoga uma, i le faaletino ma le faaleagaga, e pei ona faaatagia mai i le itulau o sosoo mai.
Seʻi manatu i ai! I lalo o le silafaga alofa a Iesu, o le a tutupu aʻe ai le aiga faaletagata atoa—o ē e faasaoina atu i a Amaketo, o a latou fanau, ma le faitau afe miliona o ē maliliu e toe faatutūina o ē usiusitai atu i a te ia—e agaʻi atu i le lelei atoatoa faaletagata. O le a mau Ieova, e ala i lona Alo mamalu, o Iesu Keriso, i se tulaga faaleagaga ma le fanau a tagata. “Ma,” e pei ona faalogoina e Ioane le leo mai le lagi o faapea mai, “e soloiesea foi e ia loimata uma i o latou mata, e leai foi se toe oti, po o se faanoanoa po o se auē, e leai foi se toe puapuaga.” O le a leai se tagata i le lalolagi e ogotia pe maʻi.
I le faaiuga o le Pulega a Iesu i le Afe Tausaga, o le a oo ai mea i le tulaga e pei lava ona sa uluai fuafuaina e le Atua ina ua ia taʻu atu i le uluai ulugalii, o Atamu ma Eva, ina ia uluola ma tumu ai le lalolagi. Ioe, o le a faatumuina le lalolagi i se ituaiga amiotonu o le fanau a tagata lelei atoatoa. Ua mafaia lenei mea ona o le a faatatauina i lea taimi aogā o le taulaga togiola a Iesu i tagata uma lava. O le oti ona o le agasala a Atamu o le a lē toe iai!
I lea, o le a faataunuuina ai e Iesu mea uma lava na fetalai atu ai Ieova i a te ia e fai. O le mea lea, i le iuga o le afe o tausaga, o le a ia tuuina atu ai le Malo faapea ma le aiga faaletagata lelei atoatoa i lona Tamā. Ona tatalaina loa lea e le Atua o Satani ma ana temoni mai le to e lē gata lea sa lē toe gaoioi ai e pei ua oti. Mo le ā le fuafuaga?
Ia, i le faaiuga o le afe o tausaga, o le toatele o i latou o le a ola i le Parataiso, o i latou ia o ē na toe faatutūina o ē e leʻi tofotofoina lava lo latou faatuatua. A o leʻi maliliu, e leʻi taitai lava ona latou iloa e uiga i folafolaga a le Atua ma i lea, sa lē mafai ai ona faatinoina lo latou faatuatua i ia folafolaga. O lea, pe a uma ona toe faatutūina ma aʻoaʻoina i latou i upu moni o le Tusi Paia, o le a faigofie lava mo i latou i le Parataiso ona auauna i le Atua e aunoa ma ni teteega. Ae afai o le a tuuina atu se avanoa i a Satani e taumafai ai e taofia i latou mai le faaauau ona auauna i le Atua, pe o le a faamaonia ea lo latou faamaoni i lalo o tofotofoga? Ina ia taliina la lea fesili, o le a toe tatalaina mai Satani.
Ua faaalia i le faaaliga na tuuina atu i a Ioane faapea, pe a mavae le Pulega a Iesu i le Afe o Tausaga, o le a faamaonia le taulau o Satani i le liliueseina o se aofai e lē mafaitaulia o tagata mai le auauna atu i le Atua. Ae i le taimi lea, pe a maeʻa le tofotofoga mulimuli, o le a faaumatia loa e faavavau Satani, ana temoni, ma i latou uma na taulau ai o ia i le faaseseina. I le isi itu, o i latou na tofotofoina atoatoa, o ē faamaoni na faasaoina o le a ola pea e olioli i faamanuiaga a lo latou Tamā faalelagi e oo lava i le faavavau.
E manino lava le faia e Iesu, ma o le a faaauau pea ona ia faia se vaega matuā tāua i le faataunuuina o fuafuaga mamalu a le Atua. Maeu se lumanai matagofie o le a mafai ona tatou olioli ai e avea o se iuga o na mea uma lava ua ia faataunuuina i le avea o se Tupu sili faalelagi a le Atua! Ae e lē mafai foi ona tatou faagaloina mea uma lava na ia faia a o avea ma tagata.
Na finagalo malie Iesu e afio mai i le lalolagi ma aʻoaʻoina i tatou e uiga i lona Tamā. I tala atu o lenei mea, na fai ai o ia ma faaaʻoaʻo i uiga tāua o le Atua. E faagaeetia o tatou loto pe a tatou iloiloina lona lototele aʻiaʻi ma ona uiga faaletagata, lona atamai lē mafaatusalia, lona tomai uigaese i le avea o se faiaʻoga, lana taʻitaʻiga lē fefe, ma lona alofa mutimutivale ma lona tiga alofa. Pe a tatou manatua le auala lē mafaamatalaina na tiga ai o ia a o ia saunia le togiola, i le na o lea e mafai ona tatou maua ai le ola, e mautinoa lava la le faagaeetia ai o o tatou loto i le talisapaia mo ia!
E moni, maeu se tagata ua tatou iloa i lenei suesuega o le soifuaga o Iesu! Ua iloatino lava lona silisili ma o se mea e maofa ai. Ua uunaia i tatou e toe faaleo atu upu a le kovana Roma o Ponotio Pilato: “Faauta i le tagata!” Ioe, e moni lava, ‘O le tagata,’ o le tagata silisili o ē uma na soifua mai!
E ala i lo tatou talia o le sauniuniga o lana taulaga togiola, ua mafai ai ona aveesea mai i a i tatou le avega mamafa o le agasala ma le oti na tuufaasolo mai i a Atamu, ma ua mafai ai ona avea Iesu ma o tatou “Tamā o le Faavavau.” O i latou uma o ē o le a maua le ola e faavavau, e tatau ona ave i fale le poto e lē gata e uiga i le Atua ae faapea foi ma le poto e uiga i lona Alo, o Iesu Keriso. Tau ina ia avea lou faitauina ma le suesueina o lenei tusi e fesoasoani ai i a te oe ina ia ave i fale lena malamalama e aumai ai le ola! 1 Ioane 2:17; 1:7; Ioane 5:28, 29; 3:16; 17:3; 19:5; Luka 23:43; Kenese 1:28; 1 Korinito 15:24-28; Faaaliga 20:1-3, 6-10; 21:3, 4; Isaia 9:6.
▪ O le ā le faaeaga fiafia mo ē o le a faasaoina atu i a Amaketo ma a latou fanau?
▪ O ai e faaopoopo atu i ē o le a faasaoina mai i a Amaketo ma a latou fanau o le a olioli i le Parataiso, ma i le ā le uiga o le a faatasi ai Iesu ma i latou?
▪ O le ā le tulaga o le a iai i le faaiuga o le afe tausaga, ma o le ā o le a faia ai e Iesu i lea taimi?
▪ Aisea o le a tatalaina mai ai Satani mai le to e lē gata, ma o le ā o le a mulimuli ane tupu i a te ia ma i latou uma o ē o le a mulimuli atu i a te ia?
▪ E mafai faapefea ona avea Iesu ma o tatou “Tamā o le Faavavau”?